Read Sehwi Edwein 119 Bible Online

Edwein 119 - Sehwi bible

Edwein 119

¹Bɛ bɔ bɛ bra te sannwuu, ná bedi AWURADE mmeraa so ne, benya saleɛ.

²Bɛ bɔ bedi ye noa dwirɛ so, ná bɛfa b’ahone amukoraa bedi ye si ne, benya saleɛ.

³Afei koso bɛnyɔ mvomsoɛ, na mmom bɛnate ye atee so.

⁴Afa wɔ nhyehyɛleɛ ayɛ ahyɛdeɛ, kyɛ yɛli so nahorɛ nu.

⁵Ao, ahaa né me bra atengyɛ fɔngɔnn, bɔ medi w’ahyɛdeɛ so ɔ!

⁶Ɔba ye sɔ a, me nyunu ngogua ase, ofikyɛ me nye wɔ wɔ mmeraa dwirɛ ne amukoraa so.

⁷Sɛ mesua wɔ tenenee nhyehyɛleɛ ne a, ngɔfa ahone bɔ nu te sannwuu ɔ ngɔye wɔ ayɛ.

⁸Ngoli w’ahyɛdeɛ so, ao, nnɛpo me korakora.

⁹Ɔkɔyɛ sɛɛ né aberandeɛ ama ye bra ayɛ sannwuu? Sana ɔnea wɔ dwirɛ ne aso ɔbɔ ye bra.

¹⁰Ngɔfa m’ahone amukoraa ngoli wɔ si; nnɛmaa medi wɔ mmeraa dwirɛ ne anwo makyebu.

¹¹Mafa wɔ dwirɛ ne masie me ti anu, amaa ɔnate so manyɔ bɔne mandia wɔ.

¹²Ao AWURADE, yɛye wɔ ayɛ, kyirekyire me w’ahyɛdeɛ ne.

¹³Mepakye nu mefa me noa mebɔ wɔ noa nu nhyehyɛleɛ amukoraa nwo dawure.

¹⁴Me nye gye kyɛ ngoli wɔ noa dwirɛ so tra anwonyadeɛ amukoraa.

¹⁵Ngɔdwene wɔ nhyehyɛleɛ anwo, ná mama me nye awa wɔ atee nemɔ aso.

¹⁶Ngɔma me nye kɔgye w’ahyɛdeɛ nwo, na mengɔma me wora ngofi wɔ dwirɛ ne.

¹⁷Do wɔ somvoɛ paa, amaa ɔnate so matena ngoa nu mali wɔ dwirɛ ne aso.

¹⁸Bukye me nye maa nwu anwanwadeɛ wɔ wɔ mmeraa ne anu.

¹⁹Nde ɛwɔfoɛ wɔ aseɛ ye aso, nnɛfa wɔ mmeraa dwirɛ ne fea me.

²⁰Me kra ngora tena, na ye wora dɔ wɔ nhyehyɛleɛ ne mmerɛ biala.

²¹Anwomasoɛfoɛ bɔ banoma bɛ, bɔ bedi wɔ mmeraa dwirɛ nwo makyebu ne, etwi bɛ nyunu.

²²Nnɛmaa bɛgoro me nwo, yeɛ nnɛmaa begua me nyunu ase, ofikyɛ mali wɔ noa dwirɛ so.

²³Ɔwɔ nu kyɛ ahemvo bɛtena ase bɛbɔ me ti so porɛ, nakoso wɔ somvoɛ kɔdwene w’ahyɛdeɛ nwo.

²⁴Wɔ noa dwirɛ yeɛ me nye gye ye nwo ɔ, na ɔte me foɛtulɛfoɛ.

²⁵Me kra la mvuture nu pakayaa, maa nya ngoa kyɛbɔ wɔ dwirɛ ne kyire ne.

²⁶Ngane m’atee bɔ nnate so nwo dwirɛ ne, ɛmane me mmuayɛɛ; kyirekyire me w’ahyɛdeɛ ne.

²⁷Maa nde w’ahyɛdeɛ atee ne abo, na ngɔbɔ w’anwanwadeɛ nnwumaa ne anwo dawure.

