Read Sehwi Edwein 78 Bible Online

Edwein 78 - Sehwi bible

Edwein 78

¹Asafe dwein Ao me maen, ɛ́mɔtie me ngyerɛkyerɛ; ɛ́mɔyɛ asoɛ betie me noa dwirɛ!

²Ngobukye me noa ngobu anyandera. Ngɔhã tete dwirɛ bɔ ye bo telɛ yɛ se ɔ,

³edwirɛ bɔ yate ná yanwu ye, bɔ yɛ nana mɔ bahã bahyire yɛ ɔ.

⁴Yɛngɔfa yɛngɔfea bɛ mma mɔ, na mmom aworɛ ndoatoasoɛ bɔ ɔba ye, yɛkɔhã yɛkohyire bɛ: AWURADE animnyam nnwumaa ne ye tumi, ɔne anwanwadeɛ mɔ bɔ wayɔ ɔ.

⁵Ɔhyehyɛle ahyɛdeɛ wɔ Yakob nu, na ɔhyɛle mmeraa wɔ Yisrael nu. Ɔfa yɛle ahyɛdeɛ mane yɛ nana mɔ, kyɛ bɛfa behyirehyire bɛ mma mɔ,

⁶amaa ɔnate so aworɛ ndoatoasoɛ bɔ ɔkɔwa ne, bɔ bɛ ole ngwadaa bɔ bennya bɛwwole bɛ ne, banwu mmeraa ne, ná badwɔso bahã bahyire bɛ maa mɔ,

⁷amaa ɔnate so bafa bɛ wora bawura Nyameɛ nu, ná bɛ wora amvi Nyameɛ sa noa nnwumaa, na mmom bali ye mmeraa dwirɛ so.

⁸Ɛhe kɔmaa bɛngɔyɛ kyɛ bɛ nana mɔ, bɔ né bɛte aworɛ ndoatoasoɛ asoserɛfoɛ bɔ bayɛ lɔen ɔ, aworɛ ndoatoasoɛ bɔ bamva bɛ nwo bando Nyameɛ so, bɔ bɛ sunzum wanni nahorɛ wamma Nyameɛ ɔ.

⁹Efraimfoɛ koɛhonɛfoɛ bɔ betiratira agyaen ɔ, bɛnwati befili koɛ noa koɛhonɛ kyẽa ne.

¹⁰Banni Nyameɛ apam ne aso, yeɛ bɛyɛle b’adwene kyɛ bengoli mmeraa ne aso.

¹¹Bɛmane bɛ wora fili bɔ wayɔ ɔ, ɔne anwanwadeɛ mɔ bɔ wala ye ali wahyire bɛ ɔ.

¹² Ɔyɔle anwanwadeɛ mɔ bɔ bɛ nana mɔ bɛ nye tua ɔ, wɔ Misraim aseɛ so, wɔ Soan aseɛ pralaa ne aso.

¹³Ɔpakyele ɛpo nu maa bɛfale nu, na ɔmane nzue ne boale ye noa gyinane berɛ kyɛ fasue.

¹⁴Alehyeleɛ nu, né ɔfa munungum di bɛ nyunu, na alesaleɛ nu amukoraa, né ɔfa see bɔ ogye wuronyiwuronyi yeɛ odi bɛ nyunu ɔ.

¹⁵Odwudwale nyɔbotaen mɔ nu wɔ ɛserɛ ne aso, na ɔmane bɛ nzue pee kyɛ buma nu nzue maa bɛnone.

¹⁶Ɔmane asue mɔ pukyele fili nyɔbotaen ne anu, na ɔmane nzue tengyɛle kyɛ asue.

¹⁷Nakoso bɛhɔle so bɛyɔle bɔne betiale ye, na bɛyɔle Anwuro Anwuro Nyameɛ ne nwo lɔen wɔ ɛserɛ ne aso.

¹⁸Besole Nyameɛ bɛneane wɔ b’ahone nu, ofikyɛ bebisale aleɛ bɔ bɛ komvi wɔ so ɔ kitii.

¹⁹Bedwudwo betiale Nyameɛ kyɛ, “Aso Nyameɛ kɔhora kɔma yɛ aleɛ wɔ ɛserɛ so?

²⁰Ɔpakyele nyɔbotaen nu mane nzue pu wale, na asue mɔ yi bu fale so de, nakoso aso ɔkɔhora kɔma aleɛ, anaa naen bɔ ɔkɔso ye maen ɔ?”

²¹Yiti AWURADE tele sɔ dwirɛ nen, ye ahone huli paa, ye yaa sɔle kyɛ see tiale Yakob, ye ahone huli Yisrael so paa,

²²ofikyɛ banne Nyameɛ banni, na bamva bɛ wora banwura ye ngoalelɛ ne anu.

