Read Sehwi Edwein 105 Bible Online

Edwein 105 - Sehwi bible

Edwein 105

¹Ao, ɛ́mɔfa asennaa bɛma AWURADE, ɛ́mɔsu bɛfrɛ ye dumaa, ɛmɔhã ye anwanwadeɛ ne behyire maen maen mɔ!

²Ɛ́mɔto ye nwo dwein, ɛ́mɔto ye nwo ayɛyelɛ dwein. Ɛ́mɔbɔ ye anwanwadeɛ amukoraa nwo dawure.

³Ɛ́mɔfa ye dumaa krongron ne bɛhoahoa bɛ nwo. Bɛ bɔ bɛpena AWURADE si atee ne, ma bɛ nye gye.

⁴Ɛ́mɔpena AWURADE ne ye tumi. Ɛ́mɔpena ye si atee daa biala.

⁵Ɛ́mɔkaye anwanwadeɛ mɔ bɔ wayɔ ne, ye nzɛngyerɛnneɛ mɔ ɔne ye ndɛen bɔ wabua ne.

⁶O, ye somvoɛ Abraham boso ama, Yakob boso ama bɔ waneanea nu waye bɛ ɔ.

⁷Ye yeɛ ɔte AWURADE yɛ Nyameɛ ɔ; obua aseɛ ye aso ama amukoraa ndɛen.

⁸Ɔkaye ye apam ne daa, bɔ ɔte edwirɛ bɔ ɔhyehyɛle mane aworɛ ndoatoasoɛ apee ko ne,

⁹apam bɔ ɔne Abraham bɛyɛle ne, bɔhyɛ bɔ ɔtale ndaen foale so fa mane Yisake ne,

¹⁰bɔ osili ye pi fa yɛle ahyɛdeɛ mane Yakob ne, bɔ ɔyɛle apam afebɔɔ mane Yisrael ne,

¹¹bɔ ɔhane ye nwo dwirɛ kyɛ, “Wɔ yeɛ ngɔfa Kanaan aseɛ ne ngɔma wɔ kyɛ ɛmɔ bue deɛ bɔ ɔte ɛmɔ agyapadeɛ ɔ.”

¹²Mmerɛ bɔ né banzo, bɔ né bemmu bɛ, ná bɛte ɛwɔfoɛ mɔ wɔ aseɛ ne aso,

¹³bɔ bekyinikyini maen maen mɔ so, bɔ befi ahennie ko anu bɛkɔ maen foforɛ nu ne,

¹⁴wamma ebiala wandane bɛ nye; na ɔnate bɛ ti ɔhwene ahemvo mɔ so.

¹⁵Ɔhane kyɛ, “Me mmenia bɔ mapopa bɛ ngoo ne, nnɛma ɛmɔfa ɛmɔ sa bɛkã bɛ; yeɛ me ngɔmhyɛlɛfoɛ koso, nnɛma ɛmɔyɔ bɛ bɔne biala!”

¹⁶Ɔmane ɛhɔen wale aseɛ ne aso, ná ɔsɛkyele b’aleɛ amukoraa ne,

¹⁷ ɔyele biaa bie maa olili bɛ nyunu moa. Ye ole Yosef bɔ bɛtɔnene ye maa ɔɔyɛle akoaa ne.

¹⁸Beguale ye gya ngɔnzɔngɔnzɔ ma omiane ye, bɛfale ngɔnzɔngɔnzɔ bɛsɔle ye kɔme,

¹⁹kɔpem kyɛ edwirɛ bɔ ɔhane ne wale nu ɔ: AWURADE dwirɛ ne mane ye nwo sale.

²⁰Ɛhene ne somane maa bɛɛyele ye befili kuku nu; bɔ odi maen maen mɔ so ne maa onyane ye ti odidili nu.

²¹Ɔmaa ɔyɛle ye awuro ne aso meneɛ, ɔne bɔ ole ye amukoraa so neafoɛ,

²²kyɛ ɔ́fa ahyɛdeɛ ma ye safohene mɔ kyɛbɔ okuro ɔ, ná otu ye mbanyi mɔ foɛ.

