Read Sehwi Yob 8 Bible Online

Yob 8 - Sehwi bible

Yob 8

¹Yeɛ Suhiniɛ Bildade buale kyɛ,

²“Kyinzu koraa yeɛ ɛkɔkeka sɔ dwirɛ hemɔ maa okoodwu ɔ, bɔ ekodwudwo kogua mvrama nu mbaen ɔ?

³Aso Nyameɛ obua ndɛengyea, anaa Tuminiɛ ne, aso obua ndɛen mundumundu so?

⁴Sɛ wɔ mma nemɔ bɛyɔle ye bɔne a, wamaa banya bɛ mmeraatolɛ nwo akatuaa.

⁵Sɛ ɛkɔpena Nyameɛ si atee, ná ɛkɔsrɛ Tuminiɛ ne maa okonwu wɔ anwumvoin a,

⁶sɛ wɔ nwo te ná ɛtengyɛ a, susu amba kyɛ, ɔkɔkanyane ye nwo ɔkɔboka wɔ, na ɔkɔma wɔ sa kɔha bɔ ahwere biala.

⁷Ɔwɔ nu kyɛ ɛhyɛle ye bo kaaba bie de, nakoso w’ayieleɛ nu kɔyɛ piri paa.

⁸“Bɔ daa ama mɔ baha bato berɛ ne, bisa tie, ná bɔ bɛ nana mɔ baneanea nu banwu ye ne, dwene ye nwo.

⁹Yɛ de, anomasi wa ala yeɛ bɛwo yɛ ɔ, na yɛnze huu, ofikyɛ aseɛ ye aso, yɛ ngoa otu mini te kyɛ wawoɛ.

¹⁰Aso bengohyirehyire wɔ ná baha bahyire wɔ, aso bɛngɔhã bɛ ti anu nworɛ dwirɛ bengohyire wɔ anaa?

¹¹“Aso elemmire kɔhora kofifi nekaa bɔ asaa nne berɛ ɔ? Aso ngyɛngyɛma kɔhora konyi nekaa bɔ nzue nne berɛ ɔ?

¹²Mmerɛ bɔ ɔte frɔmfrɔm bɔ bennya bɛppɛle ne, bɛkese ndɛndɛ bɛtra ndire biala.

¹³Ebiala bɔ ɔma ye wora fi Nyameɛ ne, sɔ yeɛ oyie ye ɔ, na sona bɔ onzuro Nyameɛ ne, ye anyelasoɛ tu mini.

¹⁴Bɔ wafa ye nwo wato so ne, ɔsɛkye, yeɛ ye anyelasoɛ koso ɔyɛ mmerɛ kyɛ ananze ndendaen.

¹⁵Ɔfa ye nwo kisa ye sua, nakoso sua ne dwiri gua, yeɛ ɔfa ye nwo mata sua ne, nakoso sua ne ngora gyina.

¹⁶Sɔ sona ne te kyɛ bakaa bɔ onyi frɔmfrɔm wɔ eyia nu ɔ, na ye mmaen nemɔ nu trɛtrɛ wɔ eboo ne anu.

¹⁷Ye ndii mendamenda nyɔboɛ nyɔboɛ, na nyɔboɛ nyɔboɛ nemɔ afia yeɛ owura ɔ.

¹⁸Sɛ betu ye befi ye boso a, ye boso berɛ nekaa bɔ ogyi ne ɔpo ye, na ose ye kyɛ, ‘Wɔ de, nnwuni wɔ le.’

¹⁹Yoo, ye anigye atee bɔ ɔnate so ɛne, na mmakaa foforɛ koso fifi wɔ ye boso berɛ.

²⁰“Daabi, sona bɔ ɔtengyɛ ne, Nyameɛ mbo ye, yeɛ ɔmmoka bɔnefoɛ.

²¹Ɔkɔmaa ɛkɔseresere bieku, ná wama wɔ noa ali ahurusi.

²²Animguaseɛ kɔmata wɔ pɔfoɛ mɔ, na amumuyɛɛfoɛ awuro kɔbɔ tɔɔ.”