Read Sehwi Edwein 63 Bible Online

Edwein 63 - Sehwi bible

Edwein 63

¹Dawide dwein. Ɔtole ye mmerɛ bɔ né ɔwɔ Yuda ɛserɛ so ne. Ao Nyameɛ, wɔ yeɛ ɛte me Nyameɛ ɔ, mepena wɔ serɛserɛ; me kra wora adɔ wɔ, me nwonaen ayɛ hodwoo ɔpena wɔ kyɛ aseɛ wosee katerepee bɔ ɔpena nzue ɔ.

²Amba, manwu wɔ wɔ nekaa krongron berɛ, bɔ menea wɔ tumi ne w’animnyam ɔ.

³Wɔ ɔdɔ bɔ onni ngasi ne, ɔte paa tra ngoa; ye sɔ ati, me noa kɔye wɔ ayɛ.

⁴Yiti mmerɛ bɔ nde ngoa nu ye, ngɔye wɔ ayɛ, na ngɔma me sa so ngɔbɔ mbaeɛ wɔ wɔ dumaa nu.

⁵Me kra ko koyi kyɛ ama ye aleɛ bɔ ɔyɛ fɛ ne bɔ naen bɔ walɔ ɔ, na ngɔfa me noa ngɔto ahurusi dwein ngɔye wɔ ayɛ.

⁶Sɛ mekaye wɔ wɔ me bɛen so a, medwenedwene wɔ nwo abunnamu;

⁷ofikyɛ wɔ yeɛ ɛte me bokafoɛ ɔ, na wɔ ndaa ne abo fɔnwoo ne anu yeɛ medi ahurusi ɔ.

⁸Me kra te mata wɔ, wɔ sa famaa ne tira me nu.

⁹Nakoso bɛ bɔ bɛpena me kra beku ye ne, bɛkɔhɔ aseɛ bo dɔ kumaa nu.

¹⁰Bɛkɔtotɔ ngrandɛ noa, na bɛkɔyɛ ɛserɛ so ngyea bɛ naen.

¹¹Nakoso ɛhene ne koli ahurusi wɔ Nyameɛ nu; na ebiala bɔ ɔfa ye dumaa ta ndaen ne, ɔkɔhoahoa ye nwo, ofikyɛ bɛkɔhã ngondombofoɛ noa bɛkɔto nu.