Read Sehwi Edwein 34 Bible Online

Edwein 34 - Sehwi bible

Edwein 34

¹Dawide dwein: Ɔyɛle ye nwo kyɛ bɔnamvoɛ wɔ Abimɛlɛke nyunu, na onyane ye ti didili nu nen, nziɛ ye ɔtole sɔ dwein he Ngɔye AWURADE ayɛ mmerɛ biala; ye ayɛyelɛ kɔla me noa daa.

²AWURADE nu yeɛ me kra hoahoa ye nwo ɔ, odi kyɛ anwobrɛaseɛfoɛ betie, ná bɛ nye gye.

³Ao, ɛ́mɔboka me so maa yɛkamvo AWURADE, na ɛ́mɔma yɛbɔ nu yɛbɔ ye abodin.

⁴Mbenane AWURADE si atee, na obuale me, na ɔpepɛ lele me fili nikyee bɔ mesuro biala ɔ nu.

⁵Bɛ bɔ bɛfa bɛ nwo bɛto ye so ne, bɛ nye gye; na bɛ nyunu ngua ase.

⁶Sɔ anwumvoinniɛ he, osuni, na AWURADE tiele ye sufrɛ, ná ɔpepɛ lele ye fili ye amaneɛ amukoraa nu.

⁷Bɛ bɔ besuro AWURADE ne, ye abɔfo bɔ bɛ nwo waen bra yia, na ɔpepɛ de bɛ.

⁸Ao, baafa wɔ nwo bɔ AWURADE nea, na ekonwu kyɛ AWURADE te paa; sona bɔ ɔnwati ɔkɔfea ye nu ne, onya saleɛ.

⁹Ao, AWURADE mmenia krongron, ɛ́mɔsuro ye, ofikyɛ bɛ bɔ besuro ye ne, hwee nhia bɛ.

¹⁰Gyata akrɔngrɔma mɔ po, nikyee hia bɛ, na ɛhɔen koso ku bɛ. Nakoso bɛ bɔ bɛfa bɛ nwo bɛto AWURADE so ne de, nikye paa biala nhia bɛ.

¹¹Ao me mma mɔ, ɛmɔbra beetie me noa dwirɛ, na ngohyire ɛmɔ AWURADE surolɛ ne.

¹²Ɛmɔ nu nwa yeɛ ɔpena ngoa, ngoa tendenn bɔ nningyein kɔhɔ so yé kɔma ye ɔ?

¹³Nnɛte wɔ noa kã edwirɛ tɛɛ, yeɛ nnebukye wɔ noa pɛ ngondombo.

¹⁴Twe wɔ nwo fi bɔne nwo, ná yɔ bɔ ɔte paa ɔ, pena asomdwee si atee, na fa bɔ wɔ bra.

¹⁵AWURADE nye wɔ teneneefoɛ so, na ɔyɛ asoɛ tie bɛ sufrɛ.

¹⁶AWURADE tu ye nye sie bɔnefoɛ so, kyɛ okonua bɛ boso kofi aseɛ so.

¹⁷Sɛ teneneefoɛ besu bɛpena mmokalɛ a, AWURADE tie bɛ sufrɛ, na ɔpepɛ de bɛ fi b’amaneɛ amukoraa nu.

¹⁸AWURADE pingye bɛ bɔ bɛ wora abɔ ɔ, na ɔpepɛ de bɛ bɔ bɛ kra aboto ɔ.

¹⁹Teneneeniɛ amaneɛ ɔsone, nakoso AWURADE pepɛ de ye fi ye mukoraa nu.

²⁰Ɔbɔ ye mmowue amukoraa nwo waen, bɔ bɛ nu ko po nu mmu ɔ.

²¹Bɔne kohũ amumuyɛɛfoɛ, na bɛ bɔ bɛpɔ teneneefoɛ ne, ongoyie bɛ yé.

²²AWURADE de ye somvoɛ mɔ ngoa, na ebiala nne berɛ bɔ ɔkɔɔfea ye nu, bɔ ongoyie ye yé ɔ.