Read Sehwi Yob 9 Bible Online

Yob 9 - Sehwi bible

Yob 9

¹Yeɛ Yob mane mmuayɛɛ kyɛ,

² “Nahorɛ nu, mese kyɛ ɔte sɔ, nakoso ɔkɔyɛ sɛɛ né dasaniɛ watengyɛ wɔ Nyameɛ nyunu?

³Sɛ ebie kuro kyɛ ɔne ye bɛbɔ kuro a, edwirɛ apee ko bɔ Nyameɛ kobisa ne, ɔngɔhora nu ko po noa ye.

⁴Ye nworɛ ne ye tumi te totohyia, nwa yeɛ wadwɔso watia ye bɔ wafa ye nwo wali tɔtorɔtɔɔ ɔ?

⁵Ye bɔ otutu mmokaa bo gua bɔ ɔmmɔ bɛ kɔkɔ ɔ, ye bɔ ɔfɛ yaa dwiri bɛ gua ɔ,

⁶ye bɔ ɔwoso aseɛ fi ye boso, ná ɔma aseɛ nyinasoɛ mɔ bɛwoso ɔ.

⁷Ye bɔ ɔhyɛ eyia kyɛ nnɛmaa opukye a ombukye ɔ, ye bɔ omundu nzramaa mɔ nyunu mma bɛ nda ɔ.

⁸Ye bɔ ye ngome yeɛ ɔtrɛtrɛle ewienu nu ɔ, ye bɔ otiatia ɛpo asorɔkye so ɔ.

⁹ Ye bɔ ɔyɔle nzramaa kure bɔ ɔwɔ ewienu sorɔ, ɔne ewienu afia, Akɔtaen-ne-ye-mma, yeɛ nzramaa kure bɔ ɔwɔ ewienu ngwaen.

¹⁰Ye bɔ ɔyɔ nningyein mbiri mbiri bɔ ɔbo sona ndeaseɛ so ɔ, anwanwadeɛ bɔ ɛka a ennwu ye noa ɔ.

¹¹Eh, ɔpɛ nu me nwo wa, nakoso mennwu ye; ɔsẽ kɔ, nakoso me nye mbɛ ye so.

¹²Sɛ ofoti nikyee kɔ a, nwa yeɛ ɔkɔhora kosi ye atee ɔ? Nwa yeɛ ɔkɔhora kobisa ye kyɛ, ‘Nzikyɛ yeɛ ɛ́yɔ e?’

¹³“Nyameɛ ngɔhwe ye yaafɛlɛ ne ngosa, na bɛ bɔ bɛboka Rahabo[4] ne, Nyameɛ abrɛ bɛ ase maa bawura ye bɔbɔ ye bo.

¹⁴Yiti, me ole nwa bɔ mekora meye me noa mekyire ye ɔ, anaa, ngɔyɛ sɛɛ né mahora masa me nwo mahyire ye?

¹⁵Sɛ medi be po a, mengɔhora ngɔye me noa ngohyire ye, na mmom ngɔsrɛ me ndɛenbualɛniɛ ne, kyɛ onwu me anwumvoin.

¹⁶Sɛ mefrɛ ye ndɛenbualɛniɛ nyunu ná ɔba a, menne menni kyɛ bɔ meka ye ɔkɔtɛ me so ɔ.

¹⁷Ofikyɛ ɔnate edwirɛ kãa bie ati opura me, na ɔma me nwo yɛ ngena ngena bɔ nnyɛle hwee ɔ.

¹⁸Ɔmma menne me nwome, na mmom waprapra aworabɔlɛ wagua me so.

¹⁹Sɛ ɔba kyɛ yɛli ye anwoserɛ so a, ye yeɛ ɔte anwoserɛniɛ ɔ! Yeɛ sɛ ɔba ndɛenbualɛ koso a, ndɛenbualɛniɛ beni nyunu yeɛ ɔkɔhɔ ɔ?

²⁰Sɛ medi be po a, ahaa me bɔbɔ me noa kobua me fɔ, yeɛ sɛ mvomsoɛ nne me nwo po a, ɔkɔmaa ngonwu kyɛ me dwirɛ nyɛ fɛ.

²¹Mvomsoɛ biala nne me nwo de, nakoso menze me bɔbɔ me nwo yé; afei de, ewiase afono me.

²²Ye mukoraa pɛ; na ɛhe ati yeɛ menwa: bɔ mvomsoɛ nne ye nwo oo, bɔ ɔte amumuyɛɛniɛ oo, ode bɛ mukoraa bɛ ngoa fi bɛ sa nu.

²³Sɛ asane si ma mmenia wuwu mvum nu a, mmenia bɔ bedi be ne, b’amaneɛnwunɛ ɔyɛ ye sere.

²⁴Wafa aseɛ wawura bɔnefoɛ sa,[5] ɔma nu ndɛenbualɛfoɛ bebu bɛ nye begua nahorɛ so. Sɛ nna ye ahɔ a, né nzaade nwa ɔ?

²⁵“Me ngyẽa ɔsẽ kɔ ndɛndɛ tra sona bɔ otu amirika ɔ, me ngyẽa ɔnwati kɔ bɔ mennwu anika biala wɔ me nu ɔ.

²⁶Ɔpɛ nu kɔ ndɛndɛ kyɛ ɛlɛen bɔ ɔla asue nye ɔ, ɔkɔ ndɛndɛ kyɛ kɔleɛ bɔ ɔto kye naen ɔ.

²⁷Sɛ meka kyɛ, ‘Ngɔma me wora kofi somoɛ bɔ mebɔ ne, ngɔyakyi me nyunu bɔ mayɛ ye aworabɔlɛ aworabɔlɛ ne, ná mama me nye agye’ a,

²⁸né m’amaneɛnwunɛ ne amukoraa afa ɛserɛ wato me so, ofikyɛ mese kyɛ engobua me be.

²⁹Na sɛ ekobua me fɔ a, nzu ati yeɛ meha me nwo mbaen ɔ?

³⁰Sɛ mefa nzue gyengɔgyengɔ mebia, ná mefa kondu menwunzi me sa po a,

³¹ekofindi me kɔto kumaa pikapika nu, na me nwo kɔyɛ me bɔbɔ me ndaadeɛ po tɛ.

³²Ofikyɛ ye de, ɔtte dasaniɛ kyɛ me, ná mahora masa me nwo mahyire ye, ná yahora yagyina yabɔ nguro.

³³Ndɛenbualɛniɛ biala nne berɛ bɔ ogyi yɛ afia, bɔ okoli yɛ munyɔ yɛ afia dwirɛ ɔ.

³⁴Sɛ ɔye amaneɛ bɔ wafa wato me so ne ofi me so, ná wamma ye nwo suronyi wandɔ me so a,

³⁵ye de mengɔfa ye nwo suronyi yeɛ ngodwudwo ɔ, ofikyɛ me de, mese kyɛ nna sɔ yeɛ nde ɔ.