²⁸Aworabɔlɛ ama me kra aboto; hyɛ me nguraen kyɛbɔ wɔ dwirɛ ne te ɔ.

²⁹Ye ngondombo bra fi me so kɔ, ná fa wɔ mmeraa ne do me.

³⁰Maneanea nu maye nahorɛlilɛ atee ne, na mafa wɔ nhyehyɛleɛ masie me nye so.

³¹Mafa me nwo mamata wɔ noa dwirɛ ne, ao AWURADE, nnɛma me nyunu gua ase.

³²Ngɔfa wɔ mmeraa dwirɛ atee ne aso wɔ anwokekanɛ nu, ofikyɛ ɛtrɛ me nimdeɛ nu.

³³Ao AWURADE, kyirekyire me w’ahyɛdeɛ atee ne, na ngoli so ngoodwu ye bo.

³⁴Ma me nimdeɛ, amaa ɔnate so mali wɔ mmeraa ne aso, na ngɔfa m’ahone amukoraa ngoli so.

³⁵Di me nyunu fa me fa wɔ mmeraa dwirɛ atee ne aso, ofikyɛ me nye gye ye nwo.

³⁶Ma m’ahone ooli wɔ noa dwirɛ si, na nnɛmaa okodi anyeboroborolɛ si.

³⁷Nningyein bɔ mvasoɛ nne so ne, ye me nye fi bɛ nealɛ so, maa nya ngoa wɔ w’atee ne aso.

³⁸Ma wɔ bɔhyɛ ne, ɔbra nu ma w’akoaa bɔ watu ye nwo wasie berɛ osuro wɔ ne.

³⁹Animguaseɛ bɔ mesuro ne, pa gua ma me, ofikyɛ wɔ nhyehyɛleɛ te paa.

⁴⁰Amba, me wora adɔ wɔ mmeraa ne; gyina wɔ tenenee ne aso maa nya ngoa.

⁴¹Ao AWURADE, wɔ ɔdɔ bɔ onni ngasi ne, ye ye ali kyire me, yeɛ wɔ ngoalelɛ ne, kyɛbɔ wɔ bɔhyɛ te ɔ,

⁴²amaa ɔnate so manya mmuayɛɛ mama bɛ bɔ bɛgoro me nwo ne, ofikyɛ mafa me wora mawura wɔ dwirɛ ne anu.

⁴³Edwirɛ nahorɛ ne hanɛ ne, nnɛmaa ɔbɔ me koraa, ofikyɛ mafa me wora mawura wɔ nhyehyɛleɛ ne anu.

⁴⁴Ngoli wɔ mmeraa ne aso mmerɛ biala maa okoodwu afebɔɔ.

⁴⁵Ngɔnate bɔ hwee nha me ɔ, ofikyɛ mapena w’ahyɛdeɛ ne si atee.

⁴⁶Ngɔhã wɔ noa dwirɛ nwo dwirɛ ngohyire ahemvo mɔ koso, na me nyunu ngogua ase.

⁴⁷Menya anigye wɔ wɔ mmeraa dwirɛ nwo, ofikyɛ ɔla m’ahone.

⁴⁸Mekuro wɔ mmeraa dwirɛ ne, na mefa anidie mema ye, na ngɔdwene w’ahyɛdeɛ ne anwo.

⁴⁹Kaye wɔ dwirɛ bɔ ahã ahyire wɔ somvoɛ ne, bɔ amaa mafa me wora mawura nu ne.

⁵⁰M’amaneɛnwunɛ nu aworakyekyerɛ ole kyɛ, wɔ bɔhyɛ ne maa menya ngoa.

⁵¹Anwomasoɛfoɛ bɛgoro me nwo paa, nakoso menni wɔ mmeraa ne anwo makyebu.

⁵²Ao AWURADE, sɛ medwene wɔ nhyehyɛleɛ bɔ ofi tete ne anwo a, né me wora akyekye.

⁵³Ɔnate bɔnefoɛ bɔ bɛpo wɔ mmeraa ne ati, m’ahone ahu paa.

