Read Sehwi Edwein 22 Bible Online

Edwein 22 - Sehwi bible

Edwein 22

¹Dawide dwein. Ɔfa mane edweinhyirelɛniɛ ne Me Nyameɛ, me Nyameɛ, nzu ati yeɛ apo me ye? Nzu ati yeɛ mepene mepena mmokalɛ, nakoso aye wɔ nye afi me so ye?

²Ao me Nyameɛ, alehyeleɛ biala mesu mefrɛ wɔ, nakoso ɛndɛ me so; mesu mefrɛ wɔ kɔngɔen biala, nakoso me nwo ndɔ me.

³Nakoso wɔ yeɛ ɛte krongron ɔ, na Yisrael ayɛyelɛ yeɛ ɔte w’ahennie bia ɔ.

⁴Wɔ yeɛ yɛ nana mɔ bɛfale bɛ nwo bɛtole wɔ so ɔ; bɛfale bɛ nwo bɛtole wɔ so, na ɛpepɛ lele bɛ.

⁵Wɔ yeɛ besu bɛfrɛle wɔ ɔ, na ɛpepɛ lele bɛ; wɔ yeɛ bɛfale bɛ nwo bɛtole wɔ so ɔ, na bɛ nyunu angua ase.

⁶Nakoso me de, nde esuronyi, na nnde sona, mmenia sere me, adasa bu me animtia.

⁷Ebiala bɔ onwu me ne, ɔgoro me nwo; besobi bɛ noa begua me so, ná bawoso bɛ ti (bahã kyɛ):

⁸“Ɔfa ye nwo to AWURADE so; maa ɔpepɛ ole ye e; maa ɔpepɛ ole ye, ofikyɛ ɔla ye ahone nwo.”

⁹Nakoso wɔ yeɛ ɛyele me fili me ni akunu ɔ; ndua me maame nyɔfone noa ne, wɔ yeɛ ɛbɔle me nwo waen ɔ.

¹⁰Wɔ yeɛ belele m’aworɛ bɛtole wɔ gya so ɔ, na ofi me ni akunu, wɔ yeɛ ɛte me Nyameɛ ɔ.

¹¹Nnɛyakyi me nu, ofikyɛ edwirɛ pena to me, na nnne bokafoɛ biala.

¹²Nandwie nyii pee bapɛ me nwo bayia, Basan nandwie nyii anwoserɛ nemɔ, bapɛ me nwo kango;

¹³babukye bɛ noa nu hambonnwu bawa me so, kyɛ gyata bɔ ɔteatea nu ɔtete kaka bɔ wahye ye ɔ nu ɔ.

¹⁴Behwie me begua ase kyɛ nzue, na me mmowue amukoraa bahodwo wɔ m’aporɛ so; m’ahone akakyi kyɛ nguɛ, wahuro wagua me kunu.

¹⁵Me komvi ayɛ wosee kyɛ nyangaa bue, na me temverema amata me nnaalɔ; afa me ato ewue kumaa nu.

¹⁶Ngyea apɛ me nwo bayia, nzɛmmɔnefoɛ fekue bapɛ me nwo kango; bafa nikyee basinasina me gya ne me sa.

¹⁷Mekora meka me mmowue amukoraa. Mmenia bɛnea me haa, na bɛkã me anyinga.

¹⁸Bɛkyɛ me ndena bɛfa, na begua serewa bɛkyɛ me ndaadeɛ.

¹⁹Nakoso, ao AWURADE, nnɛtwe wɔ nwo fi me nwo! Ao, wɔ bɔ ɛte m’anwoserɛ ɔ, yɛ ndɛ baaboka me!

²⁰Pepɛ de me kra fi ngrandɛ noa; pepɛ de me ngoa fi ngyea ye mɔ sa nu!

²¹Pepɛ de me fi gyata noa nu! Ofikyɛ apepɛ ale me afi torɔen mmɛen noa.

²²Ngɔbɔ wɔ dumaa ngohyire nniɛma mɔ; ngɔye wɔ ayɛ wɔ badwa nu.

²³Ɛmɔ bɔ ɛmɔsuro AWURADE ne, ɛ́mɔye ye ayɛ! Ɛmɔ, Yakob boso ama amukoraa, ɛ́mɔhyɛ ye animnyam; Yisrael boso ama amukoraa, ɛ́mɔsuro AWURADE!

²⁴Ofikyɛ amaneɛnwunɛniɛ ne, ye amaneɛ ne, wammu ye nye wangua so, yeɛ wanye ye nye wamvea ye, na mmom osũ frɛle ye ne, otiele ye sufrɛ.

²⁵Wɔ yeɛ ɛmaa mekora meye wɔ ayɛ wɔ badwa kandinga nu ɔ, na bɛ bɔ besuro wɔ ne, bɛ nyunu yeɛ ngotua m’aboadeɛ ɔ.

²⁶Anwobrɛaseɛfoɛ bekodidi bɛkɔma bɛ ko koyi; bɛ bɔ bɛpena AWURADE si atee ne, bɛ yeɛ bɛkɔye ye ayɛ ɔ. Nyameɛ ɔ́ma ɛ́mɔnya anika afebɔɔ!

²⁷Ofi aseɛ ti kɔka ye ti, bɛkɔkaye, ná basa bawa AWURADE berɛ; na maen maen mɔ so mmusua amukoraa, bɛkɔkoto wɔ ye nyunu.

²⁸Ofikyɛ ahennie te AWURADE deɛ, na odi maen maen mɔ so hene.

²⁹Amba, ye yeɛ aseɛ ye aso anwomasoɛfoɛ amukoraa bɛkɔkoto ye ɔ; adasa mukoraa, bɛ bɔ bɛngora bɛmma bɛ nwo ngoa ɔ,[6] ye yeɛ bɛkɔkoto ye ɔ.

³⁰Aworɛ ndoatoasoɛ kɔso ye, bɛkɔhã AWURADE nwo dwirɛ bekohyire kyẽa bie ama.

³¹Bɛkɔhã ye ngoalelɛ nwo dwirɛ bekohyire bɛ bɔ bennya bɛwwole bɛ nemɔ kyɛ, “AWURADE yeɛ wayɔ sɔ nikyee ye ɔ.”