Read Sehwi Edwein 10 Bible Online

Edwein 10 - Sehwi bible

Edwein 10

¹Ao AWURADE, nzu ati yeɛ aagyina dedeede sɔa ye? Nzu ati yeɛ amaneɛnwunɛ mmerɛ nu, afa wɔ nwo afea ye?

²Bɔnefoɛ bele anwomasoɛ bɛtane bɛ bɔ bɛyɛ anwumvo ɔ, bɛ nye; porɛ bɔ babɔ ne, maa obu sa bɛ.

³Ofikyɛ bɔnefoɛ bɛfa bɔ ɔla b’ahone nwo bɛhoahoa bɛ nwo, yeɛ adifuuniɛ ɔnoma AWURADE odwudwo otia ye.

⁴Bɔnefoɛ ye anwomasoɛ maa ɔmbena Nyameɛ si atee; ye adwene amukoraa ole kyɛ, “Nyameɛ biala nne berɛ.”

⁵Nningyein kɔ so yé ma ye mmerɛ biala; wɔ ndɛenbualɛ ne, ɔwɔ anwuro anwuro bɔ ye de ɔmva ye nwo ɔ; ɔgoro ye pɔfoɛ mɔ amukoraa bɛ nwo.

⁶Ɔka ye wɔ ye ti anu kyɛ, “Mengofi ase”; aworɛ ndoatoasoɛ amukoraa nu, mengoyia amaneɛ biala.”

⁷Ɛnomalɛ, nnakannaka ne anwunanwuna ayi ye noa nu to, na ye temverema bo te nzɛmmɔne ne amumuyɛɛ.

⁸Ɔtetɛ wɔ nguraa mɔ nu; odi mmenia bɔ bɛyyɔle tɛɛ ɔ awue wɔ mvealeɛ nu. Bɛ bɔ bɛyɛ anwumvo yeɛ ole bɛ nwo anyeɛ ɔ.

⁹Ɔtetɛ mvealeɛ nu kyɛ gyata bɔ wafea poen nu ɔ; ɔtetɛ kyɛ okonya bɛ bɔ bɛyɛ anwumvo ɔ ɔkɔhye bɛ. Ɔkye bɛ bɔ bɛyɛ anwumvo ɔ, na ɔpoa bɛ ase kowura ye ngaen nu.

¹⁰Ɔkoto, na okundu berɛ, na ɔfa ye anwoserɛ ɔma mmenia bɔ bɛyɛ anwumvo ne bɛtɔ ye ngaen nu.

¹¹Ɔka ye wɔ ye ti anu kyɛ, “Nyameɛ wora afi, wafa ye nyunu wafea, na ongonwu ye le.”

¹²Ao AWURADE, dwɔso e! Ao Nyameɛ, kyire wɔ tumi! Nnɛma wɔ wora fi sona bɔ onwu amaneɛ ɔ.

¹³Nzu ati yeɛ bɔnefoɛ odwudwo tia Nyameɛ, ná ɔkã ye wɔ ye ti anu kyɛ, “Ɛngɔhwe me so” ye?

¹⁴Nakoso enwu ye. Amba, wɔ nye tua amaneɛ ne aworabɔlɛ bɔ ɔba ɔ, maa yiti ɛkɔhwe ye so wɔ ye nwo. Sona bɔ ɔyɛ anwumvo ne, ɔfa ye nwo wura wɔ sa; wɔ yeɛ ɛte ayisiaaniɛ bokafoɛ ɔ.

¹⁵De bɔnefoɛ ne amumuyɛɛfoɛ bɛ sa nu tumi; tua ye bɔne so kerɛ kɔpem kyɛ engonwu ko po ɔ.

¹⁶AWURADE te hene afebɔɔ, na maen maen mɔ bɛ boso konua kofi ye aseɛ so.

¹⁷Ao AWURADE, etie anwobrɛaseɛniɛ ye abisadeɛ; ɛhyɛ ye nguraen, etie ye sufrɛ,

¹⁸na edi ayisiaaniɛ ne sona bɔ ɔyɛ anwumvo ɔ bɛ dwirɛ ma bɛ, amaa ɔnate so dasaniɛ bɔ ofi nnɛterɛ nu wanyɛ anwunanwuna ko.