Read Sehwi Anyandera 1 Bible Online

Anyandera 1 - Sehwi bible

Anyandera 1

¹ Yisrael hene Solomon, Dawide awa ne, ye anyandera mɔ bɔ obuli ne ɛhe.

²Anyandera nemɔ botaeɛ ole kyɛ: sona kɔfa so konwu nworɛ, ná okonya ngyerɛkyerɛ, ná ɔkɔte edwirɛ bɔ nu pi ɔ bo;

³kyɛ ɔkɔfa konya nworɛ dwirɛ nu ngyerɛkyerɛ, yeɛ tenenee, ndɛenbualɛ turoloo ne pɛpɛɛpɛyɛlɛ.

⁴Ɔma sona bɔ ye adwene te kãa ɔ onwu nworɛ, na ɔma mmerandeɛ nimdeɛ ne adwene nu bukyelɛ.

⁵Odi kyɛ nworɛfoɛ betie benya nimdeɛ pee, ná nimdeɛfoɛ koso fa so bɛma b’adwene nu pi,

⁶amaa ɔnate so bate anyandera ne nworɛ dwirɛ bo, nworɛfoɛ dwirɛ ne b’anyandera bo.

⁷ AWURADE surolɛ yeɛ ɔte nimdeɛnyanɛ ye bohyɛlɛ ɔ, na ngwaseafoɛ de, bɛmva nworɛ ne ngyerɛkyerɛ bɛnyɛ huu.

⁸Mma, tie wɔ baba dwirɛ, yeɛ nnɛpo wɔ maame foɛtulɛ,

⁹ofikyɛ bɛte animnyam abotire bɔ ɔbɔ wɔ ti ɔ, ɔne akomuade bɔ ɔya wɔ ɔ.

¹⁰Mma, sɛ bɔnefoɛ mɔ diedie wɔ kɔ bɔne nu a, nnɛpene so.

¹¹Sɛ bɛkã kyɛ, “Bra maa yɛɛtetɛ yɛli awue, bɛ bɔ bedi be ne, maa yɛɛtɛ atunu yɛhu bɛ mbaen;

¹²maa yɛhu bɛ anyekaenn so kyɛbɔ asieleɛ ɔme sona ɔ, maa yɛsie bɛ mumua ne kyɛbɔ mmenia kɔda ɛborɔ kumaa nu ɔ;

¹³yɛkonya nningyein bɔ bɛ nyɔboɛ yɛ se ɔ, na yɛkɔfa sɔ nzesadeɛ nemɔ yɛkogua yɛ awuro maa berɛ koyi tɛkyɛ;

¹⁴yiti fa wɔ nwo bɔ yɛ, na yɛ mukoraa yɛkɔhyɛ nningyein bɔ yɛkonya ye ne” a,

¹⁵mma, nnɛne bɛ bɔ afɛ. Nekaa bɔ bekotia ne, nnɛtia berɛ bie;

¹⁶ofikyɛ amirika yeɛ betu bekodi bɔne ɔ, na bɛma bɛ nwo yɛ nyera bedi awue.

¹⁷Ofikyɛ, sɛ anomaa biala nye tua kyɛ asua ye ngaen a, asua ngaen ne mbaen.

¹⁸Nakoso sɔ mmenia nemɔ bɛtetɛ bedi bɛ bɔbɔ bɛ nwo awue, na bɛtetɛ bekuku bɛ nwo.

¹⁹Sɔ yeɛ oyie mmenia mukoraa bɔ bɛpena anwonya wɔ atee tɛɛ so ɔ, na anwonya tɛɛ ne ɔpɛ ye nwo okũkũ bɛ.

²⁰ Nworɛ tea nu serɛserɛ wɔ mmorɔnoɛ mɔ so, wama ye komvi so wɔ dwaa nemɔ aso.

²¹Ɔtea nu wɔ nekaa bɔ mmenia ayɛ birikabirika, ɔtea nu wɔ kuro berɛ pambim ne anu kyɛ,

²²“Ɛmɔ bɔ ɛmɔ adwene te nganga ɔ, ɛmɔpena kyɛ ɛmɔ adwene yɛ nganga kodwu kyinzu? Ngorohoɛfoɛ nye kɔgye bɛ ngorohoɛ nwo koodwu kyinzu? Yeɛ ngwaseafoɛ kohyi nimdeɛ koodwu kyinzu?

²³Metwi ɛmɔ nyunu a, ɔsɛ kyɛ ɛmɔtie, ngɔhã m’ahone nu dwirɛ ngohyire ɛmɔ, na ngɔmaa ɛmɔkonwu me ti anu dwirɛ.

²⁴Na ɔnate kyɛ ndeane nu mvrɛle, ná ɛmɔammua me, mabɔ ɛmɔ ba, ná ebiala andɛ me so,

²⁵bɔ me foɛtulɛ amukoraa gua ɛmɔ so asi, ná ɛmɔmva ɛmɔ nyunu bɔ metwi ne bɛnyɛ huu ne ati,

²⁶me koso ngɔsere ɛmɔ wɔ ɛmɔ amaneɛnwunɛ nu; ahunundetelɛ tɔ ɛmɔ so a, ngɔgoro ɛmɔ nwo;

²⁷mmerɛ bɔ ahunundetelɛ kɔyɛ kyɛ mvrama piri kɔto ɛmɔ ne, mmerɛ bɔ amaneɛ kɔyɛ kyɛ mvrama bɔ ɔpɛ ye nwo kɔto ɛmɔ ne, mmerɛ bɔ aworabɔlɛ ne yealɛ kɔto ɛmɔ ne.

²⁸Afei bekosu bɛkɔfrɛ me, nakoso mengɔtɛ bɛ so, bɛkɔpena me paa, nakoso bengonwu me.

²⁹Ofikyɛ behyili nimdeɛ, banguro kyɛ bekosuro AWURADE,

³⁰bandie me foɛtulɛ ne anu biala, na bɛpole bɛ nyunu hwilɛ bɔ ndwili ne amukoraa.

³¹Yiti, bɛ yɔleɛ nwo akatuaa yeɛ bɛ sa kɔhã ye ɔ, na bɛ porɛ bɔ bɛbɔ ne, ɔkɔbɔ bɛ bɔbɔ bɛ ti so.

³²Ofikyɛ bɛ bɔ b’adwene te nganga ne, foɛtulɛ nwo asoserɛ yeɛ okohu bɛ ɔ, na ngwaseafoɛ bɛ yeeyɛlɛ yeɛ okohu bɛ ɔ.

³³Nakoso ebiala bɔ otie me dwirɛ de, ɔkɔtena asomdwee nu, okonya anwotɔ, na ye kunu ngɔtete ye kyɛ musue kɔto ye ɔ.”