Read Sehwi Edwein 90 Bible Online

Edwein 90 - Sehwi bible

Edwein 90

¹Nyameɛ sona Mose mbaeɛ AWURADE, wɔ yeɛ ɛte y’afealeɛ wɔ aworɛ ndoatoasoɛ amukoraa nu ɔ.

²Anzana ɛbaabɔ mmokaa mɔ ne, anaa ɛbaahyehyɛ aseɛ ne wiase ne, ofi tete bɔ ɔkwaadwu afebɔɔ, ɛte Nyameɛ.

³Esa ma dasaniɛ kakyi mvuture, na ɛkã kyɛ, “Adasa mmaa, ɛmɔsa bɛbra ɛmɔ mvuture nu.”

⁴ Ofikyɛ wɔ nye so de, afoɛ apee, ɔte kyɛ anoma ala bɔ wapɛ nu ɔ, anaakyɛ kɔngɔen abunnamu.

⁵Ɛpra adasa mmaa bo egyi bɛ gua; bɛte kyɛ laleɛ, kyɛ ndire bɔ ofifi frɔmfrɔm ngyerɛmɔ ɔ;

⁶ofifi ngyerɛmɔ yɛ frɔmfrɔm, nakoso odwu nɔsoa a, ɔkese, na ɔyera.

⁷Ofikyɛ wɔ yaafɛlɛ ne kũkũ yɛ, na w’ahonehulɛ ne fa yɛ kɔ amaneɛ nu.

⁸Afa y’amumuyɛɛ agua wɔ nyunu, na afa yɛ mvealeɛ nu bɔne awa wɔ nyunu hyireinn ne anu.

⁹Ofikyɛ yɛ ngyẽa amukoraa pɛ nu kɔ bɔ afɛ yɛ so yaa ɔ, na y’afoɛ bɔ yɛdi ne ɔba ayieleɛ kyɛ ɛhoaa bie.

¹⁰Ngyẽa bɔ yɛdi ye aseɛ ye aso te afoɛ aburasoo, anaa sɛ anwoserɛ wɔ nu po a, ɔte afoɛ aburawɔtwɛ, na ɛhene po, nu fɛɛ ne amaneɛ! Ɔngyɛ né wapɛ nu, ná yatu yamini.

¹¹Nwa yeɛ ɔse wɔ ɛyaafɛlɛ ne noa hyerɛ ɔ? W’ahonehulɛ ne, ɔne esurolɛ bɔ odi kyɛ besuro wɔ ne, bɛte pɛ.

¹²Yiti kyire yɛ maa yɛnwu kyɛbɔ yɛkosi yɛkɔha yɛ ngyẽa ɔ, amaa ɔnate so yafa nworɛ yabɔ yɛ bra.

¹³Ao AWURADE, sa baanea yɛ! Okoodwu kyinzu? Nwu wɔ somvoɛ mɔ anwumvoin!

¹⁴Wɔ ɔdɔ bɔ onni ngasi ne, maa obu so ma yɛ ngyerɛmɔ, amaa ɔnate so yali ahurusi ná yɛ nye agye wɔ yɛ ngyẽa amukoraa nu.

¹⁵Maa yɛ nye gye, kyɛbɔ ngyẽa bɔ afa ahwe yɛ so ne, ye somaa te ɔ, kyɛbɔ afoɛ bɔ yanwu amaneɛ ne, ye somaa te ɔ.

¹⁶Ma wɔ somvoɛ mɔ benwu wɔ nnwumaa, w’animnyam ne, ye ye ali kyire bɛ mma mɔ.

¹⁷Mesrɛ kyɛ AWURADE yɛ Nyameɛ adom ne ɔbra yɛ so, ma yɛ sa noa adwuma ɔ́yɛ yee ɔ́ma yɛ. Ao, ma yɛ sa noa nnwumaa ɔ́yɛ yee!