Read Sehwi Edwein 39 Bible Online

Edwein 39 - Sehwi bible

Edwein 39

¹Dawide dwein. Ɔfa mane edweinhyirelɛniɛ Yedutun Ngane kyɛ, “Ngɔnea m’atee bɔ nnate so ɔ yé, amaa mamva me noa mangekã edwirɛ bɔ ɔte bɔne ɔ; ngɔfa krado ngɔto me noa nu, wɔ aberɛ bɔ bɔnefoɛ begyigyi me nyunu ye.”

²Nyɛle dinn, na mandwudwo, nyɛle konn bɔ nikye paa po mangã ye nwo hwee ɔ; m’amaneɛnwunɛ ne yɛle piri.

³Edwirɛ ne yɛle me ateetee, na medwenedwene ye nwo ne, ɔhɔle so yɛle me ateetee, na afei ndele me noa ngane kyɛ,

⁴“Ao AWURADE, maa nwu m’ayieleɛ, ɔne me ngyẽa bɔ apɛ ama me kyɛ nni ɔ; maa nwu kyɛbɔ me ngoa si te tikaa ɔ.

⁵Amba, ama me ngoa ayɛ tikaape bie, na m’afoɛ mɔ bɛtte huu wɔ wɔ nye so. Nahorɛ nu, kuro sona biala ye ngoa te kyɛ nwomeɛ mbaen. Sela

⁶Amba, ebiala nate berɛ kyɛ wawoɛ bie. Amba, sona ha ye nwo mbaen, sona pena agyapadeɛ pee, nakoso ɔnze sona bɔ okooli ye sa ɔ.

⁷Na afei AWURADE, nzikyɛ yeɛ mva me nye ndo so ɔ? Wɔ yeɛ me nye la wɔ so ɔ.

⁸De me fi me mmeraatolɛ amukoraa nu. Nnɛmaa mekakyi ngwaseafoɛ sa nu ngorohoɛ nikye.

⁹Mayɛ konn; memmukye me noa, ofikyɛ wɔ yeɛ ahyehyɛ ye sɔ ɔ.

¹⁰Nnɛfa wɔ mbire gyina me nwo ko; wɔ sa bɔ afa agyina me nwo ne, wamaa mabubu.

¹¹Ɛtwe adasa mmaa so, sɛ ɛtwe sona so wɔ ye bɔne nwo a, ɛsɛkye nikyee bɔ okuro ye paa ne, kyɛbɔ mvrɔlɔ sɛkye nikye ɔ; amba, sona biala te kyɛ nwomeɛ mbaen. Sela

¹²“Ao AWURADE, tie me mbaeɛ, ná tie me sufrɛ; nnɛye wɔ nye fi me moenporolɛ ne anwo; ofikyɛ nde kyɛ wɔ wɔfoɛ bɔ ɔngɔhyɛ ɔ, nde amanvraniɛ kyɛ me nana mɔ amukoraa.

¹³Nnɛtu wɔ nye sie me so, amaa ɔnate so masa manya anigye koraka né mafi wa mahɔ bɔ bengonwu me ko ɔ.”