²³Afei Yisrael wale Misraim; Yakob oosikyele Ham aseɛ so.

²⁴Na AWURADE mane ye mmenia bɛtale pee, na ɔmaa benyane anwoserɛ bɛtrale bɛ pɔfoɛ mɔ.

²⁵Ɔmane pɔfoɛ nemɔ adwene sesane maa bɛpɔle ye mmenia nemɔ. Na bɛfale nworɛ atee so bɛhyɛle ye somvoɛ nemɔ aso.

²⁶Ɔsomane ye somvoɛ Mose, yeɛ Aarɔn bɔ ɔneaneane nu yele ye ne.

²⁷Bɛyɔle ye nzɛngyerɛnneɛ wɔ bɛ nu, ɔne ye anwanwadeɛ wɔ Ham aseɛ so.

²⁸ Ɔsomane awosii, na ɔmane aseɛ ne aso yɛle tunn; nakoso bamva ye dwirɛ ne banyɛ huu.

²⁹Ɔkakyili bɛ nzue mɔ mogya, na ɔmane b’asue nu naen mɔ wuwuli.

³⁰Mborohyɛen lele b’aseɛ ne fale, maa belele b’ahemvo mɔ bɛ pumbu nu po bɛfale.

³¹Odwudwole, na atuin pembepembe paa yeɛ ngondia wale bɛ maen ne anu nekaa biala.

³²Ɔmane asukɔtwea tɔle kyɛ esue guale bɛ so, na agralaa tetele wɔ bɛ maen ne anu amukoraa.

³³Ɔsɛkyele bɛ bobe ne bɛ borɔdoma mmakaa, na obubuli bɛ maen ne anu mmakaa.

³⁴Odwudwole, na mmɛbɛ wale, yeɛ nduro bɔ ɛka a ennwu bɛ noa ɔ;

³⁵belili b’aseɛ ne aso nyaa amukoraa, na belili b’aseɛ ne aso aleɛ.

³⁶Ohuhuni bɛ maen ne anu bamuɛbaa amukoraa, bɔ bɛte bɛ bienzua nu anwoserɛ amukoraa bɔ oli moa ne.

³⁷ Yeɛ ɔmane Yisrael nyane ɛdwetɛ ne esikaa kɔkorɛ, na ɔyele bɛ fili berɛ hɔle, na ebiala nne ye mmusua kure nemɔ anu bɔ ɔyɛle mmerɛ ɔ.

³⁸Befili berɛ ne, Misraim nye gyele, ofikyɛ né bɛ nwo suronyi atɔ ye so.

³⁹Ɔtrɛle munungum nu maa ɔyɛle ngatasoɛ, yeɛ ɔmane see yɛle bɛ kanea kɔngɔen.

⁴⁰Bebisale, na ɔfale ayenzii mɔ brɛle bɛ, na ɔmane bɛ aleɛ fili nyameɛso mane bɛ ko yili.

⁴¹Ɔpakyele nyɔbotaen ne anu, na nzue pu wale, na ɔtengyɛ fale ɛserɛ ne aso kyɛ asue.

⁴²Ofikyɛ ɔkayele ye bɔhyɛ krongron ne, ɔne ye somvoɛ Abraham.

⁴³Yiti ɔyele ye mmenia fili berɛ wɔ anigye nu, bɛ yeɛ waneanea nu waye bɛ ɔ, na bɛfale edweintolɛ bɛhɔle.

⁴⁴Ɔfale maen maen mɔ b’aseɛ mane Yisraelfoɛ, ɔmane Yisraelfoɛ bɛ sa hane bɔ maen maen nemɔ bafɛ banya ɔ,

⁴⁵amaa ɔnate so Yisraelfoɛ bali ye ahyɛdeɛ so, ná bali ye mmeraa so. Ɛ́mɔye AWURADE ayɛ!