Read Sehwi Edwein 45 Bible Online

Edwein 45 - Sehwi bible

Edwein 45

¹Kora boso ama dwein. Ɔfa mane edweinhyirelɛniɛ ne Ndɛenvɛen ayi m’ahone nu tɛkyɛ, na ɛhene ne nwo dwein yeɛ meto ɔ, me temverema te kyɛ ahyerɛlɛniɛ bɔ waboa ye nwo ɔ ye pɛn.

²Wɔ nwo yɛ nyemene tra sona biala; wɔ noa dwirɛ yɛ fɛ, yiti Nyameɛ ayira wɔ afebɔɔ.

³Ao Tuminiɛ, fa wɔ ngrandɛ wura bɔha nu si wɔ taku so, wɔ w’animnyam ne w’ahennie nu animnyam ne anu.

⁴Kɔ so di ngonim wɔ w’ahennie animnyam nu, ɔnate nahorɛlilɛ, anwobrɛaseɛ ne tenenee ti; wɔ nningyein suronyisuronyi nemɔ, ma wɔ sa famaa ne ohyirehyire wɔ.

⁵W’agyaen nemɔ noa yɛ nna, besinasina nana pɔfoɛ mɔ b’ahone nu; maen maen mɔ tete gua wɔ gya bo.

⁶“O Nyameɛ, w’ahennie bia wɔ berɛ afebɔɔ! W’ahennie hɔtɔ ne, ɔte pɛpɛɛpɛyɛlɛ hɔtɔ.

⁷Ekuro tenenee, na ekyi amumuyɛɛ. Ɛhe ati yeɛ Nyameɛ, wɔ Nyameɛ ne, wafa anika ngoo wapopa wɔ maa wabo wɔ mmango mɔ deɛ so ɔ.

⁸Korobo, pɛprɛ ne kandanguru ma wɔ tena nu bo fona. Ahemvie bɔ bafa ɛsoen gye baboro ye nwo ne, nu yeɛ bɛbɔ dwein bɛgyegye wɔ nye ɔ.

⁹Ahemvo mma mmrasua nemɔ, bɛboka wɔ ndaluwa titire nemɔ aso, na ahenyerɛ ne, ogyi wɔ sa famaa so bɔ wafa Ofire esikaa kɔkorɛ wasiesie ye nwo ɔ.

¹⁰Ao mma brasua, tie bɔ mekã ye, ná dwene ye nwo; ma wɔ wora fi wɔ mmenia ne wɔ baba awuro ama,

¹¹na ɛhene ne, ye nye kɔgye w’anwonyemene nwo. Ɔnate kyɛ ɔte wɔ mene ne ati, bɔ wɔ nu ase ma ye.

¹²Tirofoɛ bɛkɔfa akyɛdeɛ pee bɛkɔwa, bɛ nu sikafoɛ paa nemɔ po; bɛkɔfa akyɛdeɛ ahoroɔ bɛkɔɔpena wɔ berɛ animnyam.

¹³Ɛhene awa brasua ne, ɔwɔ ye animnyam nu, na owura ataadeɛ bɔ bafa esikaa kɔkorɛ batuatua nu ɔ.

¹⁴Wawura ataadeɛ bɔ bali adwii bagua nu ɔ, na bɛfa ye bɛkɔ ɛhene ne berɛ; ye mmango ndaluwa ababunu nemɔ beli ye si, na bɛfa ye bɛbrɛ wɔ.

¹⁵Bɛkwaawura Nana ahemvie berɛ, na bele anigye ne ahurusi yeɛ bɛfa bɛ bɛba ɔ.

¹⁶Wɔ mma mɔ bekosi bɛ nana mɔ gya nu; ɛkɔfa bɛ koli hene wɔ aseɛ ye aso amukoraa.

¹⁷Ngɔmaa bɛkɔkaye wɔ dumaa wɔ aworɛ ndoatoasoɛ amukoraa nu; yiti maen maen mɔ kɔye wɔ ayɛ afebɔɔ.