Read Sehwi Edwein 116 Bible Online

Edwein 116 - Sehwi bible

Edwein 116

¹Mekuro AWURADE dwirɛ, ofikyɛ watie me mbaeɛ ne me sufrɛ.

²Wayɛ asoɛ watie me, yiti ngosu ngɔfrɛ ye wɔ mmerɛ bɔ nde ngoa nu ɔ.

³Ewue nyamaa brabrale me. Ɛborɔ dɔ yealɛ sɔle me nu; nwuni amaneɛ ne aworabɔlɛ.

⁴Yeɛ nzu mvrɛle AWURADE dumaa kyɛ, “Ao AWURADE, mesrɛ wɔ, pepɛ de me kra.”

⁵AWURADE do sona, ná ɔtengyɛ; amba, yɛ Nyameɛ se anwumvoin.

⁶AWURADE bɔ awiɛmvoɛ nwo waen; mmerɛ bɔ ngɔle amaneɛ nu ne, ɔpepɛ lele me.

⁷Ao me kra, sa kɔ nekaa bɔ ede wɔ nwome ne, ofikyɛ AWURADE alo wɔ paa.

⁸Apepɛ ale me kra afi ewue nu, akyikyi me nye moen, na amma manzoti.

⁹Ngɔnate AWURADE nyunu wɔ ateasefoɛ aseɛ ye aso.

¹⁰ Male mali, mmerɛ bɔ ngane kyɛ, “Nwɔ amaneɛ nu paa” ne po.

¹¹Nne ahunundetelɛ ngane kyɛ, “Kuro sona biala te ngondomboniɛ.”

¹²Ɛlolɛ amukoraa bɔ AWURADE alo me ye, nzikyɛ yeɛ me wora ngɔyɔ ngɔma ye ɔ?

¹³Ngɔma ngoalelɛ kulie ne aso, ná mabɔ AWURADE dumaa masɔne ye.

¹⁴Ngotua m’aboadeɛ ngɔma AWURADE, wɔ ye mmenia amukoraa bɛ nyunu.

¹⁵AWURADE ye teneneefoɛ bɛ wue, odi mu wɔ ye nyunu.

¹⁶Ao AWURADE, nde wɔ somvoɛ, nde wɔ somvoɛ, w’afaneɛ awa ole me. Asangye nyamaa bɔ wakyekye me ne.

¹⁷Ngɔbɔ asennaa afɔleɛ ngɔma wɔ, ná masu mafrɛ AWURADE dumaa.

¹⁸Ngotua m’aboadeɛ ngɔma AWURADE, wɔ ye mmenia amukoraa bɛ nyunu,

¹⁹wɔ AWURADE awuro n’aluo berɛ, wɔ w’afia, ao Yerusalem. Ɛ́mɔye AWURADE ayɛ!