Read Sehwi Edwein 19 Bible Online

Edwein 19 - Sehwi bible

Edwein 19

¹Dawide dwein. Ɔfa mane edweinhyirelɛniɛ ne Nyameɛso ye Nyameɛ animnyam kyire, yeɛ ewienu bɔ ye sa noa adwuma nwo dawure.

²Kyẽa biala kã animnyam ne nwo dwirɛ kyire kyẽa bɔ ɔtoa ye so ɔ, na alesaleɛ biala da nimdeɛ ne ali kyire alesaleɛ bɔ ɔtoa ye so ɔ.

³Bemmukye bɛ noa, bɛnga edwirɛ biala, ebiala nde bɛ komvi;

⁴nakoso bɛ komvi dwu aseɛ ye aso nekaa biala, na bɛ dwirɛ fi aseɛ ti kɔka ye ti. Wasi ɛtena sua wama eyia wɔ nyameɛso,

⁵eyia pukye kyɛ atɔmvorɛ biaa bɔ ofi ye sua nu ofite ɔ, kyɛ bienzua anwoserɛniɛ bɔ ole anigye otu amirika ɔ.

⁶Eyia pukye fi nyameɛso ye ti dɔ, ɔpɛ ye atee kɔka ye ti dɔ, na hwee ngora mva ye nwo mvea mvi ye hyerɛ ne abo.

⁷AWURADE mmeraa ne te pɛpɛɛpɛ, ɔkanyane sona kra; AWURADE dwirɛ te nahorɛ, na ɔma sona tetekwaa onwu nworɛ.

⁸AWURADE ahyɛdeɛ te turoloo, ɔma sona ahone tɔ ye kunu; AWURADE mmeraa dwirɛ nwo te, na obukye sona nye.

⁹AWURADE surolɛ te krongron, na esurolɛ ne tena berɛ afebɔɔ. AWURADE nhyehyɛleɛ te nahorɛ, na ye mukoraa tengyɛ.

¹⁰Nhyehyɛleɛ ne di mu tra esikaa kɔkorɛ, ɔtra esikaa kɔkorɛ paa po. Ɔte menemene tra woɛ, na ɔtra woɛ bɔ ofi nzasameɛ nu ɔpepe ɔ.

¹¹Afei koso, ɔnate so yeɛ ɛbɔ wɔ somvoɛ kɔkɔ ɔ; na sona di so a, onya akatuaa piri.

¹²Nwa yeɛ ye nye kora ba ye nwo so wɔ ye bɔbɔ ye mvomsoɛ nwo ɔ? Me mvomsoɛ bɔ wafea me ne, fa kyɛ me.

¹³Bɔne bɔ bɛboapa bɛyɔ ne, twe w’akoaa fi ye nwo. Sɔ bɔne nemɔ, nnɛmaa bedi me so, amaa ɔnate so mali be wɔ wɔ nyunu, ná manni mmeraatolɛ piri ne anwo fɔ.

¹⁴Ao AWURADE, me nyɔbotaen ne me defoɛ, edwirɛ bɔ ngɔte me noa ngɔhã, ɔne bɔ ngosusu ye nwo wɔ me ti anu ne, maa ɔsɔ wɔ nye.