Read Sehwi Edwein 35 Bible Online

Edwein 35 - Sehwi bible

Edwein 35

¹Dawide dwein Ao AWURADE, tu wɔ nye sie bɛ bɔ betu bɛ nye besie me so ɔ nemɔ aso, na ko tia bɛ bɔ bɛko betia me ne!

²Fa akokyɛm ne buralɛ ataadeɛ, ná dwɔso baaboka me!

³Twe pealɛɛ ne buralɛ tendenn tworɔntworɔn ne wɔ bɛ bɔ bɛfoa me nemɔ aso; kã kyire me kra kyɛ, “Me ole wɔ ngoalelɛ.”

⁴Bɛ bɔ bɛpena me beku me ne, maa bɛ nyunu ogua ase, ná bɛfɛre. Bɛ bɔ bɛbɔ me nwo porɛ ne, maa bɛfa animguaseɛ besa bɛ si bɛhɔ.

⁵Maa bɛyɛ kyɛ afafu bɔ mvrama hu ye kɔ ɔ, ma AWURADE abɔfo osumu bɛ gua.

⁶Ma b’atee so ɔyɛ awosii ne ndonondono, ma AWURADE abɔfo ogu bɛ so.

⁷Ofikyɛ basua me ngaen wɔ aberɛ bɔ nnyɔle hwee ɔ; bapɛ kumaa bama me kra wɔ aberɛ bɔ nnyɔle hwee ɔ.

⁸Ma b’ayieleɛ oyie bɛ mvum nu, ná ma ngaen bɔ basua bafea me ne hye bɛ; maa bɛtɔ nu ma b’ayieleɛ oyie bɛ.

⁹Na afei, me kra koli ahurusi wɔ AWURADE nu, ná wama ye nwo asande ye wɔ AWURADE ngoalelɛ nu.

¹⁰Me mmowue amukoraa kɔhã kyɛ, “Ao AWURADE, nwa yeɛ ɔte kyɛ wɔ ɔ? Wɔ bɔ ɛpepɛ de sona bɔ ɔyɛ anwumvo fi ebie bɔ ɔkora ye ɔ sa nu ɔ; wɔ bɔ ede sona bɔ ɔyɛ anwumvo ne ehianiɛ fi ebie bɔ osisi ye ɔ sa nu ɔ.”

¹¹Adanzewiafoɛ bedwɔso begyina, na edwirɛ bɔ menze ye nwo hwee ɔ yeɛ bebisa me ɔ.

¹²Bɛfa bɔne betua me paa so kerɛ, na me kra aboto.

¹³Nakoso me de, anwonyerɛ bɔle bɛ ne, ngerale ɛsɛen tena (nnili aworabɔlɛ); ngyele ɛhɔen mva mmrɛle me kra ase. Nzili me ti ase mmɔle mbaeɛ

¹⁴kyɛ ebiaa mesu me damvo anaa nniɛma bie; nzili me ti ase nnili aworabɔlɛ, kyɛ ebie bɔ osũ oni ɔ.

¹⁵Nakoso ngɔle anwokyere nu ne, bɛ nye gyele, bɛyɛle ko bedwɔsole betiale me; asanzafoɛ bie bɔ menze bɛ ɔ, bɛhɔle so bɛsɛkyele me dumaa;

¹⁶asanzafoɛ bɔ benzuro Nyameɛ ɔ bɛgorole me nwo yea yea paa, bɛnwosene bɛ gye behyirele me.

¹⁷Ao AWURADE, ɛnea alaa maa okodwu kyinzu? Pepɛ de me kra fi bɛ nzɛmmɔnelilɛ nu, de me ngoa fi gyata nemɔ sa nu!

¹⁸Na afei ngɔla wɔ ase wɔ badwa kandinga ne anu; ngɔye wɔ ayɛ wɔ ɛlɔen kandinga ne anyunu.

¹⁹ Pɔfoɛ ngondombofoɛ nemɔ, nnɛmaa bedi me nwo ahurusi, bɛ bɔ bɛpɔ me mbaen ne, nnɛmaa bebu me kangyerɛ.

²⁰Ofikyɛ bɛnga asomdwee dwirɛ, na mmom bɛbɔ porɛ bɛpɛ edwirɛ bɛto aseɛ so mmenia bɔ benguro bɛ nwo dwirɛ ɔ so.

²¹Bɛtrɛ bɛ noa nu bɛteatea nu bɛkã me nwo dwirɛ tɛɛ kyɛ, “Ehee! Ehee! yɛ nye anwu ye.”

²²Ao AWURADE, naa anwu ye; nnɛkã wɔ noa to nu! Ao AWURADE, nnɛyakyi me nu!

²³Dwɔso ná ko ma me! ao me Nyameɛ ne m’AWURADE, baali me dwirɛ ma me!

²⁴Ao AWURADE me Nyameɛ, gyina wɔ tenenee so bua me be, na nnɛmaa bedi me nwo ahurusi.

²⁵Nnɛma bɛkekã ye wɔ bɛ ti anu kyɛ, “Ehee, yɛ sa ahã bɔ yɛpena ɔ.” Nnɛmaa bɛkã kyɛ, “Yayie ye pasaa.”

²⁶Bɛ bɔ bedi ahurusi wɔ m’anwokyere mmerɛ nu ne, ma bɛ mukoraa bɛ nyunu ogua ase, ná bɛfɛre; bɛ bɔ bɛmoma bɛ bati so bekyire me ne, maa bɛfa animguaseɛ ne nyanzoen bɛhera.

²⁷Bɛ bɔ bɛ kunu a ahaa babua me be ne, maa bɛbɔ ese beli ahurusi ná bɛ nye gye, ná bɛhã ye daa kyɛ, AWURADE te piri, na ye nye gye ye somvoɛ ye yeeyɛlɛ nwo.”

²⁸Afei ngɔte me noa ngɔbɔ wɔ tenenee ne w’ayɛyelɛ nwo dawure daa amukoraa.