Read Sehwi Edwein 59 Bible Online

Edwein 59 - Sehwi bible

Edwein 59

¹Dawide dwein. Ɔfa mane edweinhyirelɛniɛ ne. Ɔto fale mmerɛ bɔ Sɔɔlo somane mmenia kyɛ beehu ye wɔ ye awuro ne anwo Ao me Nyameɛ, pepɛ de me fi me pɔfoɛ mɔ sa nu, na bɛ bɔ bedwɔso betia me ne, bɔ me nwo waen fi bɛ sa nu.

²Pepɛ de me fi amumuyɛɛfoɛ mɔ sa nu, ná de me ngoa fi kodiawufoɛ bɛ sa nu.

³Ao AWURADE, nndole mmeraa biala, yeɛ nnyɔle bɔne biala, nakoso kekesaala ye po, bɛtetɛ me beku me; nzɛmmɔnefoɛ bɛboa bɛ noa bɛbɔ me ti so porɛ.

⁴Nnyɔle tɛɛ biala, nakoso bɛpena me bepura me. Dwɔso baanea me ná boka me!

⁵Ao AWURADE, Asafo Nyameɛ, ɛte Yisrael Nyameɛ. Dwɔso twe maen maen amukoraa bɛ so; amumuyɛɛfoɛ nnakannakafoɛ ne, nnɛma bɛ nu biala fa ye nwo di tɔtorɔtɔɔ. Sela

⁶Nɔsoa biala besa bɛba, bepo kyɛ ngyea, na bekyini kuro ne anu bɛbra beyia.

⁷Tie, edwirɛ mbiri mbiri bɔ bele bɛ noa bɛkekã ɔ, edwirɛ yealɛ bɔ otua bɛ noa ɔ, B’adwene ole kyɛ, “Nwa yeɛ ɔkɔte yɛ nga ɔ.”

⁸Nakoso AWURADE, wɔ de, ɛsere bɛ, na ɛgoro maen maen amukoraa bɛ nwo.

⁹Ao m’anwoserɛ, me nye la wɔ so, ofikyɛ ao Nyameɛ, wɔ yeɛ ɛte m’anwoserɛ afealeɛ ɔ.

¹⁰Ɔnate me Nyameɛ ɔdɔ bɔ onni ngasi ne ati, ɔkɔɔboka me; me Nyameɛ koli me pɔfoɛ mɔ so ngonim maa ngonwu ye.

¹¹Nnɛkũkũ bɛ: ɔba ye sɔ a, me maen bɛ wora kofi; fa wɔ tumi maa bɛbɔ asesa, ná brɛ bɛ ase; ao AWURADE, ɛte y’akokyɛm.

¹²Bɛ noa dwirɛ bɔ ɔte bɔne, yeɛ edwirɛ bɔ otua bɛ noa ne ati, ma b’anwomasoɛ ne kakyi ngaen ɔhye bɛ. Ɔnate bɛ noa dwirɛ bɔ ɔte amoenwaa ne ngondombo ne ati,

¹³fɛ bɛ so yaa kũkũ bɛ; kũkũ bɛ ma bɛ boso onua. Na ɛhe kɔmaa ofi aseɛ ti kɔka ye ti, mmenia konwu kyɛ Nyameɛ yeɛ odi Yakob so hene ɔ. Sela

¹⁴Nɔsoa biala besa bɛba, bepo kyɛ ngyea, na bekyini kuro ne anu.

¹⁵Bekyini bɛpena aleɛ, na sɛ bɛ ko anyi a, bɛyɛ dede.

¹⁶Nakoso me de, ngɔto w’anwoserɛ nwo dwein; na ngyerɛmɔ ngɔto wɔ ɔdɔ bɔ onni ngasi ne anwo dwein. Ofikyɛ wɔ yeɛ ɛte m’anwoserɛ afealeɛ ne m’amaneɛnwunɛ kyẽa nu afealeɛ ɔ.

¹⁷Ao m’anwoserɛ, ngɔto dwein ngɔye wɔ ayɛ, ofikyɛ ao Nyameɛ, wɔ yeɛ ɛte m’anwoserɛ afealeɛ ɔ, Nyameɛ bɔ ɔye ɔdɔ bɔ onni ngasi ne ali kyire me ɔ.