Read Sehwi Edwein 42 Bible Online

Edwein 42 - Sehwi bible

Edwein 42

¹Kora boso ama dwein. Ɔfa mane edweinhyirelɛniɛ ne Ao Nyameɛ, kyɛbɔ dabɔɔ ye komvi de asue ba bɔ ɔse ɔ nu nzue ne, sɔ ala yeɛ me kra pena wɔ si atee ɔ.

²Me kra wora dɔ Nyameɛ, ye wora dɔ Nyameɛ teasefoɛ ne. Kyinzu yeɛ ngɔwa ngoodwu Nyameɛ nyunu ɔ?

³Me nye moen yeɛ wakakyi m’aleɛ eyia ne kɔngɔen ɔ; daa biala mmenia bisa me kyɛ, “Wɔ Nyameɛ ne, ɔwɔ nisua?”

⁴Mekaye sɔ dwirɛ hemɔ a, né me kra wora abɔ: kyɛbɔ me ne ɛlɔen ne yɛhɔle, ɛlɔen kandinga bɔ bedi aluolue ne, bɔ nne esebɔlɛ ne asennaa dwein, nnili folii ne nyunu ngɔle Nyameɛ awuro ne.

⁵Ao me kra, nzu ati yeɛ aboto sɔaa ye, nzu ati yeɛ wɔ wora abɔ wɔ me nu ye? Fa wɔ wora wura Nyameɛ nu, ofikyɛ ngosa ngɔye ye ayɛ. Ɔte me bokafoɛ ne me Nyameɛ.

⁶Me kra aboto wɔ me nu, yiti mekaye wɔ mefi Yɔɔdan ne Hɛmɔn aseɛ so, ɔne Misa bokaa so.

⁷Sɛ w’asue nemɔ bɛse wuruwuru a, né buma frɛ buma; w’asorɔkye ne wɔ nzue bɔ ɔse wuruwuru ne, babu bafa me so.

⁸AWURADE ye ɔdɔ bɔ onni ngasi ne, ɔye ye ali eyia, na kɔngɔen meto ye dwein mefa mebɔ mbaeɛ mekyire Nyameɛ bɔ otira me ngoa nyamaa nu ɔ.

⁹Mebisa AWURADE bɔ ɔte me nyɔbotaen ne kyɛ, “Nzu ati yeɛ wɔ wora afi me e? Nzu ati yeɛ ɔnate ɛhyɛlɛ bɔ pɔfoɛ ne ɔhyɛ me so ti, odi kyɛ menate berɛ anwumvoin anwumvoin ɔ?”

¹⁰Me pɔfoɛ mɔ b’anyinga bɔ bɛkã me ne, ɔte kyɛ kena wɔ me wereɛ nu, na daa bebisa me kyɛ, “Wɔ Nyameɛ ne, ɔwɔ nisua?”

¹¹Ao me kra, nzu ati yeɛ aboto sɔaa ye, nzu ati yeɛ wɔ wora abɔ wɔ me nu ye? Fa wɔ wora wura Nyameɛ nu, ofikyɛ ngosa ngɔye ye ayɛ. Ɔte me bokafoɛ ne me Nyameɛ.