⁵⁴Awuro bɔ mayɛ ɛwɔfoɛ maatena nu ne, w’ahyɛdeɛ yeɛ ɔte me dwein ɔ.

⁵⁵Ao AWURADE, odwu kɔngɔen a mekaye wɔ dumaa, na medi wɔ mmeraa ne aso.

⁵⁶Ɛhe ayɛ me deɛ, ofikyɛ mali wɔ nhyehyɛleɛ so.

⁵⁷Ao AWURADE wɔ yeɛ ɛte me kyɛfa ɔ; mehyɛ bɔ kyɛ ngoli wɔ dwirɛ ne aso.

⁵⁸Mefa m’ahone amukoraa mesrɛ kyɛ do me; nwu me anwumvoin kyɛbɔ wɔ dwirɛ te ɔ.

⁵⁹Sɛ medwenedwene me bra nwo a, mesa metu agyirɛ mebadi wɔ noa dwirɛ so.

⁶⁰Mema me nwo yɛ nyera, na menyɛ ngyɛkyerɛ kyɛ ngoli wɔ mmeraa dwirɛ so ɔ.

⁶¹Ɔwɔ nu kyɛ bɔnefoɛ nyamaa abrabra me de, nakoso me wora mvi wɔ mmeraa ne.

⁶²Medwɔso abunnamu meda wɔ ase, ɔnate wɔ tenenee nhyehyɛleɛ ne ati.

⁶³Bɛ bɔ besuro wɔ ne, yeɛ bɛ bɔ bedi w’ahyɛdeɛ so ne, nde bɛ mukoraa bɛ biɛngo.

⁶⁴Ao AWURADE, wɔ ɔdɔ bɔ onni ngasi ne, wayi aseɛ ye aso to; kyirekyire me w’ahyɛdeɛ ne.

⁶⁵Ao AWURADE, alo wɔ somvoɛ kyɛbɔ wɔ dwirɛ te ɔ.

⁶⁶Kyirekyire me wɔ ndɛenbualɛ turoloo ne wɔ nimdeɛ ne, ofikyɛ mede wɔ mmeraa dwirɛ ne medi.

⁶⁷Anzana ɛbaahwe me so ne, né mali makyebu, nakoso afei de, medi wɔ dwirɛ so.

⁶⁸Ɛte paa, na ɛyɔ bɔ ɔte paa ɔ, kyirekyire me w’ahyɛdeɛ ne.

⁶⁹Anwomasoɛfoɛ bato me soen, nakoso mefa m’ahone amukoraa medi wɔ nhyehyɛleɛ so.

⁷⁰B’adwene ala kyɛ nguɛ, nakoso me de, me nye gye wɔ mmeraa ne anwo.

⁷¹Ɔte paa ma me kyɛ ɛhwene me so ɔ, amaa ɔnate so masua w’ahyɛdeɛ ne.

⁷²Wɔ noa nu mmeraa te paa ma me tra esikaa kɔkorɛ ne ɛdwetɛ apee apee.

⁷³Wɔ sa yeɛ ɛfa bɔle me ná esiesiele me ɔ; ma me ndeaseɛ maa mva nzua wɔ mmeraa dwirɛ ne.

⁷⁴Bɛ bɔ besuro wɔ ne, bekonwu me bekoli ahurusi, ofikyɛ mafa me wora mawura wɔ dwirɛ ne anu.

⁷⁵Ao AWURADE, mese kyɛ wɔ ndɛenbualɛ te turoloo, na ɛnate nahorɛlilɛ so ahwe me so.

⁷⁶Ma wɔ ɔdɔ bɔ onni ngasi ne ɔkyekye me wora, kyɛbɔ ahyɛ wɔ somvoɛ bɔ ne ala.

⁷⁷Ma w’anwumvoinnwunɛ ne odwu me so maa nya ngoa, ofikyɛ wɔ mmeraa yeɛ ɔte m’anigye ɔ.

⁷⁸Ma anwomasoɛfoɛ bɛ nyunu ogua ase, ofikyɛ bafa kanda nworɛ banwo me bo; nakoso me de, ngɔdwenedwene w’ahyɛdeɛ ne anwo.

