Read Sehwi Edwein 86 Bible Online

Edwein 86 - Sehwi bible

Edwein 86

¹Dawide dwein Ao AWURADE, yɛ asoɛ tie me, ná bua me, ofikyɛ wahia me, yeɛ meyɛ anwumvo.

²Bɔ me ngoa nwo waen, ofikyɛ me nwo te. Wɔ yeɛ ɛte me Nyameɛ ɔ; pepɛ de wɔ somvoɛ bɔ wafa ye wora wawura wɔ nu ne.

³Ao AWURADE, nwu me anwumvoin, ofikyɛ wɔ yeɛ daa mesu mefrɛ wɔ ɔ.

⁴Ma wɔ somvoɛ ye kra nye gye, ofikyɛ ao AWURADE, wɔ yeɛ mema me kra sũ frɛ wɔ ɔ.

⁵Ao AWURADE, ɛte paa, na ɛfa bɔne kyɛ; wɔ ɔdɔ bɔ onni ngasi ne ɔsone ma bɛ bɔ besu bɛfrɛ wɔ ɔ.

⁶Ao AWURADE, mesrɛ wɔ, tie me mbaeɛ; tie me sufrɛ bɔ ofi me noa ne.

⁷M’anwokyere mmerɛ nu, mesu mefrɛ wɔ, ofikyɛ ebua me.

⁸Ao AWURADE, ebiala ne wɔ bɛnzɛ wɔ nyameɛ mɔ nu, na ebiala ngɔhora ngɔfa ye sa noa nnwumaa ngɔtoto wɔ deɛ nwo.

⁹Ao AWURADE, amaen maen amukoraa bɔ ɛyɔle ne, bɛkɔwa bɛkɔɔbɔ bɛ nu ase wɔ wɔ nyunu, ná bahyɛ wɔ dumaa animnyam.

¹⁰Ofikyɛ ɛte piri, na ɛyɔ anwanwadeɛ, wɔ ngome yeɛ ɛte Nyameɛ ɔ.

¹¹Ao AWURADE, kyire me w’atee ne, amaa ɔnate so mali wɔ nahorɛ dwirɛ ne aso. Maa nzi m’adwene pi mva nzuro wɔ dumaa.

¹²Ao AWURADE me Nyameɛ, ngɔfa m’ahone amukoraa ngɔye wɔ ayɛ, na ngɔhyɛ wɔ dumaa animnyam afebɔɔ.

¹³Ofikyɛ wɔ ɔdɔ bɔ onni ngasi bɔ ɛye ye ali kyire me ne, ɔte piri, na apepɛ ale me kra afi ɛborɔ kumaa nu.

¹⁴Ao Nyameɛ, anwomasoɛfoɛ badwɔso batia me, atianuserɛfoɛ bɛpena me beku me, na bɛmva wɔ bɛnyɛ huu.

¹⁵Nakoso, ao AWURADE, ɛte Nyameɛ bɔ ɛse anwumvoin ná ɛdo mmenia ɔ; w’ahone nhu ndɛ, na wɔ ɔdɔ bɔ onni ngasi ne wɔ nahorɛlilɛ ne, ɔsone.

¹⁶Baanea me ná nwu me anwumvoin; fa w’anwoserɛ ne ma wɔ somvoɛ, ná pepɛ de w’afaneɛ awa ne.

¹⁷Kyire me wɔ ɛlolɛ ne nwo sɛngyerɛnneɛ, amaa ɔnate so me pɔfoɛ mɔ banwu ye ná bafɛre, ofikyɛ AWURADE, wɔ yeɛ aboka me akyekye me wora ɔ.