Read Sehwi Anyandera 14 Bible Online

Anyandera 14 - Sehwi bible

Anyandera 14

¹Brasua nworɛniɛ osi ye sua, nakoso brasua kwaseaa de, ɔfa ye sa dwiri ye gua.

²Sona bɔ ɔnate nahorɛlilɛ atee so ne, osuro AWURADE, nakoso bɔ ɔnate atee tɛɛ so ne de, obu ye animtia.

³Kwaseaa noa dwirɛ te mbire bɔ ɔfa hoahoa ye nwo ɔ, nakoso nworɛfoɛ noa dwirɛ pepɛ de bɛ.

⁴Nekaa bɔ nandwie nyii nne berɛ ne, aleɛ nne berɛ, na nandwie nyii anwoserɛ yeɛ ɔmaa yɛnya fieso aleɛ pee ɔ.

⁵Danzeniɛ nahorɛniɛ mbɛ anoanu, nakoso danzeniɛ ngondomboniɛ de, odi adanzewia.

⁶Ngorohoɛniɛ pena nworɛ, na onnwu ye, nakoso sona bɔ ye adwene nu pi de, nimdeɛ nyanɛ nyɛ se mma ye.

⁷Twe wɔ nwo fi kwaseaa nwo, ofikyɛ ɛngɔte nimdeɛ dwirɛ ngofi ye noa.

⁸Badwemma ye nworɛ ne, ɔmaa ɔdwene bɔ ɔyɔ ɔ nwo, nakoso ngwaseafoɛ bɛ gyiminɛ te nnakannaka.

⁹Ngwaseafoɛ goro foɛlilɛ afɔleɛ nwo, nakoso teneneefoɛ de, Nyameɛ do bɛ.

¹⁰Ahone di aworabɔlɛ a, ye ngome yeɛ ɔse ɔ, yeɛ sɛ ye nye gye koso a, sona foforɛ biala nnya ye anigye ne anu kyɛfa.

¹¹Bɔnefoɛ mɔ, b’awuro kɔbɔ, nakoso teneneefoɛ de, bɛ tena sua kogyina.

¹² Atee bie wɔ berɛ a, ɔte paa wɔ kuro sona nye so, nakoso ye ayieleɛ te ewue atee.

¹³Aserekyekye nu ne po, aworabɔlɛ wɔ berɛ, na anigye ayieleɛ oyie aworabɔlɛ.

¹⁴Amumuyɛɛniɛ ye bɔbɔ ye yɔleɛ obu sa ye, yeɛ sona paa wora onya bɔ ɔyɔ ɔ nwo akatuaa.

¹⁵Sona bɔ ye adwene te kãa ne, ode edwirɛ biala di, nakoso badwemma de, ɔdwene ye agyirɛtulɛ nwo yé.

¹⁶Nworɛniɛ suro, na ɔtwe ye nwo fi bɔne nwo, nakoso kwaseaa de, ɔyɛ dwirɛ a ɔndwene ye nwo.

¹⁷Sona bɔ ye ahone pingye ye ne, ɔyɔ ye nningyein ngwaseaa nu, yeɛ kanda sona koso, mmenia kyi ye.

¹⁸Bɛ bɔ b’adwene te nganga ne, egyiminɛ te bɛ kyɛfa, nakoso badwemma de, nimdeɛ te b’abotire.

¹⁹Bɔnefoɛ bɛkoto mmeni paa, yeɛ amumuyɛɛfoɛ kɔkoto wɔ teneneefoɛ b’anoa nu.

²⁰Ehianiɛ mmango mɔ po bekyi ye, nakoso sikaniɛ de, ye damvo mɔ bɛsone pee.

²¹Bɔ obu ye mmango animtia ne, ɔte bɔne, nakoso bɔ ɔdo sona bɔ ɔyɛ anwumvo ne, onya saleɛ.

²²Bɛ bɔ bɛbɔ porɛ tɛɛ ne, aso bɛnyɔ mvomsoɛ anaa? Na bɛ bɔ bɛdwene adwene paa ne, benya pɛpɛɛpɛyɛlɛ ne nahorɛlilɛ.

²³ Adwumayɔlɛ serɛ ma mvasoɛ, nakoso bɛ noa dwirɛ mbaen de, ɔne ehiaa yeɛ bɛnate ɔ.

²⁴Anwonya te nworɛfoɛ b’abotire, na ngwaseafoɛ de, egyiminɛ ala yeɛ bagyimi ɔ.

²⁵ Danzeniɛ nahorɛniɛ ode sona ngoa, nakoso danzeniɛ ngondomboniɛ de, ɔye sona ma.

²⁶ Bɛ bɔ besuro AWURADE ne, bɛ wora wura ye nu pindinn, na ɔbɔ bɛ mma nwo waen.

²⁷AWURADE surolɛ te ngoa asue ti, na sona di so a ɔndɔ ewue ngaen nu.

²⁸Ɛhene bɔ ole mmenia pee ne, bɛte ye animnyam, nakoso ɛhene bɔ olle mmenia ne, ye tumi kɔ ase.

²⁹Sona bɔ ye ahone nhu ndɛ ne, ole ndeaseɛ paa, nakoso bɔ ye ahone pingye ye ne de, odi ngwaseasɛm.

³⁰Wɔ so anu tɔ wɔ a, enya anwoɔnaen nu anwoserɛ, nakoso ahoɔyea de, ɔte mmowue nu kokoram.

³¹ Ɛhyɛ sona bɔ ɔyɛ anwumvo so a, né agua ye Nyameɛ bɔ ɔbɔle ye ne nyunu ase, na ebiala bɔ onwu ehianiɛ anwumvo ne, ɔhyɛ Nyameɛ animnyam.

³²Bɔnefoɛ ye bɔne yeɛ ɔbrɛ ye ase ɔ, nakoso teneneeniɛ de, ole anyelasoɛ wɔ ye wue nu.

³³Sona bɔ ole ndeaseɛ ne, nworɛ wɔ ye ti anu, nakoso bɔ ɔwɔ ngwaseafoɛ nu de, ɔda ali pefee.

³⁴Tenenee ma maen nya ngɔsoɛ, nakoso bɔne de, ogua maen biala nyunu ase.

³⁵Akoaa bɔ ɔse nworɛ ne, ɛhene ne kɔlo ye, nakoso ɔfɛ bɛ bɔ bɛbɔ nyanzoen bra so yaa.