⁷⁹Bɛ bɔ besuro wɔ ne, bɛ ne bɛ bɔ bɛse wɔ noa dwirɛ ne, maa bɛfa bɛ nwo bɛɛbɔ me.

⁸⁰Maa m’ahone nu ɔyɛ sannwuu wɔ w’ahyɛdeɛ so lilɛ nwo, amaa ɔnate so me nyunu wangua ase.

⁸¹Me kra wora dɔ wɔ ngoalelɛ ne paa; mefa me wora mewura wɔ dwirɛ ne anu.

⁸²Manea wɔ bɔhyɛ ate alaa ama me nye ayɛ samoo, na mebisa kyɛ, “Kyinzu yeɛ ɛkɔkyekye me wora ɔ?”

⁸³Ofikyɛ mayɛ kyɛ kɔndoa bɔ osinze nwosina nu ɔ, nakoso me wora mvi w’ahyɛdeɛ ne.

⁸⁴Wɔ somvoɛ kɔnwondɛ maa okoodwu kyinzu? Bɛ bɔ bɛtane me nye ne, kyinzu yeɛ ekobua bɛ ndɛen ɔ?

⁸⁵Anwomasoɛfoɛ batutu ngumaa kyɛ ndɔ nu; bɛte mmenia bɔ benni wɔ mmeraa so ɔ.

⁸⁶Wɔ mmeraa dwirɛ ne amukoraa te turoloo. Bɛtane me nye mbaen, yiti boka me!

⁸⁷Bayie me boso nua wɔ aseɛ ye aso, nakoso mmbole wɔ nhyehyɛleɛ ne.

⁸⁸Wɔ ɔdɔ bɔ onni ngasi ne ati, maa nya me ti nnidi nu, amaa ɔnate so mali wɔ noa dwirɛ ne aso.

⁸⁹Ao AWURADE, wɔ dwirɛ ne wɔ berɛ afebɔɔ, ye bo atimu wɔ nyameɛso.

⁹⁰Wɔ nahorɛlilɛ ne wɔ berɛ ma aworɛ ndoatoasoɛ amukoraa; afa aseɛ atimu berɛ, na ogyi berɛ pindinn.

⁹¹Ɔnate wɔ nhyehyɛleɛ ti yeɛ bɛwɔ berɛ ɛnɛ ɔ, ofikyɛ nikyee biala te wɔ somvoɛ.

⁹²Sɛ nna wɔ mmeraa yeɛ me nye gye ye nwo a, ahaa mawu wɔ m’amaneɛnwunɛ nu.

⁹³Me wora ngofi wɔ nhyehyɛleɛ le, ofikyɛ ɔnate so yeɛ amaa manya ngoa ɔ.

⁹⁴Nde wɔ deɛ; pepɛ de me, ofikyɛ medi wɔ nhyehyɛleɛ so.

⁹⁵Bɔnefoɛ bɛtetɛ me bɛpena me beku me, nakoso me de, wɔ noa dwirɛ yeɛ medwenedwene ye nwo ɔ.

⁹⁶Manwu nekaa bɔ pɛpɛɛpɛyɛlɛ amukoraa ye noa kɔpem ɔ, nakoso wɔ mmeraa dwirɛ ne de, nu trɛ paa.

⁹⁷Ao, kyɛbɔ mesi mekuro wɔ mmeraa ne ɔ! Ye nwo yeɛ medwenedwene daa ɔ.

⁹⁸Wɔ mmeraa dwirɛ maa menwu nworɛ metra me pɔfoɛ mɔ, ofikyɛ ɔte me nu daa.

⁹⁹Me nimdeɛ tra bɛ bɔ bekyire me nikyee amukoraa, ofikyɛ wɔ noa dwirɛ nwo yeɛ medwenedwene ɔ.

¹⁰⁰Me nimdeɛ tra mbanyi mɔ, ofikyɛ medi wɔ nhyehyɛleɛ so.

¹⁰¹Metwe me nwo mefi bɔne atee biala so, amaa ɔnate so mali wɔ dwirɛ ne aso.

