Read Sehwi Edwein 2 Bible Online

Edwein 2 - Sehwi bible

Edwein 2

¹Nzu ati yeɛ maen maen mɔ bɛyɔ lɔen ɔ, ná maen mɔ bɛbɔ porɛ bɔ ongonzi pasiliwa biala ɔ?

²Aseɛ ye aso ahemvo boaboa bɛ nwo, na maenbulɛfoɛ bɛbɔ nu bɛfa adwene betia AWURADE ne bɔ AWURADE wapopa ye ngoo ne kyɛ,

³“Ɛ́mɔma yɛle yɛ nwo yɛfi bɛ tumi bo, ná yɛpuropuro panwu bɔ babɔ yɛ ne yɛfi yɛ gya.”

⁴Bɔ ɔte nyameɛso ne, ɔsere; bɛ nwo yɛ AWURADE sere.

⁵Afei okodwudwo kohyire bɛ wɔ ye ɛyaafɛlɛ nu, ná wafa ye ahonehulɛ ne wama ahunundetelɛ atɔ bɛ so, kyɛ,

⁶“Me AWURADE, me bɔbɔ, masi me hene mafa ye matena me bokaa krongron Sion so.”

⁷Ngɔfa AWURADE ahyɛdeɛ ne ngɔto dwaa: Osele me kyɛ, “Mma ole wɔ, ɛnɛ mawo wɔ.

⁸Bisa me, na ngɔma maen maen mɔ kɔyɛ w’agyapadeɛ, ná ofi aseɛ ti bɔ ɔkwaahã ye ti ayɛ wɔ deɛ.

⁹Ɛkɔfa buralɛ pɔmaa kobubu bɛ, ná anyoko bɛ kyɛ ngukuenwonɛniɛ ye bua.”

¹⁰Yiti afei, ahemvo, ɛ́mɔsua nworɛ; ewiase maenbulɛfoɛ, ɛ́mɔtie kɔkɔbɔlɛ.

¹¹Ɛ́mɔfa esuronyi bɛso AWURADE, ná ɛ́mɔfa anwopopolɛ koso beli ahurusi.

¹²Ɛmɔbrɛ ɛmɔ nwo ase bɛma Baa ne, ná wamvɛ yaa ama ɛmɔanwuwu atunu, ofikyɛ ye ahone kohu ndɛndɛ. Bɛ bɔ bɛfa bɛ wora bewura AWURADE nu ne, bɛ mukoraa benya saleɛ.