Read Sehwi Edwein 88 Bible Online

Edwein 88 - Sehwi bible

Edwein 88

¹Kora boso ama dwein. Bɛfa bɛmane edweinhyirelɛniɛ ne Ao AWURADE, me ngoadefoɛ Nyameɛ, mesu wɔ wɔ nyunu eyia ne kɔngɔen.

²Ma me mbaeɛ odwu wɔ nyunu, yɛ asoɛ tie me sufrɛ.

³Ofikyɛ amaneɛ pee atoto me kra, na me kra apingye ɛborɔ.

⁴Bebu me bɛfra bɛ bɔ bapingye ɛborɔ kumaa ne, nde kyɛ sona bɔ olle mmokalɛ biala ɔ.

⁵Mayɛ kyɛ ebie bɔ bayakyi ye bato awufoɛ nu ɔ, kyɛ bɛ bɔ bahu bɛ bagua asieleɛ kumaa nu ɔ, kyɛ bɛ bɔ ɛngaye bɛ ko, bɔ aye wɔ sa afi bɛ bo ɔ.

⁶Agyi me ato ɛborɔ kumaa kuronn ne anu, wɔ nekaa kuronn tunn ne anu dɔ.

⁷Afɛ me so yaa piri, na ɛma w’asorɔkye amukoraa bungam fa me so. Sela

⁸Ama me mmango mɔ bapo me, amaa makakyi bɛ nye so akyiwadeɛ bie. Bato me nu bɔ mengora fite ɔ.

⁹Aworabɔlɛ ama me nye mmaa apakye. Ao AWURADE, daa mesu mefrɛ wɔ; metrɛ me sa nu mebɔ mbaeɛ mekyire wɔ.

¹⁰Aso ɛyɔ anwanwadeɛ ma awufoɛ? Aso awufoɛ bɛkora bedwɔso bɛye wɔ ayɛ anaa? Sela

¹¹Wɔ ɔdɔ bɔ onni ngasi ne, aso asieleɛ kumaa nu yeɛ bɛbɔ ye nwo dawure ɔ, anaa bɛbɔ wɔ nahorɛlilɛ ne anwo dawure wɔ Abadɔn?

¹²Aso benwu w’anwanwadeɛ wɔ awosii ne anu, anaa benwu wɔ ngoalelɛ mmokalɛ ne wɔ aseɛ bɔ bɛngaye mmenia wɔ so ne aso?

¹³Nakoso ao AWURADE, wɔ yeɛ mesu mefrɛ wɔ ɔ, na me mbaeɛ dwu wɔ nyunu ngyerɛmɔ.

¹⁴Ao AWURADE, nzu ati yeɛ apo me kra ye? Nzu ati yeɛ aye wɔ nye afea me ye?

¹⁵Ofi me ngwadaa nu yeɛ manwu amaneɛ, bɔ ewue li me mvanvando ɔ; manwu amaneɛ piri wɔ wɔ sa nu, na meteetee.

¹⁶Wɔ yaa piri ne wabungam wafa me so, wɔ ɛteeteelɛ ne, wamaa mawu bɔkɔɔ.

¹⁷Daa biala bɛpɛ me nwo beyia kyɛ asue bɔ wayi ɔ; bɛbɔ nu bɛpɛ me nwo beyia.

¹⁸Ama m’adɔfo mɔ ne me damvo mɔ bapo me; na awosii yeɛ ɔte mmiɛngo ɔ.