Read Sehwi Edwein 103 Bible Online

Edwein 103 - Sehwi bible

Edwein 103

¹Dawide dwein Ao me kra, ye AWURADE ayɛ, yeɛ bɔ ɔwɔ me nu amukoraa, ɛ́mɔye ye dumaa krongron ne ayɛ.

²Ao me kra, ye AWURADE ayɛ, na nnɛma wɔ wora fi ye nningyein paa nemɔ anu biala.

³Ye yeɛ ɔfa w’amumuyɛɛ amukoraa kyɛ wɔ ɔ, ye yeɛ ɔsa w’anwonyerɛ amukoraa ɔ;

⁴ye yeɛ ɔpepɛ de wɔ ngoa fi ɛborɔ kumaa nu ɔ, ye yeɛ ɔfa ɔdɔ bɔ onni ngasi ne anwumvoinnwunɛ ɔbɔ w’abotire ɔ;

⁵ye yeɛ ɔmaa enya nningyein paa wɔ mmerɛ bɔ ɛte ase ɔ, amaa ɔnate so wɔ mmerandeɛ nu osa kakyi foforɛ kyɛ kɔleɛ deɛ.

⁶Bɛ bɔ ebiemɔ hyɛ bɛ so ne, AWURADE di bɛ mukoraa bɛ dwirɛ ma bɛ, na obua ndɛen turoloo ma bɛ.

⁷Ɔlale ye atee ali hyirele Mose, na ɔlale ye nnwumaa ali hyirele Yisraelfoɛ.

⁸AWURADE se anwumvoin, na ɔdo mmenia, ye ahone nhu ndɛ, na ye ɔdɔ bɔ onni ngasi ne ɔsone.

⁹Ɔngɔma ye ahone ngohu yɛ so daa, yeɛ ɔngɔma ye yaa ne ngɔtena berɛ daa.

¹⁰Ɔnnea yɛ bɔne nwo ɔne yɛ nni, yeɛ ɔnnea y’amumuyɛɛ nwo ndua yɛ so kerɛ.

¹¹Na kyɛbɔ anwuro ne aseɛ b’afia si wale ne, sɔ ala yeɛ ye ɔdɔ bɔ onni ngasi ne ɔte piri ma bɛ bɔ besuro ye ɔ.

¹²Kyɛbɔ eyia afiteleɛ ne eyia atɔleɛ b’afia si wale ne, sɔ ala yeɛ wamaa yɛne yɛ mmeraatolɛ y’afia atete ɔ.

¹³Kyɛbɔ seɛ si nwu ye mma anwumvoin ne, sɔ ala yeɛ AWURADE nwu bɛ bɔ besuro ye ɔ anwumvoin ɔ.

¹⁴Ofikyɛ ye yeɛ ɔse kyɛbɔ osi bɔle yɛ ɔ, na ɔkaye kyɛ yɛte mvuture.

¹⁵Dasaniɛ de, ye ngyẽa te kyɛ ɛserɛ; ɔyɛ frɔmfrɔm kyɛ eburo bakaa nyerɛen.

¹⁶Nakoso sɛ mvrama bɔ ye a, né waporo, na ye boso nekaa bɔ otua ne, ɔnze ye ko.

¹⁷Nakoso AWURADE ye ɔdɔ bɔ onni ngasi ne, ɔwɔ berɛ ofi tetetete bɔ ɔkwaadwu afebɔɔ ma bɛ bɔ besuro ye ɔ, na ye tenenee wɔ berɛ ma bɛ mma ne bɛ nnomaa mɔ;

¹⁸ɔwɔ berɛ ma bɛ bɔ bedi ye apam ne aso, ná bɛkaye ye mmeraa dwirɛ ne kyɛ bekoli so ɔ.

¹⁹AWURADE afa ye ahennie bia watimu anwuro, na ye ahennie di nikyee biala so.

²⁰Ao AWURADE abɔfo mɔ, ɛ́mɔye ye ayɛ: ɛmɔ anwoserɛfoɛ bɔ ɛmɔyɔ ye apɛdeɛ ná ɛmɔyɔ sotie bɛma ye dwirɛ ɔ.

²¹AWURADE asafo amukoraa, ɛ́mɔye ye ayɛ, ye somvoɛ mɔ bɔ ɛmɔyɔ ye apɛdeɛ ɔ!

²²AWURADE sa noa nnwumaa amukoraa, ɛ́mɔye ye ayɛ wɔ nekaa biala bɔ odi hene ɔ. Ao me kra, ye AWURADE ayɛ!