Read Sehwi Edwein 51 Bible Online

Edwein 51 - Sehwi bible

Edwein 51

¹Dawide dwein. Dawide hyerɛle wɔ mmerɛ bɔ ɔne Bahyeba bɛlale ná Natan hwili ye nyunu wɔ ye nwo ne. Ao Nyameɛ, gyina wɔ ɔdɔ bɔ onni ngasi ne aso ná nwu me anwumvoin, gyina w’anwumvoinnwunɛ kandinga ne aso, ná kyikyi me mmeraatolɛ.

²Nwunzi me nwo sannwuu fi m’amumuyɛɛ nwo, ná pete me nwo fi me bɔne nwo.

³Ofikyɛ mede me mmeraatolɛ meto nu, na me bɔne la me nyunu daa.

⁴Wɔ ngome, wɔ ngome twe, yeɛ mayɔ bɔne matia wɔ ɔ, na mayɔ bɔ ɔte bɔne wɔ wɔ nyunu ɔ. Yiti sɛ ebua me fɔ a, ɔte turoloo, na sɛ ebua me ndɛen a, edi be.

⁵Amba, amumuyɛɛ nu yeɛ bɛwole me ɔ, na bɔne nu yeɛ me maame nwonzɛle me ɔ.

⁶Amba, ɛpena nahorɛlilɛ wɔ sona nu, yiti maa nwu nworɛ wɔ me nu mvealeɛ nu dɔ.

⁷Fa sufiɛ pete me nwo, na me nwo kofi; nwunzi me nwo, na me nwo kɔyɛ fufue kɔtra ewure.

⁸Maa nde ahurusi ne anigye dwirɛ, mmowue bɔ agorɔgorɔ bɛ ne, maa beli ahurusi.

⁹Nnɛnea me bɔne bɔ mayɔ ɔ, na mmom kyikyi m’amumuyɛɛ amukoraa.

¹⁰Ao Nyameɛ, bɔ ahone bɔ nu te ɔ wura me nu, ná fa sunzum bɔ ɔtengyɛ ɔ wura me nu.

¹¹Nnɛfoa me fi wɔ nyunu, yeɛ nnɛye wɔ krongronyɛlɛ sunzum ne fi me nu.

¹²Wɔ ngoalelɛ nu anigye ne, sa fa ma me, ná fa sotie sunzum tira me nu.

¹³Na afei ngohyire mmeraatolɛfoɛ w’atee, na bɔnefoɛ kosa kɔwa wɔ berɛ.

¹⁴Ao Nyameɛ, me ngoadefoɛ Nyameɛ, pepɛ de me fi mogya nwo foɛlilɛ nu, na ngɔfa me noa ngɔto wɔ tenenee nwo dwein serɛ paa.

¹⁵Ao AWURADE, bukye me noa, na ngɔfa me noa ngɔbɔ dawure ngɔye wɔ ayɛ.

¹⁶Ofikyɛ nna afɔleɛ yeɛ wɔ nye gye ye nwo ɔ. Sɛ mebɔ naen yeralɛ afɔleɛ a, wɔ nye ngɔgye ye nwo.

¹⁷Afɔleɛ bɔ Nyameɛ nye gye ye nwo ole ahone bɔ wabrɛ ye nwo ase ɔ; ao Nyameɛ, ahone bɔ wabrɛ ye nwo ase, ná ye wora abɔ de, ɛngɔpo.

¹⁸Maa ɔyɛ wɔ anigye kyɛ ɛkɔma Sion konya ngɔsoɛ ɔ; si Yerusalem fasue nemɔ.

¹⁹Na wɔ nye kɔsɔ afɔleɛ bɔ ɔtengyɛ ɔ nwo: naen yeralɛ afɔleɛ ne afɔleɛ mumua yeralɛ nwo; na bɛkɔbɔ nandwie nyii afɔleɛ wɔ w’afɔleɛ bokyea ne aso.