Read Sehwi Edwein 74 Bible Online

Edwein 74 - Sehwi bible

Edwein 74

¹Asafe dwein Ao Nyameɛ, nzu ati yeɛ apo yɛ afebɔɔ ye? Wɔ bɔbɔ wɔ mmoaen bɔ ɛma bɛ aleɛ ne, nzu ati yeɛ afɛ yɛ so yaa kandinga ye?

²Kaye wɔ mmenia bɔ ɛtɔle bɛ tetetete ne, bɛ bɔ ɛpɔle bɛ fale bɛ yɛle abusua kure bɔ ɔte w’agyapadeɛ ne. Kaye Sion bokaa bɔ aatena so ne.

³Tu agyirɛ bra nekaa bɔ wakakyi kurofoen bɔkɔɔ ne; pɔfoɛ ne wasɛkye nekaa krongron berɛ nningyein amukoraa.

⁴Bɛ bɔ bekyi wɔ ne, bɛbɔ ese wɔ wɔ nekaa krongron berɛ; bafa bɛ ngonim frangaa mɔ bapenapena berɛ.

⁵Bɛte kyɛ mmenia bɔ betiratira akumaa, bɔ bebu mmakaa wɔ ɛhɔayeɛ nu ɔ.

⁶Na afei bele akumaa ne bɔsobaka babubu nu nningyein bɔ base amukoraa.

⁷Bato wɔ nekaa krongron ne anu see; bafa efiɛ bahã wɔ dumaa krongron atenaleɛ ne, na badwiri bagua ase.

⁸Bɛhane ye wɔ bɛ ti anu kyɛ, “Yɛkoli bɛ so ngonim bɔkɔɔ,” na bayera Nyameɛ nyianu nekaa biala wɔ aseɛ ne aso.

⁹Yɛnnwu yɛ frangaa nemɔ; ngɔmhyɛlɛniɛ biala nne berɛ ko; na yɛ nu biala nze kyẽa bɔ ɛhe bo kɔpɛ ɔ.

¹⁰Ao Nyameɛ, bɛ bɔ bekyi wɔ ne, kyinzu koraa yeɛ bɛ ngorohoɛ ne okoodwu ɔ? Pɔfoɛ ne, aso ɔkɔsɛkye wɔ dumaa afebɔɔ anaa?

¹¹Nzu ati yeɛ ahwe w’anwoserɛ asaa ne asa ye? Nzu ati yeɛ afa wɔ sa ne agua wɔ hue so ye?

¹²Nakoso Nyameɛ, ɛte me hene fi tete bɔ ede ngoa wɔ aseɛ ye aso ɔ.

¹³Wɔ tumi yeɛ ɛfa pakyepakyele ɛpo nu ɔ, na wɔ yeɛ ɛpɛkyɛle sasrabɔnzam nemɔ ti wɔ nzue nemɔ anu ɔ.

¹⁴Ɛlɛngyɛen ne, ɛgorɔgorɔle ye ti nemɔ, na ɛfa mane ɛserɛsofoɛ maa belili.

¹⁵Ebukyele asue mɔ ne asue ba mɔ maa bɛtengyɛle, nakoso ɛmane asue mbiri mɔ bɛwewele.

¹⁶Alehyeleɛ te wɔ deɛ, yeɛ alesaleɛ koso te wɔ deɛ; ɛsraen ne eyia koso, wɔ yeɛ ɛfale bɛ tuatuale berɛ ɔ.

¹⁷Wɔ yeɛ ɛtole aseɛ ye noa amukoraa ɛwɛen ɔ, wɔ yeɛ ɛhyehyɛle ahuhuro ne prakasua mmerɛ ɔ.

¹⁸Ao AWURADE, kaye ɛhe: kyɛbɔ pɔfoɛ ne ɔyɛ ngorohoɛ ɔ, ɔne kyɛbɔ ngwaseafoɛ begua wɔ dumaa nwo fiɛ ɔ.

¹⁹W’aborɔma ne, nnɛfa ye kra wura ngaka aboyaa mɔ sa; yeɛ wɔ mmenia bɔ bɛyɛ anwumvo ne, nnɛma wɔ wora fi bɛ ngoa le.

²⁰Kaye apam ne, ofikyɛ aseɛ ne aso nekaa bɔ wayɛ awosii kabii ne, nzɛmmɔnelilɛ ayi berɛ tɛkyɛ.

²¹Sona bɔ bɛhyɛ ye so ne, nnɛmaa ɔfa animguaseɛ osa ba, yeɛ ehiafoɛ ne bɛ bɔ bɛyɛ anwumvo ne, odi kyɛ bɛye wɔ dumaa ayɛ.

²²Ao Nyameɛ, dwɔso, dwudwo nu maa benwu kyɛ edi be; kaye kyɛbɔ ngwaseafoɛ bɛgoro wɔ nwo daa biala ɔ.

²³Nnɛma wɔ wora fi bɔ wɔ pɔfoɛ mɔ bɛkekã ɔ, ɔne mmenia bɔ bekyi wɔ ne, bɛ gyegyegyegye bɔ ɔkɔ anwuro daa ne.