Read Sehwi Anyandera 15 Bible Online

Anyandera 15 - Sehwi bible

Anyandera 15

¹Ɛyɛ wɔ noa bɛtɛɛ ɛma mmuayɛɛ a, ɔma ahone tɔ nzue nu, nakoso edwudwo fumfum a, ye de ɔma ahone hu.

²Nworɛfoɛ noa dwirɛ ma nimdeɛ yɛ nyemene, nakoso ngwaseafoɛ noa kekã ngwaseasɛm.

³AWURADE nye wɔ nekaa biala, na ɔnea bɔnefoɛ ne mmeni paa.

⁴Ɛyɛ wɔ noa bɛtɛɛ a, ɔte ngoa bakaa, nakoso ngondombo dwirɛ de, oku sunzum.

⁵Kwaseaa mva ye baba foɛtulɛ nyɛ huu, nakoso sona bɔ betwi ye nyunu a otie ne, ɔte badwemma.

⁶Anwonya pee wɔ teneneeniɛ awuro, nakoso bɔnefoɛ de, ye anwonya te musue.

⁷Nworɛfoɛ noa dwirɛ ma nimdeɛ trɛ, nakoso ngwaseafoɛ b’adwene de, ɔtte sɔ.

⁸ Bɔnefoɛ afɔleɛ te AWURADE akyiwadeɛ, nakoso teneneefoɛ mbaeɛ de, ɔte ye nikyee bɔ ye nye gye ye nwo ɔ.

⁹ Bɔnefoɛ mɔ atee te AWURADE akyiwadeɛ, nakoso bɛ bɔ bɛfa tenenee besie bɛ nye so de, okuro bɛ dwirɛ.

¹⁰Sona bɔ odi atee ne anwo makyebu ne, asohwenɛ piri la berɛ ma ye, yeɛ bɔ okyi bɛ nyunu hanɛ ne wora, okowu.

¹¹ Sɛ ɛborɔ ne Abadɔn po bɛla berɛ too wɔ AWURADE nyunu a, ɔkɔyɛ sɛɛ bɔ kuro sona ti anu adwene kɔfea ye ɔ!

¹²Ngorohoɛniɛ nguro kyɛ bɛkɔhã ye nyunu ɔ, yiti ɔngɔ nworɛfoɛ berɛ.

¹³Enya anigye wɔ wɔ nu a, ɔma wɔ nyunu yɛ ɛsereserelɛ, nakoso aworabɔlɛ ma sona sunzum nwo to.

¹⁴Badwemma adwene pena nimdeɛ si atee, nakoso ngwaseafoɛ de, ngwaseasɛm te bɛ noa aleɛ.

¹⁵Sona bɔ onwu amaneɛ ne, kyẽa biala ɔtte mayee mma ye, nakoso bɔ ye nye agye de, mmerɛ biala te ɛpoentolɛ ma ye.

¹⁶ Kyɛ ekosuro AWURADE ná ekonya nikyee kaaba ne, ɔte paa tra anwonyadeɛ pee bɔ amaneɛ boka so ɔ.

¹⁷Sɛ edi mburuhu wɔ ɔdɔ nu a, ɔte paa tra kyɛ ekoli nandwie nyii bɔ walɔ ɔ wɔ ɛpɔen nu ɔ.

¹⁸Sona bɔ ye ahone pingye ye ne, ye nwo te ngondii, nakoso bɔ ye ahone nhu ndɛ ne de, ɔma mmenia ahone tɔ nzue nu.

¹⁹Sona bɔ ɔte foen ne, ye atee te mmowue mmowue, nakoso teneneeniɛ de, ye atee te atimbire.

²⁰ Baa nworɛniɛ ma ye baba nya anika, na sona kwaseaa de, obu ye maame animtia.

²¹Sona bɔ nworɛ nne ye ti anu ne, ngwaseasɛm yɛ ye fɛ, nakoso badwemma de, ɔyɔ bɔ ɔtengyɛ ɔ.

²² Ɛkwati foɛtulɛ ɛfa adwene a, ɔte mbaen, nakoso sɛ ɛfa foɛtulɛfoɛ pee b’adwene a, ogyina.

²³Sona ma edwirɛ nwo mmuayɛɛ nyemene so a, ɔma ye nye gye, yeɛ sɛ ɔkã edwirɛ paa wɔ mmerɛ bɔ odi kyɛ ɔkã ɔ nu a, ɔte paa paa!

²⁴Ngoa atee bɔ ɔkɔ anwuro yeɛ nworɛniɛ fa so ɔ, amaa ɔnate so wangɔ ɛborɔ wɔ aseɛ bo dɔ.

²⁵AWURADE dwiri anwomasoɛfoɛ b’awuro gua, nakoso ɔbɔ akunafoɛ mmrasua bɛ wɛen nwo waen.

²⁶Bɔnefoɛ bɛ porɛ bɔ bɛbɔ ne, ɔte AWURADE akyiwadeɛ, nakoso anwoteefoɛ de, bɛ dwirɛ nwo te.

²⁷Sɛ sona nya ye nwo fi aminɛlilɛ nu a, ɔtwetwe amaneɛ brɛ ye abusua, nakoso sona bɔ okyi fea-ase-ma de, okonya ngoa.

²⁸Teneneeniɛ dwene dwirɛ nwo koraka né wama mmuayɛɛ, nakoso bɔnefoɛ de, ye noa kekã musue dwirɛ.

²⁹ AWURADE ne bɔnefoɛ b’afia atee wale, nakoso teneneefoɛ de, otie bɛ mbaeɛ.

³⁰ Wɔ nyunu yɛ ɛsereserelɛ a, ɔma wɔ nye gye, yeɛ ndɛenvɛen maa sona aporɛ nu yɛ se.

³¹Asoɛ bɔ otie anyunuhanɛ bɔ ɔma ngoa ne, ɔne nworɛfoɛ yeɛ bɛtena ɔ.

³²Sona bɔ ɔpo foɛtulɛ ne, obu ye bɔbɔ ye kra animtia, na bɔ otie anyunuhanɛ ne de, ɔyɛ badwemma.

³³ AWURADE surolɛ te nworɛ bɔ ɔtengyɛtengyɛ sona ɔ, na anwobrɛaseɛ ne animnyam yeɛ bɛnate ɔ.