Read Sehwi Edwein 140 Bible Online

Edwein 140 - Sehwi bible

Edwein 140

¹Dawide dwein. Ɔfa mane edweinhyirelɛniɛ ne Ao AWURADE, pepɛ de me fi bɔnefoɛ sa nu, bɔ me nwo waen fi patapaafoɛ nwo,

²bɛ bɔ bɛbɔ porɛ tɛɛ wɔ bɛ ti anu, ná bɛtwetwe koɛ bɛba daa ɔ.

³Basi bɛ gye nnaennaen kyɛ ewoo deɛ, na ɛbɔnaa borɔ yeɛ ɔwɔ bɛ noa nu ɔ. Sela

⁴Ao AWURADE, nea me so ye me fi bɔnefoɛ sa nu; patapaafoɛ bɔ bɛpena m’asefinɛ ne, bɔ me nwo waen fi bɛ nwo.

⁵Anwomasoɛfoɛ basua me ngaen bafea, na bafa nyamaa bayɛ ɛtɛen, basunzua me kafoli wɔ atee noa. Sela

⁶Nzele AWURADE kyɛ, “Wɔ yeɛ ɛte me Nyameɛ ɔ; ao AWURADE, yɛ asoɛ tie me sufrɛ.”

⁷Ao AWURADE, me Mene, me Defoɛ anwoserɛniɛ, ɛfa akokyɛm wura me ti wɔ koɛ kyẽa.

⁸Ao AWURADE, nnɛyɔ bɔnefoɛ b’apɛdeɛ ma bɛ; nnɛmaa bɛ porɛ tɛɛ ne ɔba nu ná banhoahoa bɛ nwo. Sela

⁹Bɛ bɔ bapɛ me nwo bayia ne, bamoma bɛ nwo so; ma bɛ noa nu musue dwirɛ ne ɔbɔ bɛ ti so!

¹⁰Ma see gonn ogua bɛ so! Maa befindi bɛ begua see nu, kumaa kuronn nu bɔ bengodwɔso ko ɔ!

¹¹Sona bɔ ɔkekã mmenia nwo dwirɛ ne, nnɛma oyie ye yé wɔ aseɛ ne aso, ma musue oli patapaaniɛ si yerɛlɛlɛlɛ!

¹²Mese kyɛ AWURADE di bɛ bɔ bɛyɛ anwumvo ɔ bɛ dwirɛ ma bɛ, na obua ndɛen turoloo ma ehiafoɛ.

¹³Amba, teneneefoɛ kɔla wɔ dumaa ase, na bɛ bɔ bɛ bra te sannwuu ne, bɛkɔtena wɔ nyunu.