¹⁰²Nnnili wɔ nhyehyɛleɛ nwo makyebu, ofikyɛ ahyirehyire me.

¹⁰³Wɔ dwirɛ ne, kyɛbɔ osi yɛ me fɛ ɔ! Ɔyɛ me noa nu fɛ tra woɛ!

¹⁰⁴Wɔ nhyehyɛleɛ nu yeɛ menya nimdeɛ ɔ; yiti mekyi ngondombo atee biala.

¹⁰⁵Wɔ dwirɛ ne te me gya bo kanea, yeɛ ɔte hyireinn wɔ m’atee so.

¹⁰⁶Mata ndaen, na ngoli so, kyɛ ngoli wɔ tenenee nhyehyɛleɛ ne aso.

¹⁰⁷Manwu amaneɛ paa; ao AWURADE, maa nya ngoa kyɛbɔ wɔ dwirɛ ne te ɔ.

¹⁰⁸Ao AWURADE, de m’ayɛyelɛ afɔleɛ ne to nu, ná kyirekyire me wɔ nhyehyɛleɛ ne.

¹⁰⁹Ahaa me kra kora yɔ bɔ okuro ɔ daa,[18] nakoso memma me wora mvi wɔ mmeraa ne.

¹¹⁰Bɔnefoɛ basua me ngaen, nakoso menni w’ahyɛdeɛ nwo makyebu.

¹¹¹Wɔ noa dwirɛ ne te m’agyapadeɛ afebɔɔ; na ɔma me anigye wɔ m’ahone nu.

¹¹²Masiesie m’ahone kyɛ ngoli w’ahyɛdeɛ so daa ngoodwu ayieleɛ.

¹¹³Mekyi mmenia bɔ b’adwene yɛ bɛ ndaa ndaa ɔ, nakoso wɔ mmeraa ne de, mekuro.

¹¹⁴Wɔ yeɛ ɛte m’afealeɛ ne m’akokyɛm ɔ; mefa me wora mewura wɔ dwirɛ ne anu.

¹¹⁵Bɔnefoɛ, ɛ́mɔfi me so bɛhɔ maa nni me Nyameɛ mmeraa dwirɛ ne aso.

¹¹⁶Tira me nu kyɛbɔ wɔ bɔhyɛ te ɔ maa nya ngoa; na nnɛmaa me nyunu gua ase wɔ m’anyelasoɛ nu.

¹¹⁷Sɔ me nu ma nya me ti nnidi nu, na daa biala ngoli w’ahyɛdeɛ ne aso.

¹¹⁸Bɛ bɔ bedi w’ahyɛdeɛ nwo makyebu ne, ɛpo bɛ mukoraa, ofikyɛ bɛ nnakannaka ne ɔte mbaen.

¹¹⁹Aseɛ ye aso bɔnefoɛ amukoraa, ebu bɛ kyɛ ewura, yiti me nye gye wɔ noa dwirɛ nwo.

¹²⁰Ɔnate wɔ nwo suronyi ti, me nwonaen wosowoso me, na mesuro wɔ ndɛenbualɛ ne.

¹²¹Mayɔ bɔ ɔtengyɛ ná ɔte nahorɛ ɔ; nnɛyakyi me wura bɛ bɔ bɛhyɛ me so ɔ nemɔ sa.

¹²²Gyina wɔ somvoɛ si maa onya ngɔsoɛ; nnɛma ahandaenfoɛ besisi me.

¹²³Wɔ ngoalelɛ ne wɔ tenenee bɔhyɛ ne, manea bɛ ate alaa ama me nye ayɛ samoo.

¹²⁴Gyina wɔ ɔdɔ bɔ onni ngasi ne aso boka wɔ somvoɛ, ná kyirekyire me w’ahyɛdeɛ ne.

¹²⁵Wɔ somvoɛ ole me; ma me nimdeɛ, amaa ɔnate so manwu wɔ noa dwirɛ ne.

¹²⁶AWURADE, mmerɛ aso kyɛ ɛkɔkekã wɔ nwo ɔ, ofikyɛ babu wɔ mmeraa ne aso.

