Read Sehwi Edwein 148 Bible Online

Edwein 148 - Sehwi bible

Edwein 148

¹Ɛ́mɔye AWURADE ayɛ! Ɛ́mɔye AWURADE ayɛ béfi anwuro dɔ. Ɛ́mɔye ye ayɛ wɔ anwuro dɔ!

²Ye abɔfo mɔ amukoraa, ɛ́mɔye ye ayɛ; ye koɛhonɛfoɛ amukoraa, ɛ́mɔye ye ayɛ!

³Eyia ne ɛsraen, ɛ́mɔye ye ayɛ; nzramaa mɔ bɔ bɛta amukoraa, ɛ́mɔye ye ayɛ!

⁴Ɛmɔ, nyameɛso anwuro anwuro, ɛ́mɔye ye ayɛ, yeɛ ɛmɔ, nzue nzue bɔ ɛmɔwɔ ewienu anwuro ɔ, ɛmɔ koso sɔ ala.

⁵Odi kyɛ bɛye AWURADE dumaa ayɛ, ofikyɛ ye ahyɛdeɛ ne yeɛ ɔfa bɔle bɛ ɔ.

⁶Ɔfale bɛ tindimuni berɛ afebɔɔ; na ɔmane bɛ ahyɛdeɛ bɔ ɔngɔpɛ nu le ɔ.[23]

⁷Ɛ́mɔye AWURADE ayɛ béfi aseɛ ye aso: ɛmɔ, ɛpo nu ngaka mbiri ne buma amukoraa,

⁸see ne asukɔtwea nyɔboɛ, asukɔtwea ne ɛborɔ, mvrama bɔ otu serɛserɛ di Nyameɛ ahyɛdeɛ so ɔ,

⁹mmokaa ne pambaa amukoraa, mmakaa bɔ besu ne sida amukoraa,

¹⁰eburo ngaka ne nyɛmmoa amukoraa, ngaka bɔ bɛkongo ne nnomaa bɔ betu ɔ,

¹¹aseɛ ye aso ahemvo ne maen maen amukoraa, atitire ne aseɛ ye aso maenbulɛfoɛ amukoraa,

¹²mmerandeɛ ne ndaluwa mɔ, mbanyi ne ngwadaa!

¹³Odi kyɛ bɛye AWURADE dumaa ne ayɛ, ofikyɛ ye ngome yeɛ ye dumaa te piri ɔ; ye animnyam trɛ ɔbo aseɛ ne nyameɛso so.

¹⁴Wama ye maen anya anwoserɛ, amaa ɔnate so ye anwoteefoɛ amukoraa baye ye ayɛ, Yisraelfoɛ bɔ bɛ yeɛ bɛte mmenia bɔ bepingye ye ne. Ɛ́mɔye AWURADE ayɛ!