Read Sehwi Edwein 67 Bible Online

Edwein 67 - Sehwi bible

Edwein 67

¹Sangoo dwein. Ɔfa mane edweinhyirelɛniɛ ne kyɛ bɛfa sangoo bɛto Ao Nyameɛ, nwu yɛ anwumvoin ná yira yɛ, ma wɔ nyunu ɔta hyireinn ma yɛ, Sela

²amaa ɔnate so banwu w’atee wɔ aseɛ ye aso, ná banwu wɔ ngoalelɛ tumi ne wɔ maen maen amukoraa nu.

³Ao Nyameɛ, odi kyɛ maen maen bɛye wɔ ayɛ, odi kyɛ maen amukoraa bɛye wɔ ayɛ.

⁴Odi kyɛ maen maen bɛ nye gye ná bɛfa ahurusililɛ bɛto dwein, ofikyɛ ɛfa pɛpɛɛpɛyɛlɛ ebua maen maen mɔ ndɛen, na esa fa bu aseɛ ye aso maen maen mɔ. Sela

⁵Ao Nyameɛ, odi kyɛ maen maen mɔ bɛye wɔ ayɛ, amba, odi kyɛ maen amukoraa bɛye wɔ ayɛ.

⁶Aseɛ ahye aleɛ; Nyameɛ, yɛ Nyameɛ ne, wayira yɛ.

⁷Nyameɛ koyira yɛ, na odi kyɛ bɛ bɔ bɛwɔ aseɛ so nekaa biala besuro ye.