Read Sehwi Anyandera 11 Bible Online

Anyandera 11 - Sehwi bible

Anyandera 11

¹ Tonyi bɔ bawura nu te AWURADE akyiwadeɛ, nakoso ye nye sɔ asusudeɛ nyɔboɛ bɔ ɔkã nahorɛ ɔ.

² Anwomasoɛ ne animguaseɛ yeɛ bɛnate ɔ, nakoso anwobrɛaseɛfoɛ de, benwu nworɛ.

³Sona bɔ ye bra te sannwuu ne, ye nahorɛlilɛ kyire ye atee, nakoso ngondombofoɛ bɛ nnakannaka fa bɛ kɔ ɛsɛkyelɛ nu.

⁴ Ɛyaafɛlɛ piri kyẽa ne dwu a, anwonya te mbaen, nakoso bra bɔ ɔtengyɛ de, ode sona fi ewue nu.

⁵Sona bɔ ye bra te sannwuu ne, ye tenenee ma ye atee tengyɛ, nakoso bɔnefoɛ de, ye bɔbɔ ye bɔne yeɛ okotua ye kerɛ ɔ.

⁶Sona bɔ ye bra te sannwuu ne, ye tenenee kɔpepɛ kole ye, nakoso ngondomboniɛ de, ye anyeboroborolɛ kakyi ngaen kye ye.

⁷ Sɛ bɔnefoɛ wu a, ye anyelasoɛ ba ayieleɛ, na bɔ amumuyɛɛfoɛ bɛ nye la so ne, ɔyɛ mbaen.

⁸ Bede teneneeniɛ befi amaneɛ nu, na amaneɛ ne kakyi ba bɔnefoɛ so mmom.

⁹Amumuyɛɛniɛ fa ye noa sɛkye obiɛngo, nakoso teneneeniɛ nimdeɛ yeɛ ɔpepɛ de ye ɔ.

¹⁰Sɛ oyie teneneeniɛ yé a, kuro ne di ahurusi, nakoso sɛ bɔnefoɛ wu de a, ye de bɛbɔ ese.

¹¹ Bɛ bɔ bɛ bra te sannwuu ne, ɔnate bɛ saleɛ so yeɛ kuro nya ngɔsoɛ ɔ, nakoso bɔnefoɛ noa dwirɛ de, ɔma kuro bɔ.

¹²Sona bɔ obu obiɛngo animtia ne, né adwene nne ye ti anu, nakoso sona bɔ ɔse nworɛ ne de, ɔndɛ ye noa nu.

¹³Nzekurebɔlɛniɛ natenate ɔma ye noa yɛ kurokuro wɔ edwirɛ bɔ bɛfeafea so ɔ nwo, nakoso sona bɔ ɛkora fa wɔ wora wura ye nu ne de, ɔfa edwirɛ sie.

¹⁴Nekaa bɔ foɛtulɛ nne berɛ ne, maen ne bɔ; nakoso nekaa bɔ foɛtulɛfoɛ pee wɔ berɛ ne, anwotɔ wɔ berɛ.

¹⁵ Sona bɔ odi agyinamuɛ ma ɛwɔfoɛ ne, okonu ye nwo, nakoso sona bɔ okyi agyinamuɛlilɛ ne, ye nwo sonn.

¹⁶Brasua bɔ ye nyunu te ne, onya animnyam, yeɛ mmienzua bɔ bekuro adwuma ne, benya bɛ nwo.

¹⁷Sona bɔ ɔyɛ paa ne, ɔyɛ paa ma ye kra, nakoso atianuserɛniɛ de, ɔyɛ ye bɔbɔ ye nwo.

¹⁸Bɔnefoɛ anwonya te mbaen, nakoso sona bɔ odua tenenee de, onya nahorɛ akatuaa.

¹⁹ Sona bɔ ye bra tengyɛ ne, onya ngoa, nakoso bɔ odi bɔne si ne de, onya ewue.

²⁰Bɛ bɔ bɛte kanda ne, bɛte AWURADE akyiwadeɛ, nakoso bɛ bɔ bɛ bra te sannwuu ne de, bɛsɔ ye nye.

²¹Nahorɛ nu, bɔnefoɛ ngɔfa ye nwo ngoli tɔtorɔtɔɔ, nakoso teneneefoɛ de, bɛ bosofoɛ konya bɛ ti bekodidi nu.

²² Brasua anwonyemene bɔ ɔnze nworɛ ne, ɔte kyɛ sikaa kɔkorɛ kaa bɔ owura prako bonyi anu ɔ.

²³Bɔ teneneefoɛ bɛpena ne, oyie bɛ yé, nakoso bɔnefoɛ b’anyelasoɛ de, ɔkakyi bɛ so ɛyaafɛlɛ.

²⁴Ebiemɔ bɛye bɛ kunu bɛyɔ paa paa, nakoso bɛkɔ so benya bɛ nwo, yeɛ ebiemɔ wora bɛfa bɛ nningyein bɛbɔ atianuserɛ, nakoso bɛkɔ so bedi hiaa.

²⁵Sona bɔ ɔtaa kyɛ nikyee ne, okonya ye nwo, yeɛ sona bɔ ɔboka ebiemɔ maa bɛyɛ yee ne, ye koso ɔkɔyɛ yee.[2]

²⁶Sona bɔ ɔndɔne ye aburoo wɔ mmerɛ bɔ mmenia hia ne, mmenia paye ye, nakoso bɔ ɔtɔne ye deɛ ne de, onya saleɛ.

²⁷Sɛ ebie ɔpena paa si atee a, né ɔpena bɔ ɔsɔ anyeɛ ɔ, nakoso sɛ ebie di bɔne si a, bɔne to ye.

²⁸ Sona bɔ ɔfa ye wora wura ye anwonyadeɛ nu ne, ɔbɔ ase, nakoso teneneeniɛ de, ɔkɔyɛ frɔmfrɔm kyɛ nyaa monɛ.

²⁹Ebiala bɔ ɔha ye abusua ne, agyapadeɛ biala kɔbɔ ye, na kwaseaa kɔyɛ nworɛniɛ akoaa.

³⁰Teneneeniɛ ye mma bɔ osu te ngoa bakaa, na sona bɔ ɔtwetwe akra ne, ɔte nworɛniɛ.[3]

³¹ Sɛ bɛbɔ teneneeniɛ aba so wɔ aseɛ ye aso a, ye de ɔkɔyɛ sɛɛ bɔ amumuyɛɛniɛ ne bɔnefoɛ bengotua bɛ so kerɛ ɔ!