Read Sehwi Edwein 33 Bible Online

Edwein 33 - Sehwi bible

Edwein 33

¹Ao ɛmɔ, teneneefoɛ, ɛmɔli ahurusi wɔ AWURADE nu. Ɔfata teneneefoɛ kyɛ bɛye AWURADE ayɛ ɔ.

²Ɛ́mɔfa sangoo bɛye AWURADE ayɛ; ɛ́mɔfa sangoo bɔ ye nyamaa buru ne bɛto ye nwo anigye dwein.

³Ɛ́mɔto ye nwo edwein foforɛ; ɛ́mɔbɔ sangoo ne yé, ná ɛ́mɔtea nu bɛ́to dwein.

⁴Ofikyɛ AWURADE dwirɛ ne ɔtengyɛ, na odi nahorɛ wɔ bɔ ɔyɔ amukoraa nu.

⁵AWURADE nye gye teneneeyɛlɛ ne ndɛenbualɛ turoloo nwo; na AWURADE ɔdɔ bɔ onni ngasi ne wayi aseɛ ye aso tɛkyɛ.

⁶AWURADE noa dwirɛ yeɛ ɔfa bɔle ewienu ɔ, na ye noa nu nwomeɛ yeɛ ɔfa bɔle nu nningyein ɔ.

⁷Ɔboaboa ɛpo nu nzue noa kyɛ esire, na ɔboa buma mɔ noa gua sua nu.

⁸Odi kyɛ aseɛ ye aso ama amukoraa besuro AWURADE, ná mmenia bɔ bɛwɔ wiase amukoraa bɛ́fa ebuo bɛ́ma ye.

⁹Ofikyɛ odwudwole, na ɔyɛle berɛ; ɔhyɛle, na ogyinane berɛ pindinn.

¹⁰AWURADE ma maen maen mɔ b’agyinatulɛ ɔyɛ mbaen, na maen maen mɔ bɛ nhyehyɛleɛ yɛ basaa.

¹¹Nakoso AWURADE agyinatulɛ de, ogyi berɛ afebɔɔ, na ye ti anu nzusuleɛ wɔ berɛ ma aworɛ ndoatoasoɛ amukoraa.

¹²Maen bɔ AWURADE te ye Nyameɛ ne, wanya saleɛ. Ɔte maen bɔ waneanea nu waye ye maa wayɛ ye agyapadeɛ ɔ.

¹³AWURADE to ye nye fi nyameɛso nea ase, na onwu adasa mmaa amukoraa.

¹⁴Ɔte ye ahennie bia so wɔ ye atenaleɛ dɔ, na ɔto ye nye nea aseɛ so ama amukoraa.

¹⁵Ye yeɛ ɔbɔle bɛ mukoraa b’adwene ɔ, na onwu bɔ bɛyɔ amukoraa.

¹⁶Ɛhene biala, nna ye koɛhonɛfoɛ somaa yeɛ bɛkora bɛpepɛ bede ye ɔ; yeɛ koɛhonɛniɛ koso, nna ye anwoserɛ kandinga yeɛ ɔpepɛ de ye ɔ.

¹⁷Sɛ ɛfa wɔ nye to pɔngɔ so wɔ koɛ nu a, ɔte mbaen; ye anwoserɛ kandinga ne ngɔhora ngɔpepɛ ngole wɔ.

¹⁸Amba, bɛ bɔ besuro AWURADE, ɔne bɛ bɔ bɛ nye la ye ɔdɔ bɔ onni ngasi ne aso ne, bɛla ye ahone nwo,

¹⁹kyɛ ɔkɔpepɛ kole bɛ kra kofi ewue nu, na sɛ ɛhɔen piri ba a, ɔkɔmaa bekonya bɛ ti bekodidi nu.

²⁰Yɛ kra nye la AWURADE so; ɔte yɛ bokafoɛ ne y’akokyɛm.

²¹Yɛ nye agye wɔ ye nu, ofikyɛ yɛ wora wura ye dumaa krongron ne anu.

²²Ao AWURADE, ye wɔ ɔdɔ bɔ onni ngasi ne ali kyire yɛ, wɔ mmerɛ bɔ yɛ nye la wɔ so ye.