Read Sehwi Edwein 40 Bible Online

Edwein 40 - Sehwi bible

Edwein 40

¹Dawide dwein. Ɔfa mane edweinhyirelɛniɛ ne Nzili aboterɛ mvale me nye ndole AWURADE so, na ɔyɛle asoɛ otiele me sufrɛ.

²Ɔyele me fili ewue kumaa nu, ɔyele me fili asaa nu, na ɔfale me gya siesiele nyɔbotaen so mane me gya bo tindimuni.

³Ɔfale edwein foforɛ tuale me noa, ɔte yɛ Nyameɛ nwo ayɛyelɛ dwein. Mmenia pee konwu ye ná basuro, ná bafa bɛ wora bawura AWURADE nu.

⁴Sona bɔ ɔfa ye wora owura AWURADE nu ne, onya saleɛ; sɔ sona ne, ɔmva ye nwo ndo anwomasoɛfoɛ so, ɔne bɛ bɔ bedi makyebu bɛkɔso mmosoen mɔ ɔ bɛ so.

⁵Ao AWURADE me Nyameɛ, w’anwanwadeɛ bɔ ayɔ ne, ɔne adwene bɔ ele ye ma yɛ ne, bɛsone paa; ebiala ngɔhora ngɔfa ye nwo ngɔtoto wɔ nwo. Sɛ mekã kyɛ meka ná mebɔ ye nwo dawure a, ɔsone bɔ mengɔhora ye ka ɔ.

⁶Nna ngaka afɔleɛ ne ayɛyɛdeɛ yeɛ wɔ nye gye ye nwo ɔ, na mmom ama me asoɛ bɔ ɔte dwirɛ ɔ. Nna naen yeralɛ afɔleɛ ne bɔne nwo afɔleɛ yeɛ ɛpena ɔ.

⁷Yeɛ ngane kyɛ, “Me ɛhe; kyɛbɔ bahyerɛ bafa me nwo wɔ nwomaa bɔ babobɔ ne anu ne ala.

⁸Ao me Nyameɛ, bɔ mekuro ole kyɛ ngɔyɔ w’apɛdeɛ ɔ; wɔ mmeraa ne wɔ me ti anu.”

⁹Mahã tenenee nwo ndɛenvɛen ne wɔ badwa kandinga ne anu. Ao AWURADE, kyɛbɔ wɔ bɔbɔ ɛse ne, amba, mangã me noa mando nu.

¹⁰Wɔ tenenee nwo dwirɛ ne, mamva mamvea wɔ me ti anu; mabɔ wɔ nahorɛlilɛ ne wɔ ngoalelɛ nwo dawure. Wɔ ɔdɔ bɔ onni ngasi ne, ɔne wɔ nahorɛlilɛ ne, mamva ye nwo dwirɛ mamvea badwa kandinga ne.

¹¹Ao AWURADE, nnɛyakyi anwumvoinnwunɛ bɔ enwu me ne. Wɔ ɔdɔ bɔ onni ngasi ne, ɔne wɔ nahorɛlilɛ ne, maa ɔbɔ me nwo waen afebɔɔ.

¹²Ofikyɛ amaneɛ bɔ bɛka a bennwu ye noa ɔ, bapɛ me nwo bayia, m’amumuyɛɛ mɔ babungam bafa me so, bɔ ɔmma mengora mennwu nikye ɔ; bɛsone bɛtra me ti nwiaa, na wamaa ahunundetelɛ atɔ me so.

¹³Ao AWURADE, maa ɔyɛ wɔ fɛ kyɛ ɛkɔpepɛ kole me ɔ, ao AWURADE, yɛ ndɛ baaboka me.

¹⁴Bɛ bɔ bɛpena kyɛ bede me ngoa befi me sa nu ne, ma bɛ nyunu ogua ase, ná bɛfɛre; bɛ bɔ bɛpena me ne tɛɛ ne, foa bɛ maa besa bɛ si, ná bɛ nyunu ogua ase.

¹⁵Bɛ bɔ bese me kyɛ, “Ehee, ehee!” ne, ma b’animguaseɛ ne ɔma bɛ bɔbɔ bɛ nwo dwiri bɛ.

¹⁶Nakoso bɛ bɔ bɛpena wɔ si atee ne de, maa bɛ mukoraa beli ahurusi, ná bɛ nye gye wɔ wɔ nu; bɛ bɔ bɛ nye gye wɔ ngoalelɛ nwo ne, maa daa bɛhã kyɛ, “AWURADE te piri!”

¹⁷Meyɛ anwumvo, yeɛ nde hianiɛ de, nakoso AWURADE dwene me nwo. Wɔ yeɛ ɛte me bokafoɛ ne me defoɛ ɔ; ao me Nyameɛ, nnɛkyɛ.