Read Sehwi Edwein 16 Bible Online

Edwein 16 - Sehwi bible

Edwein 16

¹Dawide dwein Ao Nyameɛ, bɔ me nwo waen, ofikyɛ wɔ nu yeɛ menwati mebafea ɔ.

²Meka mekyire AWURADE kyɛ, “Wɔ yeɛ ɛte me Mene ɔ; nnne nikye paa biala, sana wɔ ngome.”

³Krongronfoɛ bɔ bɛwɔ aseɛ ne aso ne, bɛ yeɛ bele animnyam ɔ, ná bɛ nu yeɛ m’anigye amukoraa wɔ ɔ.

⁴Bɛ bɔ bɛso nyameɛ foforɛ mɔ ne de, bɛtwetwe aworabɔlɛ pee bɛbrɛ bɛ nwo; mengɔbɔ mogya anonneɛ afɔleɛ mengɔma sɔ nyameɛ foforɛ nemɔ, yeɛ mengɔbɔ bɛ dumaa mengɔsɔne bɛ.

⁵AWURADE te m’agyapadeɛ bɔ mafa ɔ, ɔne me ngrabea; wɔ sa nu yeɛ me nwo amukoraa wura ɔ.

⁶Nningyein paa yeɛ afa ama me ɔ; amba, agyapadeɛ paa yeɛ me sa ahã ɔ.

⁷AWURADE bɔ otu me foɛ ne, meye ye ayɛ; meda kɔngɔen po a, me tiboa kyire me bɔ nyɔ ɔ.

⁸Metwe m’adwene mesie AWURADE so daa; na ɔnate kyɛ ogyi me sa famaa so[3] ne ati, mengofi ase.

⁹Yiti me nye agye, yeɛ me kra di ahurusi; me nwo atɔ me fɔnwoo.

¹⁰Ofikyɛ ɛngɔma me kra ngɔha ɛborɔ, yeɛ ɛngɔma w’anwoteeniɛ ne ngɔporɔ ɛborɔ kumaa nu.

¹¹Wɔ yeɛ ekyire me ngoa atee ɔ. Wɔ nyunu yeɛ nningyein bɔ ɔyɛ ahomeka mu wɔ ɔ, na wɔ sa famaa nu yeɛ anigye wɔ afebɔɔ ɔ.