Read Sehwi Edwein 115 Bible Online

Edwein 115 - Sehwi bible

Edwein 115

¹Ao AWURADE, nna yɛ, nna yɛ, na mmom wɔ dumaa yeɛ ɔfata animnyam ɔ, ɔnate wɔ ɔdɔ bɔ onni ngasi ne, ɔne wɔ nahorɛlilɛ ne ati.

²Nzu ati yeɛ odi kyɛ maen maen bɛkã kyɛ, “Bɛ Nyameɛ ne, ɔwɔ nisua?” ɔ.

³Nahorɛ nu, yɛ Nyameɛ ne ɔwɔ anwuro, na bɔ okuro biala yeɛ ɔyɔ ɔ.

⁴ Bɛ mmosoen nemɔ te ɛdwetɛ ne esikaa kɔkorɛ, bɛte mmenia sa noa adwuma.

⁵Bele noa, nakoso bɛngora dwudwo, bele anyeɛ, nakoso bennwu nikye.

⁶Bele asoɛ, nakoso bɛnde dwirɛ, bele bonyi, nakoso bɛnde pambaen.

⁷Bele asaa, nakoso bɛngora bɛnzɔ nikyee nu; bele agyirɛ, nakoso bɛngora nate, yeɛ bɛngora bɛmva bɛ komvi bendwudwo.

⁸Bɛ bɔ bɛyɔ mmosoen nemɔ ne, bɛte kyɛ mmosoen nemɔ ala; na ebiala bɔ ɔfa ye wora wura mmosoen nemɔ anu ne, ɔte kyɛ mmosoen nemɔ ala.

⁹Ao Yisrael, fa wɔ wora wura AWURADE nu! Ye yeɛ ɔte wɔ bokafoɛ ne w’akokyɛm ɔ.

¹⁰Ao Aarɔn awuro ama, ɛ́mɔfa ɛmɔ wora béwura AWURADE nu! Ye yeɛ ɔte ɛmɔ bokafoɛ ne ɛmɔ akokyɛm ɔ.

¹¹Ɛmɔ bɔ ɛmɔsuro AWURADE ne, ɛ́mɔfa ɛmɔ wora béwura AWURADE nu! Ye yeɛ ɔte ɛmɔ bokafoɛ ne ɛmɔ akokyɛm ɔ.

¹²AWURADE nye wɔ yɛ so, okoyira yɛ; okoyira Yisrael awuro ama, okoyira Aarɔn awuro ama;

¹³okoyira bɛ bɔ besuro AWURADE ɔ, kwahweabaa mɔ ne atitire mɔ.

¹⁴AWURADE kɔma ɛmɔ kɔta pee, ɛmɔ ne ɛmɔ bosofoɛ mɔ.

¹⁵AWURADE bɔ ɔbɔle anwuro ne aseɛ ne, óyira ɛmɔ.

¹⁶Anwuro te Nyameɛ ye deɛ, nakoso aseɛ de, wafa wama adasa mmaa.

¹⁷Awufoɛ bɛnye AWURADE ayɛ, yeɛ bɛ bɔ bɛkɔ ɛborɔ dɔ konn nu ne, bɛ koso bɛnye ye ayɛ.

¹⁸Nakoso yɛ de, yɛkɔkamvo AWURADE, ofi ɛnɛ kodwu afebɔɔ. Ɛ́mɔye AWURADE ayɛ!