Read Sehwi Anyandera 16 Bible Online

Anyandera 16 - Sehwi bible

Anyandera 16

¹Kuro sona yɛ nhyehyɛleɛ wɔ ye ti anu, nakoso temverema ye mmuayɛɛ ofi AWURADE berɛ.

² Kuro sona bra amukoraa tengyɛ wɔ ye bɔbɔ ye nye so, nakoso AWURADE yeɛ ɔkari sona ti anu dwirɛ nea ɔ.

³ Fa w’adwuma wura AWURADE sa, na wɔ nhyehyɛleɛ koli mu.

⁴AWURADE le botaeɛ bɔ yiti yeɛ wayɔ nikyee biala ɔ, bɔnefoɛ mɔ po, amaneɛnwunɛ kyẽa ne la berɛ ma bɛ.

⁵Ebiala bɔ ɔte ahandaen ne, AWURADE kyi ye, nahorɛ nu, ɔngɔfa ye nwo ngoli tɔtorɔtɔɔ.

⁶Bɛfa pɛpɛɛpɛyɛlɛ ne nahorɛlilɛ yeɛ bɛyɛ bɔne nwo mbata ɔ, na AWURADE surolɛ yeɛ ɔma sona twe ye nwo fi bɔne nwo ɔ.

⁷ Sɛ sona atee ɔsɔ AWURADE nye a, ɔma ye pɔfoɛ mɔ po bɛ ne ye tena asomdwee nu.

⁸Ɛpe atee paa so enya nikyee kaaba bie a, ɔte paa tra kyɛ ekoli aminɛ ekonya wɔ nwo tam ɔ.

⁹ Sona fa ye adwene susu bɔ ɔkɔyɔ ɔ nwo, nakoso AWURADE yeɛ okyire ye atee ɔ.

¹⁰Ɛhene noa dwirɛ te ngɔmhyɛlɛ, na ye ndɛenbualɛ nu, ye noa nyɛ mvomsoɛ.

¹¹ Nahorɛ asusudeɛ ne nahorɛ tonyi te AWURADE deɛ, yeɛ kariboɔ amukoraa bɔ ɔwɔ kotoku ne anu ne, ɔte ye sa noa adwuma.

¹²Ɔte akyiwadeɛ ma ahemvo kyɛ bɛkɔyɔ bɔne ɔ, ofikyɛ ɔnate tenenee so yeɛ bia ne bo tira ndii ɔ.

¹³Noa bɔ ɔkã nahorɛ ne, ahemvo mɔ nye gye ye nwo, yeɛ bekuro sona bɔ ye noa dwirɛ te turoloo ɔ dwirɛ.

¹⁴Ɛhene ahonehulɛ te ewue bɔfoɛ, nakoso nworɛniɛ ma ahone ne tɔ nzue nu.

¹⁵Sɛ ɛhene nyunu yɛ sereserelɛ a, ɔte ngoa, yeɛ sɛ ɔdo wɔ a, ɔte kyɛ munungum bɔ ɔtɔ bamborɔ ɔ.

¹⁶Ɛse nworɛ a, kyɛbɔ osi te paa tra sikaa kɔkorɛ ɔ! Yeɛ sɛ ɛte badwemma a, ɔte paa tra kyɛ ekonya ɛdwetɛ ɔ.

¹⁷Teneneeniɛ atimbire ɔmmakye ngɔ bɔne nu, yiti ebiala bɔ ɔnea ye agyirɛtulɛ nu yé ne, onya ngoa.

¹⁸ Anwomasoɛ ne ɛsɛkyelɛ yeɛ bɛnate ɔ, yeɛ ahandaen ne asetɔlɛ yeɛ bɛnate ɔ.

¹⁹Ɔte paa kyɛ ɛkɔbrɛ wɔ nwo ase ɛkɔboka bɛ bɔ bɛyɛ anwumvo ɔ so, tra kyɛ ɛne anwomasoɛfoɛ bɛkɔhyɛ koɛ nu nzesadeɛ ɔ.

²⁰Sona bɔ ɔdwene edwirɛ nwo yé ne, oyie ye yé, yeɛ bɔ ɔfa ye wora wura AWURADE nu ne, onya saleɛ.

²¹Sona bɔ ɔyɔ ye nningyein nworɛ nu ne, bɛfrɛ ye badwemma, yeɛ sɛ sona noa dwirɛ yɛ fɛ a, ɔma mmenia nya nikyeesualɛ nu ngɔsoɛ.

²²Sona bɔ ole nimdeɛ ne, ɔte ngoa asue ti ma ye, na ngwaseafoɛ de, bɛ gyiminɛ yeɛ ɔtwe bɛ so ɔ.

²³Sona bɔ ɔse nworɛ ne, odwudwo nworɛ nu, na ɔnate so ma ye noa nya nikyeesualɛ nu ngɔsoɛ.

²⁴Edwirɛ bɔ ɔyɛ fɛ ne, ɔte kyɛ woɛ bɔ ɔwɔ nzasameɛ nu ɔ, ɔte menemene ma sona kra, na ɔma aporɛnuserɛ.

²⁵ Atee bie wɔ berɛ a, ɔte paa wɔ kuro sona nye so, nakoso ye ayieleɛ te ewue atee.

²⁶Bɔ adwumayɔlɛniɛ ɔpena ne ati, ɔmaa ɔyɔ adwuma, bɔ okoli ɔ yeɛ opiapia ye ɔ.

²⁷Busueniɛ bɔ porɛ tɛɛ, na ye noa dwirɛ te kyɛ see bɔ ogye ɔ.

²⁸Sona bɔ adwene paa nne ye ti anu ne, ɔma ngondii tɔ mmenia b’afia, na nzekurebɔlɛniɛ tete abiɛngoɛ mɔ b’afia.

²⁹Nzɛmmɔneniɛ sisi obiɛngo, odiedie ye maa ɔfa atee tɛɛ so;

³⁰ɔbɔ ye nye kyire ɔfa dwene adwene tɛɛ, yeɛ ɔbesebese ye noa ɔbɔ porɛ tɛɛ.

³¹ Egyein te animnyam abotire, sɛ ɔba kyɛ enya ye wɔ tenenee bra nu a.

³²Sɛ w’ahone nhu ndɛ a, ɔte paa tra kyɛ ɛte katakyie ɔ, yeɛ sɛ enya ɛyaafɛlɛ nu anwohyɛsoɛ a, ɔte paa tra kyɛ ɛkɔho kɔfa kuro ɔ.

³³Mmenia gua serewa de, nakoso nu ngyerɛmuɛ ne amukoraa ofi AWURADE.