Read Sehwi Edwein 145 Bible Online

Edwein 145 - Sehwi bible

Edwein 145

¹Dawide ayɛyelɛ dwein Me Nyameɛ ne me Hene, ngɔkamvo wɔ, na ngɔhyɛ wɔ dumaa animnyam afebɔɔ.

²Daa biala ngɔhyɛ wɔ animnyam, na ngɔye wɔ dumaa ayɛ afebɔɔ.

³AWURADE te piri, na ɔfata ayɛyelɛ piri paa; ye piri ne bo sona ndeaseɛ so.

⁴Aworɛ ndoatoasoɛ ko kɔkamvo wɔ nnwumaa kohyire aworɛ ndoatoasoɛ foforɛ, ná wabɔ wɔ nnwumaa mbiri mbiri ne anwo dawure.

⁵W’ahennie animnyam bɔ ɔta hyireinn ne w’anwanwadeɛ nemɔ, bɛ yeɛ medwenedwene bɛ nwo ɔ.

⁶Wɔ nnwumaa suronyisuronyi ne, wɔ tumi ne, mmenia kɔbɔ ye nwo dawure, na ngɔfa kyɛbɔ esi te piri ɔ ngɔto dwaa.

⁷Wɔ paayɛlɛ piri nwo ngayeɛ ne, bɛkɔbɔ ye nwo dawure, na bɛkɔto wɔ tenenee nwo dwein.

⁸AWURADE do mmenia, na ɔse anwumvoin; ye ahone nhu ndɛ, na ye ɔdɔ bɔ onni ngasi ne, ɔsone.

⁹AWURADE te paa ma sona biala, na ye anwumvoinnwunɛ ne, ɔkata ye nnwumaa mukoraa so.

¹⁰Ao AWURADE, wɔ sa noa nnwumaa amukoraa bɛda wɔ ase, yeɛ w’anwoteefoɛ amukoraa bɛye wɔ ayɛ.

¹¹Bɛka w’ahennie nwo animnyam nwo dwirɛ, na bɛkã wɔ tumi ne anwo dwirɛ,

¹²kyɛ bɛkɔma adasa mmaa bekonwu wɔ nnwumaa mbiri mbiri nemɔ, ɔne w’ahennie animnyam hyireinn ne.

¹³W’ahennie ne te daa ahennie, na wɔ tumi ne wɔ berɛ wɔ aworɛ ndoatoasoɛ amukoraa nu. [AWURADE di nahorɛ wɔ ye dwirɛ amukoraa nu, na onwu anwumvoin wɔ nikyee biala bɔ ɔyɔ ɔ nu].[22]

¹⁴AWURADE sɔ bɛ bɔ bɛtete begua ɔ amukoraa nu, na ɔma bɛ bɔ baboto ɔ so.

¹⁵Mmenia amukoraa bɛ nye la wɔ so, na ɛma bɛ bɛ noa aleɛ mmerɛ bɔ ɔsɛ ɔ nu.

¹⁶Ebukye wɔ sa nu, na ɛma teasefoɛ amukoraa benya bɔ bɛpena ɔ.

¹⁷AWURADE tengyɛ wɔ bɔ ɔyɔ ɔ amukoraa nu, na ɔte krongron wɔ ye nnwumaa amukoraa nu.

¹⁸AWURADE pingye bɛ bɔ besu bɛfrɛ ye ɔ amukoraa, amba, bɛ bɔ besu bɛfrɛ ye nahorɛ nu amukoraa.

¹⁹Ɔyɔ bɛ bɔ besuro ye ɔ b’apɛdeɛ ma bɛ; afei koso otie bɛ sufrɛ, na ɔpepɛ de bɛ.

²⁰AWURADE bɔ bɛ bɔ bekuro ye dwirɛ ɔ amukoraa nwo waen, nakoso bɔnefoɛ de, okohũhũ bɛ.

²¹Me noa kɔhã AWURADE nwo ayɛyelɛ dwirɛ, odi kyɛ abɔdeɛ amukoraa bɛye ye dumaa krongron ne ayɛ afebɔɔ.