Read Sehwi Anyandera 12 Bible Online

Anyandera 12 - Sehwi bible

Anyandera 12

¹ Ebiala bɔ okuro kyɛ bɛtengyɛtengyɛ ye ne, okuro nimdeɛ, nakoso bɔ okyi kyɛ bɛkɔhã ye nyunu ne de, wagyimi.

²Sona paa sɔ AWURADE nye, nakoso sona bɔ ɔdwene adwene tɛɛ de, AWURADE bua ye fɔ.

³ Sona ngora mva bɔneyɔlɛ nu mma onyie ye yé, nakoso teneneeniɛ de, okotira ndii bɔ ye bo ngotutu ɔ.

⁴ Braa paa ɔte ohu abotire, nakoso nyanzoen braa de, ɔte kyɛ kokoram wɔ ohu mmowue nu.

⁵ Teneneeniɛ ye ti anu adwene te paa, nakoso bɔnefoɛ foɛtulɛ de, ɔte nnakannaka.

⁶Bɔnefoɛ noa dwirɛ, ɔtetɛ sona di ye awue, nakoso teneneeniɛ de, ye noa dwirɛ pepɛ de mmenia.

⁷ Bɔnefoɛ b’ayieleɛ yie bɛ, na bɛ boso mini, nakoso teneneeniɛ de, ye abusua kogyina.

⁸Begyina sona ye nworɛ so yeɛ bɛkamvo ye ɔ, nakoso bɔ adwene nne ye ti anu de, bebu ye animtia.

⁹Ɔte paa kyɛ ɛkɔyɛ wɔ nwo awiɛmvoɛ, bɔ ele akoaa tra kyɛ ɛkɔmoma wɔ nwo so, nakoso wɔ noa aleɛ abɔ wɔ ɔ.

¹⁰ Teneneeniɛ ɔdwene ye nyɛmmoa nwo, nakoso bɔnefoɛ de, ye anwumvoinnwunɛ po ɔte atianuserɛ.

¹¹Sona bɔ ɔyɔ ye aseɛ so adwuma ne, odidi ma ye ko yi, nakoso bɔ odi nningyein mbaen mbaen si ne de, adwene nne ye ti anu.

¹²Amumuyɛɛniɛ ye nye boro nningyein bɔ bɔnefoɛ benya ɔ, nakoso teneneeniɛ de, ye ndii tindim.

¹³Bɔnefoɛ noa dwirɛ tɛɛ osua ye bɔbɔ ye ngaen kye ye, nakoso teneneeniɛ de, onya ye ti didi nu fi amaneɛ nu.

¹⁴Sona noa dwirɛ maa onya nikye paa bɔ ɔma ye kunu dwo ɔ, yeɛ sona nya ye sa noa adwuma nwo akatuaa.

¹⁵Kwaseaa dwene kyɛ ye atee bɔ ɔnate so ɔ te paa, nakoso bɔ otie foɛtulɛ ne de, ɔte nworɛniɛ.

¹⁶Kwaseaa fɛ yaa a, ye yaafɛlɛ ne da ali ndɛndɛ, nakoso badwemma de, ɛpepɛ ye nzoaa a, ɔndɛ wɔ so.

¹⁷Sona bɔ ɔkã nahorɛ ne, ɔda pɛpɛɛpɛyɛlɛ ali, nakoso bɔ odi adanzewia de, ɔpɛ ngondombo.

¹⁸Edwudwolɛ fumfum kora pura sona kyɛ ngrandɛ, nakoso nworɛniɛ ye noa dwirɛ de, ɔsa anwonyerɛ.

¹⁹Edwirɛ nahorɛ timu berɛ daa, nakoso ngondombo dwirɛ de, ɔngyɛ koraa.

²⁰Bɛ bɔ bɛdwene adwene tɛɛ ne, nnakannaka wɔ bɛ ti anu, nakoso bɛ bɔ betu asomdwee nwo foɛ de, benya anika.

²¹Musue biala ndo teneneeniɛ, nakoso bɔnefoɛ de, wafa amaneɛ wasĩ.

²²Noa bɔ ɔnga nahorɛ ne, ɔte AWURADE akyiwadeɛ, nakoso bɛ bɔ bedi nahorɛ de, bɛsɔ ye nye.

²³ Badwemma feafea ye nimdeɛ so, nakoso ngwaseafoɛ de, bɛbɔ egyiminɛ dawure.

²⁴Sona bɔ okuro adwuma ne, odi mmenia so panyi, nakoso ɛfoen sona de, bɛmaa ɔyɔ kanganiɛ adwuma.

²⁵Ahunundetelɛ ma sona di aworabɔlɛ yɛ bosaa, nakoso edwirɛ paa ma ye wora kyekye.

²⁶Teneneeniɛ kyire ye mmango atee paa, nakoso bɔnefoɛ atee de, ɔmaa bemini.

²⁷ Ɛfoen sona nnya eburo naen ngu ye, nakoso sona bɔ okuro adwuma de, onya nikyee bɔ ye nyɔboɛ yɛ se ɔ.

²⁸Tenenee bra ɔfa sona kɔ ngoa nu, nakoso mvomsoɛ atee de, ɔkɔ ewue nu.