Read Sehwi Edwein 73 Bible Online

Edwein 73 - Sehwi bible

Edwein 73

¹Asafe dwein Amba, Nyameɛ te paa ma Yisrael, ɔte paa ma bɛ bɔ bɛ ti anu te fufue ɔ.

²Nakoso me de, ahaa mesoti; ɔhale sɔaa maa mvini ase.

³Ofikyɛ me nye borole mmeraatolɛfoɛ, mmerɛ bɔ nwuni bɔnefoɛ bɛ ngɔsoɛ ne.

⁴Ofikyɛ nikye fee nha bɛ; bɛte apɔ, yeɛ bɛ nwonaen te mmenanwo mmenanwo.

⁵Edwirɛ ndoto bɛ kyɛ mmenia ngaa nemɔ, yeɛ ɛhawo ndoto bɛ kyɛ mmenia ngaa nemɔ.

⁶Yiti bafa anwomasoɛ baya kyɛ akomuade; bahera basabasayɔlɛ kyɛ ɛtena.

⁷Bayɛ piri ma bɛ nye asi ayɛ kutukutuu, ngwaseasɛm yeɛ wayi bɛ ti anu to ɔ.

⁸Bɛgoro mmenia nwo, na bɛ noa dwirɛ te bɔne, bele anwomasoɛ benwunanwuna mmenia.

⁹Bedwudwo betia nyameɛso, yeɛ bɛ noa tia ebiala wɔ aseɛ ye aso.

¹⁰Ɔnate sɔ ati, bɛ mmenia fa bɛ nwo kɔbɔ bɛ, na benya bɛ nwo bedidi.

¹¹Na bebisa kyɛ, “Ɔkɔyɛ sɛɛ né Nyameɛ wanwu ye? Anwuro Anwuro Nyameɛ ne, aso ɔse bɔ ɔkɔ so ɔ?”

¹²Nea, kyɛ bɔnefoɛ bɛte hɔ ɛne: bɛ nwo atɔ bɛ daa, na bɛkɔ so benya bɛ nwo.

¹³Nahorɛ nu, m’ahone bɔ mate nu sannwuu ne, ɔne me sa bɔ manwunzi mafa mahyire kyɛ medi be ne, mafɛ magua mbaen.

¹⁴Daa biala, ɛhawo angome yeɛ ɔba me so ɔ, na ngyerɛmɔ biala bɛtwe me so.

¹⁵Sɛ ngane kyɛ, “Ngɔma sɔ dwirɛ nemɔ kofite me noa” a, ahaa né manni nahorɛ mamma wɔ mma aworɛ ndoatoasoɛ mɔ.

¹⁶Nakoso nyɛle m’adwene kyɛ mepena kyɛ mete sɔ nikyee ne abo ne, nwuni kyɛ ɔte adwuma bɔ ɔyɛ se paa ɔ,

¹⁷kɔpem kyɛ ngɔle Nyameɛ nekaa krongron berɛ, ná nwuni kyɛbɔ okosi koyie bɛ ɔ.

¹⁸Amba, ɛfa bɛ gyina nekaa bɔ ɔyɛ ndono ɔ, ɛmaa befi ase ma b’ayieleɛ yie bɛ.

¹⁹Nea, b’ayieleɛ yie bɛ mvum nu, bɔ amaneɛ ama bɛ boso anua koraa!

²⁰Sɛ sona da dwɔso a, bɛte kyɛ laleɛ bie, yeɛ wɔ AWURADE koso, sɛ ɛkekã wɔ nwo a, ebu bɛ kyɛ laleɛ bie.

²¹Mmerɛ bɔ me kra lili aworabɔlɛ ne, mmerɛ bɔ mmotole ne,

²²né nde kyɛ sona kwaseaa bɔ ɔnze hwee ɔ, nyɛle kyɛ kaka bie wɔ wɔ nye so.

²³Nakoso me de, ngɔtena wɔ nwo daa; etira me sa famaa ne anu.

²⁴Ɛfa wɔ foɛtulɛ ekyire me atee, na ye si ye, ekole me kɔhɔ animnyam nu.

²⁵Nwa yeɛ nne ye wɔ nyameɛso ɔ, sana wɔ ala? Yeɛ membena hwee wɔ aseɛ ye aso, sana wɔ ala.

²⁶Me nwonaen ne m’ahone kɔyɛ mmerɛ de, nakoso Nyameɛ yeɛ ɔte m’ahone anwoserɛ ne me kyɛfa afebɔɔ ɔ.

²⁷Ofikyɛ amba, bɛ bɔ bɛtwe bɛ nwo befi wɔ nwo ne, bɛ boso konua, na bɛ bɔ bɛyakyi wɔ si lilɛ bɛtwe bɛ nwo befi wɔ nwo ne, enua bɛ boso.

²⁸Nakoso me de, ɔte paa ma me kyɛ ngopingye Nyameɛ ɔ; mafa AWURADE Nyameɛ mayɛ m’afealeɛ, amaa ɔnate so mabɔ wɔ nnwumaa mukoraa nwo dawure.