Read Sehwi Edwein 107 Bible Online

Edwein 107 - Sehwi bible

Edwein 107

¹ Ao, ɛmɔla AWURADE ase, ofikyɛ ɔte paa, na ye ɔdɔ bɔ onni ngasi ne, ɔwɔ berɛ afebɔɔ.

²Bɛ bɔ AWURADE apepɛ ale bɛ ne, odi kyɛ bɛkã sɔ; bɛ bɔ wapepɛ wale bɛ wafi amaneɛ nu,

³ná waboaboa bɛ noa wafi aseɛ mɔ aso, ofi eyia afiteleɛ bɔ ɔkwaadwu eyia atɔleɛ, ofi sorɔ bɔ ɔkwaadwu ngwaen ne.

⁴Behyinihyinini aseɛ pralaa so wɔ atee bɔ ebiala mva so ɔ so, bɔ bannwu kuro biala bandena so ɔ.

⁵Ɛhɔen ne nzuhɔen huni bɛ, na bɛ kra botole wɔ bɛ nu.

⁶Yeɛ besu bɛfrɛle AWURADE wɔ b’amaneɛnwunɛ nu, na ɔpepɛ lele bɛ fili b’anwokyere nu.

⁷Olili bɛ nyunu fale bɛ fale atee tee so maa benyane kuro bɛtenane so.

⁸Odi kyɛ bɛye AWURADE ayɛ wɔ ye ɔdɔ bɔ onni ngasi ne ati, wɔ ye anwanwadeɛ bɔ ɔyɔ ma adasa mmaa ne ati.

⁹Ofikyɛ ɔma sona kra bɔ nzuhɔen ku ye ɔ nzue, na ɔfa aleɛ paa ma sona kra bɔ ɛhɔen ku ye ɔ ma ye ko yi.

¹⁰Ebiemɔ tenane awosii ne ewue bɔnza awosii kabii nu, kukunufoɛ bɔ benwuni amaneɛ ná beguale bɛ ngɔnzɔngɔnzɔ ɔ.

¹¹Ofikyɛ bɛyɔle Nyameɛ dwirɛ nwo lɔen, na bebuli Anwuro Anwuroniɛ ne nhyehyɛleɛ animtia.

¹²Ɔfale amaneɛ piri tole bɛ so brɛle b’ase, befifini ase bɔ bannya bokafoɛ biala ɔ.

¹³Yeɛ besu bɛfrɛle AWURADE wɔ b’amaneɛnwunɛ nu, na ɔpepɛ lele bɛ fili b’anwokyere nu.

¹⁴Ɔyele bɛ fili awosii ne ewue bɔnza awosii kabii nu, na obubuli ngɔnzɔngɔnzɔ bɔ ogua bɛ ne anu.

¹⁵Odi kyɛ bɛye AWURADE ayɛ wɔ ye ɔdɔ bɔ onni ngasi ne ati, wɔ ye anwanwadeɛ bɔ ɔyɔ ma adasa mmaa ne ati.

¹⁶Ofikyɛ wabubu kɔɔbere anoa mɔ, na wapepɛ buralɛ nu ahuronzi ahuronzi.

¹⁷Ebiemɔ yɛle ngwaseafoɛ ɔnate bɛ mmeraatolɛ ti, na ɔnate b’amumuyɛɛ ti benwuni amaneɛ.

¹⁸Bɛ kra noa nu tole wɔ aleɛ biala nwo, na bepingyele ɛborɔ atee pambim.

¹⁹Yeɛ besu bɛfrɛle AWURADE wɔ b’amaneɛnwunɛ nu, na ɔpepɛ lele bɛ fili b’anwokyere nu.

²⁰Ɔsomane ye dwirɛ ne, na ɔsale bɛ anwonyerɛ, na ɔpepɛ lele bɛ fili b’amaneɛnwunɛ nu.

²¹Odi kyɛ bɛye AWURADE ayɛ wɔ ye ɔdɔ bɔ onni ngasi ne ati, wɔ ye anwanwadeɛ bɔ ɔyɔ ma adasa mmaa ne ati.