²³Nakoso ɔhyɛle ewienu bɔ ɔwɔ anwuro, na obukyele nyameɛso anoa nemɔ;

²⁴na ɔtɔle manna kyɛ esue guale bɛ so kyɛ beli, na ɔmane bɛ nyameɛso aleɛ.

²⁵Adasa mmaa belili abɔfo aleɛ; Nyameɛ mane bɛ aleɛ maa obuli bɛ so.

²⁶Ɔmane eyia afiteleɛ mvrama bɔle wɔ ewienu, na ɔnate ye tumi so mane ngwaen dɔ mvrama bɔle.

²⁷Ɔtɔle naen guale bɛ so kyɛ mvuture, ɔne nnomaa bɔ bele ndaa kyɛ mboanoa anweaa.

²⁸Ɔmaa bɛtete beguale b’asikyeleɛ ne anu bɛpɛle b’atenaleɛ nemɔ anwo bɛbra beyiale.

²⁹Belili mane bɛ ko yili paa, ofikyɛ ɔmane bɛ bɔ bɛ komvi wɔ so ɔ.

³⁰Nakoso mmerɛ bɔ né bɛ komvi tɛwɔ so, bɔ né aleɛ ne tɛ wura bɛ noa nu ne,

³¹Nyameɛ fɛle bɛ so yaa, ohuhuni bɛ nu anwoserɛfoɛ nemɔ, na ɔbobɔle Yisraelfoɛ mmerandeɛ nemɔ guale berɛ.

³²Nakoso ɛhe amukoraa si ne, bɛhɔle so bɛyɔle bɔne, banne ye anwanwadeɛ ne banni.

³³Yiti ɔpɛle bɛ ngoa so kyɛ nwomeɛ, bɔ b’afoɛ bɔ wahã ne ɔɔyɛle ahunundetelɛ ɔ.

³⁴Ohuhuni bɛ ne, bɛpenane ye si atee; bɛsakyerale b’adwene bɛpenane Nyameɛ si atee yé paa.

³⁵Afei bɛkayele kyɛ Nyameɛ yeɛ ɔte bɛ nyɔbotaen ɔ, na Anwuro Anwuro Nyameɛ yeɛ ɔte bɛ Defoɛ ɔ.

³⁶Nakoso bɛ noa yeɛ bɛfa bɛdɛfɛdɛfɛle ye ɔ, nnakannaka dwirɛ yeɛ bɛkã bekyire ye ɔ.

³⁷B’ahone nu, banni nahorɛ bamma ye, banni ye apam ne anwo nahorɛ.

³⁸Nakoso ɔnate kyɛ ɔse anwumvoin ne ati, ɔfale b’amumuyɛɛ hyɛle bɛ, na wangukũ bɛ. Né ɔtaa ɔtwe ye yaa sa nziɛ, na wamva ye yaa ne amukoraa wangua bɛ so.

³⁹Ɔkayele kyɛ bɛte kuro mmenia, bɛte kyɛ mvrama bɔ ɔpɛ nu kɔ bɔ onza mma ko ɔ.

⁴⁰Amba, bɛyɛle ye nwo lɔen wɔ ɛserɛ so mmerɛ pee, na bɛmane ye wora bɔle wɔ ɛserɛ so!

⁴¹Besole Nyameɛ bɛneane mmerɛ pee, na bewurale Yisrael Krongronniɛ ne apue.

⁴²Bangaye ye tumi ne, anaa kyẽa bɔ olele bɛ fili pɔfoɛ ne sa nu ɔ,

⁴³mmerɛ bɔ ɔyɔle ye nzɛngyerɛnneɛ wɔ Misraim, ɔne ye anwanwadeɛ wɔ Soan aseɛ pralaa so ne.

⁴⁴Ɔkakyili b’asue mɔ mogya, amaa ɔnate so bangora banno b’asue ba mɔ nu nzue.

⁴⁵Ɔsomane atuin pembepembe paa wɔ bɛ berɛ maa bɛɛkekale bɛ, ɔne mborohyɛen maa bɛɛteeteele bɛ.

⁴⁶Ɔmane nduro mɔ lili bɛ fieso nningyein, na ɔmane mmɛbɛ lili aleɛ bɔ bafɛ ye nwo banya ne koso.

⁴⁷Ɔtɔle asukɔtwea fa sɛkyele bɛ bobe mɔ, na ɔfale ɛborɔ sɛkyele b’akyea mmakaa mɔ.

⁴⁸Ɔtɔle asukɔtwea huhuni bɛ nandwie mɔ, yeɛ ɔtetele agralaa huhuni bɛ mmoaen mɔ.

