Read Sehwi Edwein 28 Bible Online

Edwein 28 - Sehwi bible

Edwein 28

¹Dawide dwein Ao AWURADE, wɔ yeɛ mesu mefrɛ wɔ ɔ, me nyɔbotaen, nnɛtuatua wɔ so bɔ ɛngɔtɛ me so ɔ, ofikyɛ sɛ andɛ me so a, ngɔyɛ kyɛ bɛ bɔ bawu bahɔ ɛborɔ kumaa nu ne.

²Tie me sufrɛ wɔ aberɛ bɔ mesu mefrɛ wɔ mepena mmokalɛ ye, wɔ aberɛ bɔ mema me sa so mekɔ anwuro mefa mekyire wɔ nekaa krongron paa berɛ ne.

³Nnɛfa me fra bɔnefoɛ ne nzɛmmɔnefoɛ ɛtwe me so. Bɛ yeɛ bɛkã asomdwee nwo dwirɛ bekyire bɛ mmango, nakoso bɔne yeɛ ɔwɔ bɛ ti anu ɔ.

⁴Nea bɛ yɔleɛ nwo ne b’amumuyɛɛ bra nwo ná tua bɛ kerɛ; nea bɛ sa noa adwuma nwo na tua bɛ kerɛ; ma bɛ akatuaa bɔ ɔfata bɛ ɔ.

⁵Ɔnate kyɛ bemmu nningyein bɔ AWURADE wayɔ, anaa ye sa noa adwuma nikyee titire biala ne ati, ɔkɔhwe bɛ so bɔ ɔngɔma bɛ so ko ɔ.

⁶Animnyam hã AWURADE, ofikyɛ watie me sufrɛ.

⁷AWURADE te m’anwoserɛ ne m’akokyɛm, ye yeɛ me nye la ye so ɔ; yiti ɔboka me, na me nye gye. Ngɔfa me dweintolɛ ngɔla ye ase.

⁸AWURADE yeɛ ɔte ye mmenia b’anwoserɛ ɔ, na ɔte ngoalelɛ afealeɛ ma bɔ wapopa ye ngoo ne.

⁹Ao, pepɛ de wɔ maen, ná yira w’agyapadeɛ; yɛ bɛ so neafoɛ, na nea bɛ so afebɔɔ.