Read Sehwi Edwein 66 Bible Online

Edwein 66 - Sehwi bible

Edwein 66

¹Edwein bɔ bɛfa bɛmane edweinhyirelɛniɛ ne Aseɛ amukoraa, ɛ́mɔfa ahurusi bɛbɔ Nyameɛ nwo ese; ɛ́mɔto ye dumaa nwo animnyam dwein;

²ɛ́mɔfa ayɛyelɛ bɔ animnyam wɔ nu ɔ bɛ́ma ye.

³Ɛmɔhã behyire Nyameɛ kyɛ, “Wɔ nnwumaa yɛ nwanwa! Ɔnate wɔ tumi kandinga ne ati, wɔ pɔfoɛ mɔ koto wɔ gya bo.

⁴Aseɛ so nikyee biala sɔne wɔ; bɛto wɔ nwo ayɛyelɛ dwein, bɛto wɔ dumaa nwo ayɛyelɛ dwein.” Sela

⁵Ɛmɔbra bɛɛnea bɔ AWURADE ayɔ ɔ: ye nnwumaa bɔ ɔyɔ ye adasa mmaa nu ne, ɔyɛ suro.

⁶Ɔmane ɛpo kakyili aseɛ wosee maa bɛnatele bɛ gya kunu bɛpɛle nzue ne. Berɛ yeɛ yɛlili ahurusi wɔ ye nu ɔ,

⁷ye yeɛ ɔfa ye tumi ne di hene afebɔɔ ɔ, ye yeɛ ye nye kɔ aporɔ wɔ wiase amukoraa ɔ, nnɛma ɛlɔenyɛlɛfoɛ bɛmoma bɛ nwo so. Sela

⁸Ao maen maen, ɛ́mɔye yɛ Nyameɛ ayɛ, ɛ́mɔma mmenia bɛte ayɛyelɛ bɔ ɛmɔye ye ne.

⁹Ye yeɛ wamaa yɛtɛ boka ateasefoɛ so, bɔ wamma yanzoti ɔ.

¹⁰Ofikyɛ wɔ, ao Nyameɛ, aso yɛ anea; aso yɛ anea kyɛbɔ bɛpɔ ɛdwetɛ nwo wɔ see nu ɔ.

¹¹Ɛfale yɛ wurale ɛtɛen ne anu, na ɛfale amaneɛnwunɛ adesoa tetale yɛ si.

¹²Amaa mmenia bahwi bafa yɛ ti so, yɛfale see nu ne nzue nu, nakoso aye yɛ afite afa yɛ awa nekaa bɔ anwonya pee wɔ ɔ.

¹³Ngɔfa naen yeralɛ afɔleɛ mɔ ngɔwa w’awuro berɛ; ngotua m’aboadeɛ mɔ ngɔma wɔ,

¹⁴bɔ ɔte bɔhyɛ bɔ ndele me noa nhyɛle, bɔ ngane ye wɔ mmerɛ bɔ ngɔle amaneɛ nu ne.

¹⁵Ngɔfa ngaka bɔ balɔ ɔ ngɔbɔ naen yeralɛ afɔleɛ mɔ ngɔma wɔ, ɔne mmoaen nyii afɔleɛ nwosina. Ngɔbɔ nandwie nyii ne mbɔngye afɔleɛ. Sela

¹⁶Ɛmɔ amukoraa bɔ ɛmɔsuro Nyameɛ ɔ, ɛmɔbra beetie, na bɔ wayɔ wama me ne, ngɔhã ngohyire ɛmɔ.

¹⁷Ndeane nu nzu mvrɛle ye, na mvale me noa ngamvole ye.

¹⁸Sɛ ndwenene bɔne nwo wɔ me ti anu a, ahaa AWURADE andie me sufrɛ.

¹⁹Nakoso, amba, Nyameɛ atie me; wayɛ asoɛ watie me mbaeɛ.

²⁰Animnyam hã Nyameɛ ofikyɛ wambo me mbaeɛ, yeɛ wamma ye ɔdɔ bɔ onni ngasi ne wammɔ me.