⁴⁹Ɔsomane ye ahonehulɛ piri, ye yaafɛlɛ piri, anyeborolɛ ne amaneɛ, yeɛ abɔfo kure bɔ bɛsɛkye nningyein ɔ maa bɛhɔle bɛ so.

⁵⁰Ɔmane ye nye borole bɛ so, wambepɛ wanne bɛ wamvi ewue sa nu, na mmom ɔfale bɛ ngoa wurale ɛhawo piri ne sa.

⁵¹Misraimfoɛ bamuɛbaa amukoraa, bɔ bɛte bɛ bienzua nu anwoserɛ bɔ oli moa ne, ohuhuni bɛ wɔ Ham ɛtena sua nemɔ anu.

⁵²Na afei olili ye mmenia nyunu kyɛ mmoaen, na ohyirele bɛ atee kyɛ mmoaen kure wɔ ɛserɛ ne aso.

⁵³Olili bɛ nyunu wɔ asomdwee nu ma yiti banzuro, nakoso bɛ pɔfoɛ mɔ de, ɛpo ne bu fale bɛ so.

⁵⁴Ɔfale bɛ wale ye aseɛ krongron ne aso, bokaa bɔ ye tumi asaa ne waho wale ne aso.

⁵⁵Ɔfoane maen maen mɔ fili bɛ nyunu; ɔhyɛle b’aseɛ maa bɛfa bɛyɛle b’agyapadeɛ, na ɔmane Yisrael mmusua kure nemɔ bɛtenatenane b’ɛtena sua nemɔ anu.

⁵⁶Nakoso besole Anwuro Anwuro Nyameɛ ne bɛneane, bɛyɛle ye nwo lɔen. Banni ye noa dwirɛ so,

⁵⁷na mmom belili ye nwo makyebu, na banni nahorɛ kyɛbɔ bɛ nana mɔ yɔle ne ala; bɛmane bɛ bra hyeale kyɛ agyaen bɔ wakondo ɔ.

⁵⁸Ofikyɛ bɛfale b’asɔneyɛɛ nemɔ bewurale ye apue maa ɔfɛle yaa; na b’amoen nemɔ ati, Nyameɛ hwene bɛ nwo nungunɛ.

⁵⁹Nyameɛ nwuni ye sɔ ne, ɔfɛle yaa paa, na ɔpole Yisrael koraa.

⁶⁰Ye atenaleɛ bɔ ɔwɔ Silo, ɛtena sua bɔ ɔtenane nu wɔ adasa mmaa nu ne, ɔpole ye.

⁶¹Ɔmaa bɛhyele ye anwoserɛ[13] ne nnure, yeɛ ɔfale ye animnyam wurale ye pɔfoɛ sa.

⁶²Ɔmane ye mmenia totɔle ngrandɛ noa, na ɔfɛle ye agyapadeɛ so yaa piri paa.

⁶³See yerale bɛ mmerandeɛ mɔ, na ye sɔ ti, bɛ ndaluwa mɔ bannya ebiala maa wangya bɛ.

⁶⁴B’asɔfo mɔ totɔle ngrandɛ noa, bɔ bɛ kunafoɛ mɔ bangora banzu bɛ ɔ.

⁶⁵Yeɛ AWURADE dwɔsole kyɛ sona bɔ ofi nnaa nu ɔ, kyɛ anwoserɛniɛ bɔ nzaa maa ɔteatea nu ɔ.

⁶⁶Ohuhuni ye pɔfoɛ mɔ pasapasa, na oguale bɛ nyunu ase afebɔɔ.

⁶⁷Ɔpole Yosef ɛtena sua ne, na ɔneaneane nu ne, wanye Efraim abusua kure;

⁶⁸na mmom ɔneaneane nu yele Yuda abusua kure, bɔ ye ole Sion bokaa bɔ okuro ye dwirɛ ne.

⁶⁹Osili ye nekaa krongron bɔ ɔte kyɛ nyameɛso anwuro anwuro ne, bɔ ɔte kyɛ aseɛ bɔ wafa watimu berɛ afebɔɔ ne.

⁷⁰Ɔneaneane nu yele ye somvoɛ Dawide, ɔyele ye fili mmoaen so nealɛ nu,

⁷¹mmoaen bɔ bɛma bɛ mma nyɔfone ne, ɔmaa ɔyakyili bɛ so nealɛ, kyɛ ɔɔnea ye maen Yakob, bɔ ye ole Yisrael bɔ ɔte ye agyapadeɛ ne aso.

⁷²Dawide yele ye ti anu fitaa neane bɛ so, na ɔfale nimdeɛ atee so lili bɛ nyunu.