²²Na odi kyɛ bɛbɔ asennaa afɔleɛ, ná bɛfa ahurusi dwein bɛbɔ ye nnwumaa nwo dawure.

²³Ebiemɔ fale ɛlɛen bɛhɔle ɛpo, na belili dwaa wɔ asue mbiri nemɔ aso.

²⁴Benwuni AWURADE nnwumaa, ye anwanwadeɛ nnwumaa wɔ buma ne anu.

²⁵Ofikyɛ ɔhyɛle mvrama piri maa otuli, na mvrama ne mane ɛpo asorɔkye pagyale.

²⁶Ɔfo hɔle anwuro anwuro, na osa ooguale buma nemɔ anu; edwirɛ bɔ ɔtole bɛ ne ati, b’anwoserɛ tu minini.

²⁷Nzue ne hwene bɛ hɔle faen, né wahwe bɛ wahɔ faen, na bɛnatele fofalifofali kyɛ akɔnomnzafoɛ; b’adwene minini wɔ bɔ wato bɛ ne anwo.

²⁸Yeɛ besu bɛfrɛle AWURADE wɔ b’amaneɛnwunɛ nu, na ɔpepɛ lele bɛ fili b’anwokyere nu.

²⁹Ɔmane mvrama piri ne yɛle konn, na ɛpo asorɔkye ne yɛle dinn.

³⁰Afei ɔyɛle bɛ fɛ kyɛ mvrama ne asorɔkye ne noa abrɛ ase ɔ, na ɔfale bɛ hɔle b’ɛlɛen agyinaleɛ bɔ bɛpena ne anu.

³¹Odi kyɛ bɛye AWURADE ayɛ wɔ ye ɔdɔ bɔ onni ngasi ne ati, wɔ ye anwanwadeɛ bɔ ɔyɔ ma adasa mmaa ne ati.

³²Odi kyɛ bɛkamvo ye wɔ maen nyianu ne anu, ná bɛye ye ayɛ wɔ mbanyi badwa ne anu.

³³Ɔkakyi asue mɔ maa bɛyɛ ɛserɛ, na ɔkakyi mbombonzue mɔ maa bɛyɛ aseɛ wosee,

³⁴ɔkakyi aseɛ bɔ ɔkye aleɛ ɔ maa ɔyɛ ɛgyɛhyerɛ, ɔnate aseɛ ne aso ama bɛ bɔne ti.

³⁵Ɔkakyi ɛserɛ maa ɔyɛ ɛkwaa, ɔkakyi aseɛ wosee maa ɔyɛ mbombonzue.

³⁶Na berɛ yeɛ ɔma bɛ bɔ ɛhɔen ku bɛ ne bɛtena ɔ, na bɛkyekye kuro bɛtena so;

³⁷bɛyɔ boo, bedua bobe, na benya fieso aleɛ pee.

³⁸Oyira bɛ maa bɛta pee, na ɔmma bɛ nyɛmmoa mɔ bɛ somaa so nde.

³⁹Bɛ somaa so te, na bedi bɛ so ngonim, ɔnate nhyɛsoɛ, amaneɛ ne aworabɔlɛ ti.

⁴⁰Obu atitirefoɛ animtia, na ɔmaa bekyinikyini wɔ ɛserɛ so bɔ atee ɔnne so ɔ so.

⁴¹Nakoso ɔma bɛ bɔ bɛyɛ anwumvo ɔ so fi amaneɛ nu, na ɔma bɛ mmusua yɛ pee kyɛ mmoaen kure.

⁴²Teneneefoɛ nwu ye, na bɛ nye gye; na amumuyɛɛ amukoraa bɛkã bɛ noa bɛto nu.

⁴³Ebiala bɔ ɔse nworɛ ne, odi kyɛ ɔdwene sɔ edwirɛ hemɔ anwo, odi kyɛ ɔdwene AWURADE ɔdɔ bɔ onni ngasi ne anwo yee.