¹²⁷Amba, me nye gye wɔ mmeraa dwirɛ ne anwo tra esikaa kɔkorɛ, tra esikaa kɔkorɛ paa.

¹²⁸Yiti megyina wɔ dwirɛ so yeɛ mebɔ me bra ɔ; na mekyi ngondombo atee biala.

¹²⁹Wɔ noa dwirɛ ne yɛ nwanwa, yiti yeɛ me kra di so ɔ.

¹³⁰Wɔ dwirɛ nu ngyirekyiremuɛ ma kanea; ɔma sona bɔ ye adwene te kãa ɔ nya nimdeɛ.

¹³¹Mebukye me noa nu metee so, ofikyɛ me wora adɔ wɔ mmeraa dwirɛ ne.

¹³²Pɛne wɔ nye baanea me, ná do me, kyɛbɔ ɛyɔ ma bɛ bɔ bekuro wɔ dumaa dwirɛ ne.

¹³³Gyina wɔ dwirɛ so tutu me gya siesie yé, na nnɛma amumuyɛɛ biala di me so.

¹³⁴Pepɛ de me fi kuro sona nhyɛsoɛ nu, amaa ɔnate so mali wɔ nhyehyɛleɛ so.

¹³⁵Ye w’adom ne ali kyire wɔ somvoɛ, ná kyirekyire me w’ahyɛdeɛ ne.

¹³⁶Mebɔ me nye a, ɛmoen ngome tatatata, ofikyɛ mmenia nni wɔ mmeraa ne aso.

¹³⁷Ao AWURADE, ɛtengyɛ, na wɔ ndɛenbualɛ te turoloo.

¹³⁸Tenenee nu ne nahorɛlilɛ amukoraa nu yeɛ ahyehyɛ wɔ noa dwirɛ ɔ.

¹³⁹Me mmɔdenbɔlɛ ogye wɔ me nu kyɛ see, ofikyɛ me pɔfoɛ mɔ wora afi wɔ dwirɛ ne.

¹⁴⁰Wɔ dwirɛ ne, efiɛ biala nne ye nwo, yiti wɔ somvoɛ nye gye ye nwo.

¹⁴¹Nde kãa, yeɛ mmenia mmu me, nakoso memma me wora mvi wɔ nhyehyɛleɛ ne.

¹⁴²Wɔ tenenee ne, ɔte tenenee afebɔɔ, na wɔ mmeraa yeɛ ɔte nahorɛ ɔ.

¹⁴³Amaneɛ ne ahunundetelɛ atɔ me so, nakoso wɔ mmeraa dwirɛ yeɛ ɔma me anika ɔ.

¹⁴⁴Wɔ noa dwirɛ te tenenee daa; ma me nimdeɛ, amaa ɔnate so manya ngoa.

¹⁴⁵Mefa m’ahone amukoraa mesu; ao AWURADE, bua me, ngoli w’ahyɛdeɛ so.

¹⁴⁶Mesu mefrɛ wɔ; pepɛ de me, amaa ɔnate so mali w’ahyɛdeɛ so.

¹⁴⁷Mepɛ aleɛ medwɔso mesu mepena mmokalɛ; mefa me wora mewura wɔ dwirɛ ne anu.

¹⁴⁸Me nye gua so kɔngɔen amukoraa, na ɔnate so medwenedwene wɔ dwirɛ ne anwo.

¹⁴⁹Gyina wɔ ɔdɔ bɔ onni ngasi ne aso tie me mbaeɛ; ao AWURADE, bɔ me ngoa nwo waen kyɛbɔ wɔ ndɛenbualɛ turoloo ne te ɔ.

¹⁵⁰Bɛ bɔ bedi bɔne asi ne, bɛtwe bepingye; bɛ ne wɔ mmeraa afia atee wale.

¹⁵¹Nakoso AWURADE, wɔ, epingye, na wɔ mmeraa dwirɛ amukoraa te nahorɛ.

¹⁵²Nzua mvili wɔ noa dwirɛ ne anu dadadada, kyɛ afa ahyɛdeɛ ne atimu berɛ afebɔɔ.

¹⁵³Nea m’amaneɛ bɔ menwu ye ɔ, ná pepɛ de me, ofikyɛ memma me wora mvi wɔ mmeraa ne.

