Read Sehwi Edwein 97 Bible Online

Edwein 97 - Sehwi bible

Edwein 97

¹AWURADE di hene! Aseɛ, di ahurusi; mboanoa worawora mɔ, ɛ́mɔma ɛmɔ nye gye!

²Munungum ne awosii kabii bapɛ ye nwo bayia; tenenee ne ndɛenbualɛ turoloo, bɛte ye ahennie bia nyinasoɛ.

³See li ye nyunu, na ɔyera ye pɔfoɛ mɔ bra yia.

⁴Ye agralaa ta wiase; aseɛ nwu ye, na ye nwo wosowoso.

⁵Mmokaa huro kyɛ nguɛ wɔ AWURADE nyunu, wɔ aseɛ amukoraa AWURADE ye nyunu.

⁶Ewienu bɔ ye tenenee nwo dawure, na maen maen amukoraa nwu ye animnyam ne.

⁷Mmenia bɔ bɛsɔne mmosoen, bɔ bɛfa amoen mɔ bɛhoahoa bɛ nwo ne, bɛ mukoraa bɛ nyunu agua ase; nyameɛ mɔ amukoraa, odi kyɛ ɛmɔkoto ye.

⁸Ao AWURADE, Sion ɔte, na ye nye gye, yeɛ Yuda mma mmrasua bedi ahurusi, ɔnate wɔ ndɛenbualɛ nemɔ ati.

⁹Ofikyɛ AWURADE, wɔ yeɛ ɛte Anwuro Anwuroniɛ paa wɔ aseɛ amukoraa so ɔ; ɛte totohyia tra nyameɛ mɔ amukoraa.

¹⁰Ɛmɔ bɔ ɛmɔkuro AWURADE dwirɛ ne, odi kyɛ ɛmɔkyi bɔne; ɔbɔ ye anwoteefoɛ bɛ kra nwo waen, na ɔpepɛ de bɛ fi bɔnefoɛ mɔ sa nu.

¹¹Kanea ta ma teneneefoɛ, yeɛ bɛ bɔ b’ahone nu te ne koso, benya anigye.

¹²Ao ɛmɔ, teneneefoɛ, ɛmɔli ahurusi wɔ AWURADE nu, ná ɛ́mɔkaye ye krongronyɛlɛ wɔ mmerɛ bɔ ɛmɔfa ye asennaa bɛma ye ɔ!