Read Sehwi Edwein 138 Bible Online

Edwein 138 - Sehwi bible

Edwein 138

¹Dawide dwein Ao AWURADE, ngɔfa m’ahone amukoraa ngɔla wɔ ase; nyameɛ mɔ anyunu yeɛ meto wɔ nwo ayɛyelɛ dwein ɔ.

²Mebɔ me nu ase mefa me nye mekyire w’asɔneyɛɛ sua krongron ne, na mefa asennaa mema wɔ dumaa, ɔnate wɔ ɔdɔ bɔ onni ngasi ne wɔ nahorɛlilɛ ne ati; ofikyɛ apagya wɔ dumaa ne wɔ dwirɛ maa batra nikyee biala.[20]

³Kyẽa bɔ nzu mvrɛle wɔ ne, etiele me sufrɛ, na ɛmane me kra hɔle so nyane anwoserɛ.

⁴Ao AWURADE, aseɛ ye aso ahemvo amukoraa kɔye wɔ ayɛ, ofikyɛ bate wɔ noa nu dwirɛ.

⁵Amba, bɛkɔto AWURADE atee mɔ nwo dwein, ofikyɛ AWURADE animnyam te piri.

⁶Ofikyɛ ɔwɔ nu kyɛ AWURADE wɔ anwuro anwuro de, nakoso ɔdo anwobrɛaseɛfoɛ; na anwomasoɛfoɛ de, ɔbrɛ bɛ ase fi dedeede.

⁷Ɔwɔ nu kyɛ mefa amaneɛ nu de, nakoso ɛbɔ me ngoa nwo waen. Ɛtengyɛ wɔ sa fa tia me pɔfoɛ mɔ b’ɛyaafɛlɛ, na wɔ sa famaa ne yeɛ ɔpepɛ de me ɔ.

⁸AWURADE kɔma bɔ wahyehyɛ wafa me nwo ne kɔwa nu; ao AWURADE, wɔ ɔdɔ bɔ onni ngasi ne, ɔwɔ berɛ afebɔɔ: nnɛpo wɔ sa noa nnwumaa.