Read Sehwi Edwein 89 Bible Online

Edwein 89 - Sehwi bible

Edwein 89

¹Ɛsraniɛ Etan dwein Ao AWURADE, ngɔto wɔ ɔdɔ bɔ onni ngasi ne anwo dwein daa, na ngɔte me noa ngɔbɔ wɔ nahorɛlilɛ ne anwo dawure ngohyire aworɛ ndoatoasoɛ amukoraa.

²Ofikyɛ mahã kyɛ, Ɔdɔ bɔ onni ngasi ne, ye bo atindim afebɔɔ; wɔ nahorɛlilɛ ne, ama ye bo atimu wɔ nyameɛso.

³Me ne me sona bɔ maneanea nu maye ye ne yayɛ apam, mata ndaen mahyire me somvoɛ Dawide kyɛ,

⁴‘Ngɔma wɔ boso ama bɛ bo kotimu afebɔɔ, na ngɔma w’ahennie ne abo kotimu aworɛ ndoatoasoɛ amukoraa nu.’ Sela

⁵Ao AWURADE, nyameɛso kɔkamvo w’anwanwadeɛ, bɛkamvo wɔ nahorɛlilɛ wɔ krongronfoɛ badwa nu.

⁶Ofikyɛ nwa yeɛ ɔwɔ ewienu bɔ bɛkɔfa ye bɛkɔtoto AWURADE nwo ɔ? Nyameɛsofoɛ mɔ, nwa yeɛ ɔte kyɛ AWURADE ɔ?

⁷Ɔte Nyameɛ bɔ besuro ye wɔ krongronfoɛ badwa nu ɔ, ɔte piri, na ye nwo yɛ suro tra bɛ bɔ bapɛ ye nwo bayia amukoraa.

⁸Ao AWURADE, Asafo Nyameɛ, nwa yeɛ ole anwoserɛ kyɛ wɔ ɔ, ao AWURADE? Wɔ nahorɛlilɛ apɛ wɔ nwo ayia.

⁹Ɛpo bɔ ohu bu fa so ne, wɔ yeɛ ele ye so tumi ɔ; sɛ ye asorɔkye bɔ a, wɔ yeɛ ɛmaa ɔyɛ dinn ɔ.

¹⁰Ɛpɛkyɛle Rahabo kyɛ naenmvuin, na ele wɔ tumi ne mane wɔ pɔfoɛ mɔ bɛbɔle aya.

¹¹Nyameɛso te wɔ deɛ, yeɛ aseɛ koso te wɔ deɛ; wiase ne nu nningyein amukoraa, wɔ yeɛ ɛbɔle bɛ ɔ.

¹²Wɔ yeɛ ɛbɔle sorɔ ne ngwaen[15] ɔ, Tabɔ ne Hɛmɔn bele anigye bɛye wɔ dumaa ayɛ.

¹³Ele tumi asaa; wɔ sa ne, anwoserɛ wɔ nu, apagya wɔ sa famaa ne aso.

¹⁴Tenenee ne ndɛenbualɛ turoloo te w’ahennie bia nyinasoɛ; ɔdɔ bɔ onni ngasi ɔne nahorɛlilɛ beli wɔ nyunu.

¹⁵Maen bɔ bɛse ayɛyelɛ nwo esebɔlɛ ne, benya saleɛ; bɛ yeɛ bɛnate wɔ nyunu hyireinn ne anu ɔ.

¹⁶Bedi ahurusi wɔ wɔ dumaa nu daa, na wɔ tenenee ne anu yeɛ oyie bɛ yé ɔ.

¹⁷Wɔ yeɛ ɛte b’anwoserɛ animnyam ɔ, na w’adom yeɛ ɔmaa yɛdi ngonim ɔ.

¹⁸Ofikyɛ AWURADE yeɛ ɔte y’akokyɛm ɔ, Yisrael Krongronniɛ ne yeɛ ɔte yɛ Hene ɔ.

¹⁹Mmerɛ bie, ɛnate nyekyire so dwudwo hyirele wɔ nahorɛniɛ ne kyɛ, “Mafa mmokalɛ mama ebie bɔ ye nwo yɛ se ɔ, na sona bɔ maneanea maen ne anu maye ye ne, mapagya ye.

²⁰Manwu me somvoɛ Dawide, mafa me ngoo krongron ne mapopa ye.

²¹Me tumi kogyina ye si, na m’abasa ne kɔma ye anwoserɛ.

²²Pɔfoɛ ne ngɔhora ngɔlakalaka ye, na bɔnefoɛ ne ngɔhora ngoli ye so.

²³Ngɔpɛkyɛ ye pɔfoɛ mɔ wɔ ye nyunu, ná mahũhũ bɛ bɔ bekyi ye ɔ.

²⁴Me nahorɛlilɛ ne me ɔdɔ bɔ onni ngasi ne, bekogyina ye si; na me dumaa nu yeɛ ɔkɔhɔ so konya anwoserɛ ɔ.