¹⁵⁴Di me dwirɛ ma me, ná pepɛ de me; ma me ngoa kyɛbɔ wɔ dwirɛ ne te ɔ.

¹⁵⁵Bɔnefoɛ bɛ ne ngoalelɛ b’afia atee wale, ofikyɛ bɛmbena w’ahyɛdeɛ si atee.

¹⁵⁶Ao AWURADE, w’anwumvoinnwunɛ ne te piri; maa nya ngoa kyɛbɔ wɔ ndɛenbualɛ turoloo ne te ɔ.

¹⁵⁷Bɛ bɔ bɛtane me nye, ɔne bɛ bɔ bɛpɔ me ne, bɛsone, nakoso menni wɔ noa dwirɛ nwo makyebu.

¹⁵⁸Menwu bɛ bɔ benni wɔ dwirɛ ne aso ne a, né bɛ nwo yɛ me ahi, ofikyɛ benni wɔ mmeraa so.

¹⁵⁹Ao AWURADE, nea kyɛbɔ me nye si gye w’ahyɛdeɛ nwo ɔ! Bɔ me ngoa nwo waen kyɛbɔ wɔ ɔdɔ bɔ onni ngasi ne si te ɔ.

¹⁶⁰Wɔ dwirɛ te nahorɛ fi tetetete, wɔ tenenee nhyehyɛleɛ ne anu biala wɔ berɛ afebɔɔ.

¹⁶¹Maen mbanyi bɛtane me nye mbaen, nakoso mesuro kyɛ mengotie wɔ dwirɛ ɔ.

¹⁶²Medi ahurusi wɔ wɔ dwirɛ ne anwo, kyɛ ebie bɔ wanya koɛ nu nzesadeɛ pee ɔ.

¹⁶³Mekyi ngondombo, mepɔ ye, nakoso me nye gye wɔ mmeraa nwo.

¹⁶⁴Ɛlɛho biala, meye w’ayɛ pɛen nzoo, ɔnate wɔ tenenee nhyehyɛleɛ ne ati.

¹⁶⁵Bɛ bɔ bɛ nye gye wɔ mmeraa nwo ne, benya asomdwee kandinga; hwee ngɔtoatoa bɛ gya nu.

¹⁶⁶Ao AWURADE, menea wɔ ngoalelɛ ate, na medi wɔ mmeraa dwirɛ so.

¹⁶⁷Me kra di wɔ noa dwirɛ so, me nye gye ye nwo paa.

¹⁶⁸Medi w’ahyɛdeɛ ne wɔ noa dwirɛ so, ofikyɛ m’atee amukoraa la wɔ nyunu.

¹⁶⁹Ao AWURADE, ma me sufrɛ odwu wɔ nyunu, ma me nimdeɛ kyɛbɔ wɔ dwirɛ te ɔ.

¹⁷⁰Ma me mbaeɛ oodwu wɔ nyunu; pepɛ de me kyɛbɔ wɔ dwirɛ te ɔ.

¹⁷¹Me noa kɔhã ayɛyelɛ dwirɛ, ofikyɛ ekyirekyire me w’ahyɛdeɛ ne.

¹⁷²Me temverema kɔto wɔ dwirɛ nwo dwein, ofikyɛ wɔ mmeraa dwirɛ amukoraa tengyɛ.

¹⁷³Ma wɔ tumi ne ɔɔboka me, ofikyɛ w’ahyɛdeɛ yeɛ maneanea nu mafa ɔ.

¹⁷⁴Ao AWURADE, me wora adɔ wɔ ngoalelɛ ne, ofikyɛ wɔ mmeraa yeɛ ɔte m’anigye ɔ.

¹⁷⁵Ma me kra ɔtena ngoa nu ná ɔye wɔ ayɛ, ná ma wɔ nhyehyɛleɛ ne ɔboka me.

¹⁷⁶Mali makyebu kyɛ boaen bɔ wamini ɔ; pena wɔ somvoɛ, ofikyɛ memma me wora mvi wɔ mmeraa dwirɛ ne.