Read Sehwi Edwein 104 Bible Online

Edwein 104 - Sehwi bible

Edwein 104

¹Ao me kra, ye AWURADE ayɛ. Ao AWURADE me Nyameɛ, ɛte piri paa. Afa animnyam ne ahennie nu animnyam ahera.

²Afa kanea agurɔ wɔ nwo kyɛ ɛtena; atrɛtrɛ ewienu nu kyɛ ɛtena sua.

³Wɔ sua mbuna mɔ, begyigyi nzue mɔ so, ɛfa munungum yɛ wɔ teaseɛnam, na mvrama ye ndaa so yeɛ ɛnate ɔ.

⁴Ɛfa mvrama yɛ wɔ bɔfoɛ mɔ, yeɛ ɛfa see wuronyiwuronyi yɛ wɔ somvoɛ mɔ.

⁵Ɛfale aseɛ gyinane ye nyinasoɛ mɔ so, kyɛbɔ ɔkɔyɛ bɔ ɔngɔwoso le ɔ.

⁶Ɛfale buma katale so kyɛ ɛtena, na nzue mɔ katale mmokaa nemɔ aso.

⁷Na ɛteateane bɛ ne, bɛnwatili; bɛtele kyɛ ɛbɔle nu kurudududu ne, bɛnwati bɛhɔle.

⁸Bebu bɛfale mmokaa nemɔ aso, na bɛwale ase beeguale bɔnza nemɔ anu, nekaa bɔ ɛhyehyɛle mane bɛ ne.

⁹Ɛtole wɛen bɔ onni kyɛ bɛtra ye ɔ, kyɛbɔ ɔkɔyɛ bɔ bengosa bɛngɔkata aseɛ so ko ɔ.

¹⁰Ɛma mbombonzue pu nzue wɔ bɔnza nemɔ anu, bɛtengyɛ bɛfa mmokaa nemɔ afia,

¹¹bɛma eburo kaka biala nya bie no; eburo afunum mɔ bɛfa bɛsɔ bɛ nzuhɔen noa.

¹²Asue nemɔ anoa yeɛ ɔte ewienu nnomaa b’atenaleɛ ɔ; bɛto dwein wɔ ye mmaen nemɔ anu.

¹³Efi w’atenaleɛ berɛ yeɛ eguagua mmokaa nemɔ aso nzue ɔ; na wɔ sa noa nnwumaa yi aseɛ so tɛkyɛ.

¹⁴Ɛma ndire fifi ma nyɛmmoa, yeɛ ɛma fieso nningyein fifi bɔ sona yɔ ye nwo adwuma ɔ, kyɛbɔ ɔkɔyɛ bɔ okonya aleɛ kofi aseɛ nu ɔ,

¹⁵ɔne nzaa bɔ ɔma sona nye gye ɔ, ɔne sakyeɛ bɔ ɔma sona nyunu yɛ mmenanwo mmenanwo ɔ, yeɛ aleɛ bɔ ɔma sona wora kyekye ɔ.

¹⁶AWURADE guagua ye mmakaa so nzue pee paa, Lebanon sida bɔ olualuale ne.

¹⁷So yeɛ nnomaa bɛnwo bɛ saen ɔ; na asia mmakaa nemɔ aso yeɛ ɔte akyemvona katakyie nemɔ b’awuro ɔ.

¹⁸Mmokaa ndendenn nemɔ bɛte gyane mɔ b’afealeɛ, yeɛ nyɔbotaen nemɔ koso bɛte ngrande mɔ b’afealeɛ.

¹⁹Ɛbɔle ɛsraen kyɛ ɔma yɛnwu mmerɛ nu nzakyerayɛɛ, na eyia se mmerɛ bɔ odi kyɛ ɔkɔtɔ ɔ.

²⁰Ɛma awosii ba, na aleɛ sa, na sɔ mmerɛ ne yeɛ ɛhɔayeɛ nu ngaka amukoraa befitefite ɔ.

²¹Gyata akrɔngrɔma nemɔ bobɔ nu bɛpena ngaka bɛkye bɛ, na bɛ nye la Nyameɛ so kyɛ ɔkɔma bɛ sa kɔhã bɛ noa aleɛ ɔ.

²²Sɛ eyia fite a, bɛworoworo, na bɛkɔlela b’afealeɛ mɔ nu.

²³Sona fite ɔkɔ ye adwuma nu, na ɔyɔ adwuma toonn ma aleɛ dwo.

²⁴Ao, AWURADE wɔ sa noa nnwumaa sone paa! Ɛfale nworɛ tole ye nwo yeɛ ɛbɔle bɛ mukoraa ɔ; w’abɔdeɛ mɔ bayi aseɛ so tɛkyɛ.

²⁵Ɛpo yeɛ ɔla dɔ kandinga tɛtrɛtɛɛ ne, ngaka bɔ bɛkongo pembepembe wɔ nu bɔ bɛka a bennwu bɛ noa ɔ, bɛte abɔdeɛ mbiri mbiri ne mmaa mmaa.

²⁶So yeɛ ɛlɛen mɔ bɛnate ɔ, na ɛbɔle Ɛlɛngyɛen suronyisuronyi ne kyɛ oli angorɛ wɔ nu.

²⁷Bɛ mukoraa bɛ nye la wɔ so, kyɛ ɛkɔma bɛ sa kɔhã bɛ noa aleɛ wɔ mmerɛ bɔ ɔsɛ ɔ nu.

²⁸Sɛ ɛfa ma bɛ a, bɛboaboa ye noa; sɛ ɛtrɛ wɔ sa nu a, ɛma nningyein paa bu bɛ so.

²⁹Sɛ ɛye wɔ nye fea bɛ a, bɛ kunu te bɛ, sɛ etua bɛ nwomeɛ a, bewuwu, na besa bɛkɔ bɛ mvuture nu.

³⁰Ɛsoma wɔ nwomeɛ yeɛ ɛfa bɔ bɛ ɔ; na ɛma aseɛ so nningyein yɛ foforɛ.

³¹AWURADE animnyam kɔtena berɛ afebɔɔ; AWURADE nye kɔgye ye nnwumaa nwo,

³²Ɔto ye nye nea aseɛ a, aseɛ woso, ná ɔte ye sa kã mmokaa a, betu nwosina ɔ!

³³Mmerɛ bɔ nde ngoa nu ye, ngɔto dwein ngɔye AWURADE ayɛ, Kyɛ nde ase ye, ngɔto me Nyameɛ nwo ayɛyelɛ dwein.

³⁴Mesrɛ kyɛ ɔma bɔ medwene ye nwo ne ɔsɔ ye nye, ofikyɛ AWURADE nu yeɛ medi ahurusi ɔ.

³⁵Ma bɔnefoɛ bewuwu befi aseɛ so, nnɛma amumuyɛɛfoɛ bɛtena ngoa nu ko. Ao me kra, ye AWURADE ayɛ. Kamvo AWURADE!