²⁵Ngɔmaa ye sa konya ɛpo so tumi, ná mama ye sa famaa anya asue mɔ so tumi.

²⁶Okose me kyɛ, ‘Wɔ yeɛ ɛte me baba, me Nyameɛ ne me ngoalelɛ Nyɔbotaen ɔ!

²⁷ Ngɔfa ye ngɔyɛ me bamuɛbaa, aseɛ so ahemvo amukoraa bɛ nu titire paa.

²⁸Ngɔye me ɔdɔ bɔ onni ngasi ne ali ngohyire ye afebɔɔ, na m’apam ne bo kotindim kɔma ye.

²⁹Ngɔma ye boso ama bekoli hene afebɔɔ, na kyɛ nyameɛso tɛwɔ berɛ ye de, ye ahennie kɔtena berɛ.

³⁰Na sɛ ye boso ama bɛpo me mmeraa ne, ná bamva me nhyehyɛleɛ bammɔ bɛ bra,

³¹sɛ betwi bɛfa m’ahyɛdeɛ so, ná bandie me mmeraa dwirɛ a,

³²ye de ngɔfa mbire ngɔhwe bɛ so wɔ bɛ mmeraatolɛ nwo, ná mafa bakaa mahwe bɛ so wɔ b’amumuyɛɛ nwo.

³³Nakoso mengɔye me ɔdɔ bɔ onni ngasi ne mengofi ye so, yeɛ mengɔkakyi me si mengɔma me nahorɛlilɛ ne.

³⁴Mengobu m’apam ne aso, yeɛ mengɔsesã me noa.

³⁵Mafa me krongronyɛlɛ mata ndaen komapɛ twe; mengɔpɛ anoanu mengohyire Dawide.

³⁶Ye boso ama koli hene afebɔɔ, na kyɛ eyia tɛwɔ berɛ ye de, ye ahennie kɔtena berɛ wɔ me nyunu.

³⁷Okotimu afebɔɔ kyɛ ɛsraen, bɔ ɔte adanzeniɛ nahorɛniɛ bɔ ɔwɔ ewienu ɔ.

³⁸Nakoso ato ye aye apo ye; afɛ wɔ sona bɔ apopa ye ngoo ne aso ɛyaa piri paa.

³⁹W’apam bɔ ɛne wɔ somvoɛ bayɛ ne, afa ato ahameɛ, ye ahennie abotire ne, agyi ato ase agua ye nwo fiɛ.

⁴⁰Abɔngyebɔngye ye fasue amukoraa nu ndokuro, na adwiri ye anwoserɛ afealeɛ mɔ agua ase.

⁴¹Bɛ bɔ bɛpɛ nu berɛ bɛkɔ ne, bɛfẽ ye nningyein; wayɛ ngorohoɛ dwirɛ wɔ ye mmango nu.

⁴²Ama bɛ bɔ bɛhyɛ ye so ne bali ye so ngonim, ama ye pɔfoɛ amukoraa bali ahurusi.

⁴³Afei koso, ama ye ngrandɛ noa atiri, na angyina ye si wɔ koɛ nu.

⁴⁴Ale ɛhɔtɔ ne afi ye sa nu, yeɛ afindi ye ahennie bia ne ato ase.

⁴⁵Apɛ ye animnyam mmerɛ so; yeɛ amaa animguaseɛ abia ye. Sela

⁴⁶Ao AWURADE, ɛkɔfa wɔ nwo kɔfea maa okoodwu kyinzu? W’ahone kohu kogye kyɛ see maa okoodwu kyinzu?

⁴⁷Kaye kyɛbɔ me ngoa si te tikaape ɔ, kyɛbɔ ɛbɔle adasa mmaa mane nningyein bɔ ɔte mbaen ɔ!

⁴⁸Dasaniɛ beni yeɛ ɔkɔhora kɔtena ase alaa bɔ ongowu ɔ? Nwa yeɛ ɔkɔhora kole ye kra kofi ɛborɔ sa nu ɔ? Sela

⁴⁹AWURADE, wɔ daa tete ɔdɔ bɔ onni ngasi ne, ɔwɔ nisua, ɔdɔ bɔ ɛnate wɔ nahorɛlilɛ so ɛfa tale ndaen hyirele Dawide ne?

⁵⁰Ao AWURADE, kaye kyɛbɔ besi bɛgoro w’akoaa nwo ɔ, kyɛbɔ mesi mede maen maen amukoraa b’alapaa megua me wereɛ nu ɔ.

⁵¹Ao AWURADE, nea anyinga bɔ wɔ pɔfoɛ mɔ bɛkã ɔ, kyɛ bɛsere wɔ sona bɔ apopa ye ngoo ne, ye agyirɛ bɔ otu ɔ.

⁵²Animnyam hã AWURADE afebɔɔ, Amen! Amen!