Read Sehwi Edwein 25 Bible Online

Edwein 25 - Sehwi bible

Edwein 25

¹Dawide dwein Ao AWURADE, wɔ yeɛ mefa me kra mewura wɔ sa nu ɔ.

²Ao me Nyameɛ, wɔ yeɛ me wora wura wɔ nu ɔ; nnɛma me nyunu gua ase; nnɛma me pɔfoɛ mɔ bedi m’asefinɛ nwo ahurusi.

³Nahorɛ nu, bɛ bɔ bɛ nye la wɔ so ne, nnɛma bɛ nyunu gua ase; bɛ bɔ bɛnate ngondombo atee so bɛye bɛ biɛngo bɛma ne, ma bɛ nyunu gua ase.

⁴Ao AWURADE, maa nwu w’atee ne; fa me fa wɔ saa bɔ apɛ ato berɛ ne aso.

⁵Di me nyunu maa nnate wɔ nahorɛ ne anu, ná kyirekyire me, ofikyɛ wɔ yeɛ ɛte me ngoadefoɛ Nyameɛ ɔ; wɔ yeɛ me nye la wɔ so daa biala ɔ.

⁶Ao AWURADE, kaye w’anwumvoinnwunɛ ɔne wɔ ɔdɔ bɔ onni ngasi ne, ofikyɛ bɛwɔ berɛ fi tete.

⁷Ao AWURADE, ɔnate wɔ paayɛlɛ ne ati, nnɛkaye me ngwadaa nu bɔne, ɔne me mmeraatolɛ; gyina wɔ ɔdɔ bɔ onni ngasi ne aso ná kaye me!

⁸AWURADE te paa, na ɔtengyɛ; yiti okyire bɔnefoɛ atee maa bɛfa so.

⁹Odi anwobrɛaseɛfoɛ nyunu maa bɛfa tenenee nu, na okyirekyire anwobrɛaseɛfoɛ maa bɛfa ye atee so.

¹⁰AWURADE atee amukoraa te ɔdɔ bɔ onni ngasi ne nahorɛ ma bɛ bɔ bedi ye apam ne ye dwirɛ so ɔ.

¹¹Ao AWURADE, wɔ dumaa ti, fa me bɔne kyɛ me, ofikyɛ ɔte piri.

¹²Nwa yeɛ ɔte sona bɔ osuro AWURADE ɔ? Ye yeɛ AWURADE kohyire ye atee bɔ odi kyɛ ɔfa so ɔ.

¹³Ye kra kɔtena asomdwee nu, na ye boso ama konya aseɛ ne maa ɔkɔyɛ b’agyapadeɛ.

¹⁴AWURADE ne bɛ bɔ besuro ye ne yeɛ betu asure ɔ, na ɔye ye apam ne ali kyire bɛ.

¹⁵Me nye la AWURADE so afebɔɔ, ofikyɛ ɔkɔye me gya kofi ngaen nu.

¹⁶Pɛne wɔ nye baanea me, ná nwu me anwumvoin, ofikyɛ waha me ngome, na menwu amaneɛ.

¹⁷Adwenedwene bɔ ɔla me so ne te piri, ao, ye me fi m’amaneɛnwunɛ nu.

¹⁸Nea yealɛ ne amaneɛ bɔ menwu ye ɔ, ná fa me bɔne amukoraa kyɛ me.

¹⁹Nea me pɔfoɛ mɔ bɛ somaa, ná nea ɛpɔen kandinga bɔ bɛpɔ me ɔ.

²⁰Ao, bɔ me kra nwo waen ná pepɛ de me; nnɛma me nyunu gua ase, ofikyɛ wɔ yeɛ menwati mebafea wɔ nu ɔ.

²¹Ma pɛpɛɛpɛyɛlɛ ne nahorɛlilɛ ɔnea me so, ofikyɛ wɔ yeɛ mafa me nwo mato wɔ so ɔ.

²²Ao Nyameɛ, pepɛ de Yisrael fi ye amaneɛ amukoraati nu.