Read Sehwi Anyandera 13 Bible Online

Anyandera 13 - Sehwi bible

Anyandera 13

¹ Baa nworɛniɛ tie ye baba dwirɛ, nakoso ngorohoɛniɛ de, etwi ye nyunu a ogua ye so asi.

²Sona paa noa dwirɛ maa onya nningyein paa, nakoso ngondomboniɛ de, basabasayɔlɛ te ye kra aleɛ.

³ Sona bɔ ondwudwo mbaen mbaen ne, ɔpena ye ti ngoa, nakoso bɔ ye noa te kurokuro ne de, onya amaneɛ.

⁴ Bɔ ɛfoen sona ɔpena biala, ongonya ye, nakoso sona bɔ okuro adwuma de, ye kra sa kã bɔ ɔpena ɔ.

⁵Teneneeniɛ kyi ngondombo, nakoso bɔnefoɛ de, ɔbɔ nyanzoen ne animguaseɛ bra.

⁶Tenenee bra, okyire nahorɛlilɛniɛ atee, nakoso bɔne de, obu sa bɔnefoɛ.

⁷ Ebie yɛ ye nwo kyɛ ye sa nu le bie, nakoso olle huu; yeɛ ebie koso yɛ ye nwo kyɛ wahia ye, nakoso wanya ye nwo tam.

⁸Sona fa ye anwonyadeɛ otua ye ti nyɔboɛ ɔpepɛ de ye ngoa, nakoso ehianiɛ de, bɛ nyunu hwilɛ po ɔnde bie.

⁹ Teneneefoɛ kanea ta hyireinn, nakoso bɔnefoɛ kanea de, onua.

¹⁰Anwomasoɛ ne basabasayɔlɛ yeɛ bɛnate ɔ, nakoso bɛ bɔ betie foɛtulɛ ne de, nworɛ ne bɛ yeɛ bɛnate ɔ.

¹¹Ambe atee paa so ambena anwonyadeɛ a, ofi wɔ sa, nakoso bɔ ɔfɛ onya ye ne de, onya pee.

¹²Sɛ w’anyelasoɛ wɔ nikyee bie anwo ɔkyɛ a, ɔmaa ɛboto, nakoso bɔ wɔ nye la so ne ɔba nu a, ɔte ngoa bakaa.

¹³Sona bɔ ɔmva foɛtulɛ nyɛ huu ne, ɔtwetwe amaneɛ brɛ ye nwo, nakoso bɔ odi mmeraa dwirɛ so ne de, okonya akatuaa wɔ so.

¹⁴Nworɛniɛ foɛtulɛ ɔte ngoa asue ti, na sona di so a ɔndɔ ewue ngaen nu.

¹⁵Sona bɔ ole nimdeɛ paa ne, mmenia bɛdo ye, nakoso ngondomboniɛ atee fa ye kɔ amaneɛ nu.

¹⁶ Badwemma fa adwene to bɔ ɔyɔ amukoraa nwo, nakoso kwaseaa de, ɔda ye gyiminɛ ali.

¹⁷Somafoɛ tɛɛ twetwe amaneɛ ba, nakoso ɛbɔfoɛ nahorɛniɛ de, ɔma mmenia nwo sande bɛ.

¹⁸ Betu wɔ foɛ ná endie a, ehiaa ne animguaseɛ kã wɔ, nakoso sɛ ede wɔ nyunu hwilɛ to nu a, enya animnyam.

¹⁹Sɛ wɔ sa kã bɔ ɛpena a, ɔyɛ wɔ kra fɛ, na ɔte ngwaseafoɛ akyiwadeɛ kyɛ bɛkɔhwe bɛ nwo bekofi bɔne nwo ɔ.

²⁰Sɛ ɛne nworɛniɛ nate a, enwu nworɛ, nakoso sɛ ɛne ngwaseafoɛ bɛbɔ afɛ a, edwirɛ to wɔ.

²¹Musue foa bɔnefoɛ, nakoso teneneefoɛ de, saleɛ te b’akatuaa.

²²Sona paa yakyi ye nnomaa agyapadeɛ, nakoso bɔnefoɛ anwonyadeɛ de, okooli teneneefoɛ sa nu.

²³Ehianiɛ boo nu aleɛ ba pee, nakoso bedi ye aminɛ bede befi ye sa nu.

²⁴ Sona bɔ ɔmva mbire ndea ɔwa ne, né ɔpɔ ɔwa ne, nakoso sɛ ekuro ye dwirɛ a, ɛhyɛ ye bo tea ye ndɛ.

²⁵ Teneneeniɛ didi ma ye kra ko yi, nakoso bɔnefoɛ de, ye kunu too.