Read Sehwi Edwein 118 Bible Online

Edwein 118 - Sehwi bible

Edwein 118

¹Ao, ɛmɔla AWURADE ase, ofikyɛ ɔte paa, na ye ɔdɔ bɔ onni ngasi ne, ɔwɔ berɛ afebɔɔ!

²Odi kyɛ Yisrael kã kyɛ, “Ye ɔdɔ bɔ onni ngasi ne, ɔwɔ berɛ afebɔɔ!”

³Odi kyɛ Aarɔn awuro ama bɛkã kyɛ, “Ye ɔdɔ bɔ onni ngasi ne, ɔwɔ berɛ afebɔɔ!”

⁴Bɛ bɔ besuro AWURADE ne, odi kyɛ bɛkã kyɛ, “Ye ɔdɔ bɔ onni ngasi ne, ɔwɔ berɛ afebɔɔ!”

⁵M’amaneɛnwunɛ ne anu, nzu mvrɛle AWURADE; AWURADE buale me, na ɔyele me fili nu.

⁶ AWURADE gyi me si, yiti menzuro, nzikyɛ yeɛ sona kɔhora kɔfa kɔyɔ me ɔ?

⁷AWURADE gyi me si kyɛ ɔboka me, na ngonwu bɔ mepena kyɛ ɔto me pɔfoɛ mɔ ɔ.

⁸Ɔte paa kyɛ ɛkɔfa wɔ nwo kɔto AWURADE so tra kyɛ ɛkɔfa wɔ wora kowura sona nu ɔ.

⁹Ɔte paa kyɛ ɛkɔfa wɔ nwo kɔto AWURADE so tra kyɛ ɛkɔfa wɔ wora kowura ahemvo mɔ nu ɔ.

¹⁰Maen maen amukoraa bɛpɛle me nwo beyiale, nakoso AWURADE dumaa nu ti, ngane bɛ nguale!

¹¹Bɛpɛle me nwo beyiale, amba, bɛpɛle me nwo beyiale, nakoso AWURADE dumaa nu ti, ngane bɛ nguale!

¹²Bɛpɛle me nwo beyiale kyɛ ɛwommaa, nakoso benuane kyɛ mmowue see, ofikyɛ AWURADE dumaa nu ti, ngane bɛ nguale!

¹³Besumuni me serɛserɛ paa bɔ ahaa mete metɔ ɔ, nakoso AWURADE bokale me.

¹⁴AWURADE te m’anwoserɛ ne me dwein, na ɔte me ngoadefoɛ.

¹⁵Esebɔlɛ ne ngonim dwein bɛgyegye wɔ teneneefoɛ ɛtena sua mɔ nu kyɛ, “AWURADE sa famaa ne di ngonim;

¹⁶AWURADE ama ye sa famaa ne aso, AWURADE sa famaa ne di ngonim.”

¹⁷Mengowu, na mmom ngɔtena ngoa nu, ná mabɔ bɔ AWURADE ayɔ ɔ nwo dawure.

¹⁸AWURADE ahwe me so paa, nakoso wamva me wanwura ewue sa.

¹⁹Ɛ́mɔbukyebukye tenenee anoa mbiri nemɔ bɛ́ma me maa mva nu ngɔmva ayɛyelɛ mma AWURADE.

²⁰AWURADE anoa piri ne ɛhe, teneneefoɛ kowura nu.

²¹Meda wɔ ase kyɛ abua me, ná ɛte me ngoadefoɛ ɔ.

²² Nyɔboɛ bɔ suasilɛfoɛ bɛpole ye ne, ye ala yeɛ waayɛ sua ne ndweasoɛ nyɔboɛ titire ɔ.

²³AWURADE yeɛ wayɔ ɛhe ɔ, na ɔyɛ nwanwa wɔ yɛ nye so.

²⁴Ɛnɛ ole kyẽa bɔ AWURADE wahyehyɛ ne, ɛ́mɔma yɛli ahurusi ná yɛ́ma yɛ nye gye wɔ nu.

²⁵Ao AWURADE, yɛsrɛ wɔ, pepɛ de yɛ! Ao AWURADE, yɛsrɛ wɔ, maa yɛnya ngɔsoɛ!

²⁶ Saleɛ hã bɔ ɔ́ba wɔ AWURADE dumaa nu ne, yɛwɔ AWURADE awuro wa yeɛ yɛyira wɔ ɔ.

²⁷AWURADE te Nyameɛ, na wama kanea ata ama yɛ. Ɛ́mɔfa ɛberɛ bɛ́pɛ aluoluefoɛ nemɔ anwo beyia maa oodwu afɔleɛ bokyea mmɛen nemɔ anwo.

²⁸Wɔ yeɛ ɛte me Nyameɛ ɔ, ngɔye wɔ ayɛ; wɔ yeɛ ɛte me Nyameɛ, ngɔpagya wɔ.

²⁹Ao, ɛmɔla AWURADE ase, ofikyɛ ɔte paa, na ye ɔdɔ bɔ onni ngasi ne, ɔwɔ berɛ afebɔɔ.