Read Sehwi Anyandera 10 Bible Online

Anyandera 10 - Sehwi bible

Anyandera 10

¹ Solomon anyandera mɔ. Baa nworɛniɛ ma ye baba nye gye, nakoso baa kwaseaa de, ɔma ye maame wora bɔ.

²Anwonya bɔ amva atee paa so annya ye ne, mvasoɛ biala nne so, nakoso tenenee bra de, ode wɔ fi ewue nu.

³AWURADE mma ɛhɔen ngu teneneeniɛ kra, nakoso bɔnefoɛ de, ɔbɔ bɔ wanya ye ɔ ogua.

⁴Asaa bɔ ɔte foen ne, ɔne ehiaa yeɛ bɛnate ɔ, nakoso asaa bɔ okuro adwuma ne de, ɔmaa enya wɔ nwo.

⁵Sona bɔ ɔboaboa fieso aleɛ noa wawa mmerɛ ne, ɔte baa nworɛniɛ, nakoso bɔ ɔdafe wɔ mmerɛ bɔ bɛfa fieso aleɛ ne de, ɔte nyanzoen baa.

⁶Teneneeniɛ nya saleɛ, nakoso bɔnefoɛ de, ɔfa ye noa kata bɔne so.

⁷Teneneeniɛ nwo ngayeɛ ɔte saleɛ, nakoso bɔnefoɛ de, ye dumaa komini.

⁸Sona bɔ ɔse nworɛ ne, otie mmeraa dwirɛ, nakoso kwaseaa de, ye dwudwolɛ mbaen mbaen ne fa ye kɔ amaneɛ nu.

⁹Sona bɔ odi nahorɛ ne, ɔnate a ye nwo sonn, nakoso ebiala bɔ ɔnate atee tɛɛ so ne de, ye nwo dwirɛ kofite.

¹⁰Sona bɔ ɔbɔ ye nye kyire ne, ɔma mmenia nwu amaneɛ, na kwaseaa koso, ye dwudwolɛ mbaen mbaen ne fa ye kɔ amaneɛ nu.

¹¹Teneneeniɛ ye noa dwirɛ te ngoa asue ti, nakoso bɔnefoɛ de, ɔfa ye noa kata bɔne so.

¹² Ɛpɔen twetwe ngondii ba, nakoso ɔdɔ de, ɔkata mvomsoɛ amukoraa so.

¹³Sona bɔ ye adwene nu pi ne, nworɛ wɔ ye noa dwirɛ nu, nakoso sona bɔ adwene nne ye ti anu de, ye si fata mbire.

¹⁴Nworɛfoɛ boaboa nimdeɛ noa, nakoso kwaseaa de, ye noa dwirɛ twetwe ye kɔ amaneɛ nu.

¹⁵ Sikaniɛ anwonya yeɛ ɔte ye kuro bɔ wato ye nwo fasue ɔ, yeɛ ehianiɛ ye hiaa yeɛ ɔte ye aworabɔlɛ ɔ.

¹⁶Teneneeniɛ akatuaa fa ye kɔ ngoa nu, nakoso bɔnefoɛ de, ye mvasoɛ fa ye kɔ bɔne nu.

¹⁷Sona bɔ otie foɛtulɛ ne, ɔnate ngoa atee so, nakoso bɔ ɔpo bɛ nyunu hwilɛ ne de, odi makyebu fi atee ne aso.

¹⁸Bɔ ɔpɔ sona, nakoso ɔkatakata so ne, ɔnga nahorɛ, yeɛ bɔ ɔkekã obiɛngo nwo dwirɛ sɛkye ye ne, ɔte kwaseaa.

¹⁹Mvomsoɛ mba edwudwolɛ worawora nu, nakoso sona bɔ ondwudwo pee ne, ɔte nworɛniɛ.

²⁰Teneneeniɛ ye noa dwirɛ te kyɛ ɛdwetɛ paa, nakoso bɔnefoɛ adwene de, mvasoɛ biala nne so.

²¹Teneneeniɛ ye noa dwirɛ, mmeni pee fa nu aba, nakoso ngwaseafoɛ de, adwene nne bɛ ti anu, yiti bewuwu.

²²AWURADE saleɛ yeɛ ɔma sona nya ye nwo ɔ, na ɔmva aworabɔlɛ biala mmoka so.[1]

²³Amumuyɛɛyɔlɛ te kyɛ angorɛ wɔ kwaseaa nye so, nakoso sona bɔ ye adwene nu pi ne de, ye nye gye nworɛ nwo.

²⁴Bɔ bɔnefoɛ suro ne yeɛ ɔkɔto ye ɔ, nakoso teneneefoɛ de, bɛkɔyɔ bɔ bɛpena ɔ bɛkɔma bɛ.

²⁵Sɛ mvrama piri otu pɛ nu a, bɔnefoɛ boso mini, nakoso teneneeniɛ de, ɔte nyinasoɛ bɔ otimu berɛ daa ɔ.

²⁶Kyɛbɔ nzaa kekarekekare ma sona ye gye onya, ná nwosina ma sona nye yɛ ye yea ne, sɔ ala yeɛ sona bɔ ɔte foen ne, ɔte ma bɛ bɔ bɛsoma ye ɔ.

²⁷AWURADE surolɛ ma ngoa tendenn, nakoso bɔnefoɛ de, ye ngoa so pɛ tika.

²⁸Teneneeniɛ ye anyelasoɛ oyie ye anigye nu, nakoso bɔ bɔnefoɛ nye la so de, ɔyɛ mbaen.

²⁹AWURADE atee te anwoserɛ afealeɛ ma bɛ bɔ bɛ bra te sannwuu ɔ, nakoso bɔnefoɛ de, bɛkɔ sɛkyelɛ nu.

³⁰Bengotu teneneeniɛ bengofi ye boso, nakoso bɔnefoɛ de, ɔngɔtena aseɛ ne aso.

³¹Teneneeniɛ ye noa dwirɛ te nworɛ dwirɛ, nakoso temverema bɔ ɔlakalaka ne de, bɛkɔpɛ bɛkɔto.

³²Teneneeniɛ ye noa se edwirɛ bɔ bɛkã a ɔtɔ asoɛ nu ɔ, nakoso bɔnefoɛ noa de, ɔkã nnakannaka dwirɛ.