Read Sehwi Edwein 44 Bible Online

Edwein 44 - Sehwi bible

Edwein 44

¹Kora boso ama dwein. Ɔfa mane edweinhyirelɛniɛ ne Ao Nyameɛ, anwanwadeɛ bɔ ɛyɔle ye daa tete ne, wɔ yɛ nana mɔ b’aberɛ so ne, yɛ nana mɔ bahã bahyire yɛ; yɛ bɔbɔ yate ye wɔ yɛ so anu.

²Wɔ bɔbɔ deinn wɔ tumi yeɛ ɛfa foane maen maen nemɔ ɔ, nakoso yɛ nana mɔ de, ɛfale bɛ ɛɛtenane aseɛ ne aso; ɛpraprale amaneɛ guale maen maen nemɔ aso, nakoso yɛ nana mɔ de, ɛbɔle bɛ atenaseɛ.

³Nna bɛ bɔbɔ bɛ ngrandɛ yeɛ bɛfa bɛhone belele aseɛ ne ɔ, yeɛ nna bɛ bɔbɔ b’anwoserɛ yeɛ ɔmaa belili ngonim ɔ; na mmom wɔ sa famaa ne, w’anwoserɛ ne, ɔne wɔ nyunu kanea bɔ ɔbokale bɛ ne ɔ, ofikyɛ ekuro bɛ dwirɛ.

⁴Ao Nyameɛ, wɔ yeɛ ɛte me Hene ɔ; wɔ yeɛ ɛma Yakob di ngonim ɔ.

⁵Wɔ tumi yeɛ yɛfa yɛdi yɛ pɔfoɛ mɔ so ngonim ɔ, na wɔ dumaa nu yeɛ yɛtiatia bɛ bɔ bedwɔso betia yɛ ɔ so ɔ.

⁶Ofikyɛ memva me nwo mendo m’agyaen so, yeɛ me ngrandɛ ngɔhora ngɔpepɛ ngole me.

⁷Nakoso apepɛ ale yɛ afi yɛ pɔfoɛ mɔ sa nu, na bɛ bɔ benguro yɛ dwirɛ ne, ama bɛ nye so atã.

⁸Na wɔ, Nyameɛ de, wɔ nu yeɛ yɛhoahoa yɛ nwo daa amukoraa ɔ, na yɛkɔye wɔ dumaa ne ayɛ afebɔɔ. Sela

⁹Nakoso afei de, apo yɛ agua yɛ nyunu ase, na ɛne yɛ koɛhonɛfoɛ nemɔ bɛngɔ koɛ ko.

¹⁰Amaa yanwati yafi yɛ pɔfoɛ ne nyunu, na yɛ pɔfoɛ mɔ bafe yɛ nningyein bafa.

¹¹Ayɛ yɛ kyɛ mmoaen bɔ bɛkwaahũ bɛ ɔ, na abɔ yɛ asande aagua maen maen mɔ so.

¹²Atɔne wɔ mmenia bɔ anne huu ɔ, amva bɛ anne nyɔboɛ serɛ biala.

¹³Amaa yɛ mmango mɔ bɛkã yɛ anyinga, na maen maen bɔ bapɛ yɛ nwo bayia ne, amaa bɛsere yɛ bɛgoro yɛ nwo.

¹⁴Amaa yakakyi ngorohoɛ dwirɛ wɔ maen maen mɔ bɛ noa nu, bɛ bɔ bapɛ yɛ nwo bayia ne, ɛmaa besobi bɛ noa begua yɛ so.

¹⁵Mmerɛ biala, me nwo nyanzoen li me nyunu, na animguaseɛ abia me,

¹⁶ɔnate bɛ bɔ bɛkã me anyinga bɛpepɛ me nzoaa ne, bɛ noa dwirɛ ti, yeɛ afei ɔnate pɔfoɛ ne ɔne wereɛtɔlɛniɛ ne ati.

¹⁷Nakoso ɛhe amukoraati ato yɛ, ɔwɔ nu kyɛ yɛmmane yɛ wora offili wɔ, yeɛ yɛllili w’apam ne nwo fɔ.

¹⁸Yambo wɔ wɔ y’ahone nu, yeɛ yanni wɔ dwirɛ ne anwo makyebu,

¹⁹nakoso abubu yɛ pasaa wɔ nekaa bɔ ɛserɛ so ngyea bɛwɔ ɔ, na afa awosii kabii akata yɛ so.

²⁰Sɛ yɛ wora afi yɛ Nyameɛ dumaa a, anaa sɛ yatrɛtrɛ yɛ sa nu yasɔne nyameɛ foforɛ bie po a,

²¹aso ahaa Nyameɛ ongonwu ye anaa? Ofikyɛ ye yeɛ ɔse sona ti anu mvealeɛ dwirɛ ɔ.

²²Ɔnate wɔ ti beku yɛ daa biala, na bebu yɛ kyɛ mmoaen bɔ bɛfa bɛ bɛkɔ akumyɛɛ ɔ.

²³Ao AWURADE, tingye! Nzu ati yeɛ ɛda e? Dwɔso, na nnɛgyi yɛ to afebɔɔ!

²⁴Nzu ati yeɛ aye wɔ nye afea e? Nzu ati yeɛ wɔ wora afi y’amaneɛnwunɛ ne yɛ ndaneanyeɛ ye?

²⁵Ofikyɛ babrɛ yɛ kra ase bawura mvuture nu; na yɛ nipadua butu nnɛtefue nu.

²⁶Dwɔso ná baaboka yɛ. Wɔ ɔdɔ bɔ onni ngasi ne ati, pepɛ de yɛ.